Բնականաբար, դա չի կարող հաճույք պատճառել. Բակո Սահակյանը՝ Քոչարյանին մեկուսարանից դատարան տանելու կադրերի մասին

«Մնալու եմ Արցախում եւ իմ հնարավորությունների շրջանակներում օգտակար եմ լինելու Արցախին եւ մեր հայրենիքին». իր ընտրությունը կատարելուց հետո այս մասին հայտարարեց Արցախի Հանրապետության նախագահ Բակո Սահակյանը, որն այսօր կայանալիք ընտրություններից հետո լքելու է այդ պաշտոնը:

Հարցին՝ որեւէ պաշտոն ստանձնելո՞ւ է, Սահակյանը պատասխանեց, թե այդպիսի քննարկումներ եւ հաշվարկներ չի ունեցել: Հիշեցնենք, որ Բակո Սահակյանը Արցախի նախագահ է 2007 թվականի հուլիսի 19-ից՝ շուրջ 13 տարի: 

 Լրագրողներն Արցախի նախագահից հետաքրքրվեցին, թե ինչո՞ւ որոշում չկայացվեց հետաձգել ընտրություններն Արցախում, երբ ամբողջ աշխարհում կորոնավիրուսի տարածման վտանգի պատճառով կանխարգելիչ միջոցառումներ են իրականացվում:

«Բացառվում է, որ մենք դիմենք այնպիսի որոշումների եւ գործողությունների, որի հետեւանքով կվտանգվի Արցախի Հանրապետության քաղաքացիների առողջությունն ու նրանց անվտանգությունը: Մենք անց ենք կացրել բազմաթիվ քննարկումներ եւ եկել ենք այն տրամաբանական որոշմանը, որ ունենք բոլոր նախադրյալները՝ Սահմանադրության պահանջներին համապատասխան այս ընտրությունները կազմակերպելու եւ անցկացնելու: Ինչպես գիտեք, այս պահին չի գրանցվել կորոնավիրուսի դեպք, մենք մշտական դիտարկում ենք անցկացնում, այդ որոշումը եղել է գիտակցված եւ հիմնավորված»,- պարզաբանեց Սահակյանը:

Ըստ նրա՝ Արցախում կայանալիք ընտրությունները յուրահատուկ են՝ հաշվի առնելով Արցախի յուրահատուկ պատկանելությունը: Իսկ այդ յուրահատուկ պատկանելությունը Սահակյանի կարծիքով այն է, որ Արցախը հավասարաչափ պատկանում է աշխարհի բոլոր ծայրերում բնակվող հայերին:

Անդրադարձ եղավ նաեւ Արցախի նախագահներից Ռոբերտ Քոչարյանի դատավարությանը: Լրագրողներից մեկը հետաքրքրվեց, թե ի՞նչ զգացողություն է ունենում, երբ տեսնում է մեկուսարանից Քոչարյանին դատարան տանելու կադրերը, կամ Սերժ Սարգսյանի ներգրավումը դատական գործընթացներում. «Բնականաբար, դա չի կարող հաճույք պատճառել ո՛չ ինձ, ո՛չ միայն Արցախի քաղաքացիներին, այլ ավելի քան համոզված եմ՝ ՀՀ քաղաքացիներին եւ ընդհանրապես ողջ հայ ժողովրդին, որովհետեւ մենք խոսում ենք առաջնորդների մասին, որոնք ժամանակին ղեկավարել են ազգային ազատագրական պայքարը եւ սկզբնական շրջանում նաեւ կազմակերպել են զինված դիմադրությունը: Հետագայում նշված մարդիկ իրենց մասնակցությունն են բերել բանակաշինության գործին, մեր հայրենիքի բարօրության ապահովմանը»,- պատասխանեց նա:

«Ազատություն» ռադիոկայանի լրագրողը նկատեց՝ բայց այդ մարդկանց իշխանության տարիներին «Մարտի 1» է տեղի ունեցել, տասը մարդ սպանվել է, սպանության պատասխանատուներին տարիներ շարունակ չեն գտել: «Եթե դուք նկատել եք, այս ամբողջ ընթացքում մենք ցուցաբերել ենք այդ զսպվածությունը, մեր խոսքը կառուցելուց, մեր մեկնաբանությունները տալուց մենք իրավական գնահատականներ չենք տվել: Եվ լինի դա մեր միջնորդությունը դատարանում, լինեն այլ գործողություններ՝ իմ, մեր կողմից նախաձեռնվածը միայն ու միայն նպատակ էր հետապնդում՝ իմ կողմից նշված իրողությունը հաշվի առնելով, որ մենք խոսում ենք մարդկանց մասին, որոնց մասնակցությունը հայ ժողովրդի նորագույն պատմության մեջ դժվար է չգնահատել: Այսօր կա դատական գործընթաց, մենք պարտավոր ենք ցուցաբերել այդ անհրաժեշտ վերաբերմունքը եւ հարգել նաեւ դատական գործընթացի շրջանակներում տեղի ունեցող զարգացումները»,- նկատեց Սահակյանը:

Լրագրողներից մեկն էլ նկատեց, թե արդյոք չի կարծում, որ Քոչարյանին կալանքից ազատելու անձնական երաշխավորություն ներկայացնելով՝ միջամտում է ՀՀ ներքին գործերին. «Ես բացառում եմ այդպիսի մեկնաբանությունները, ավելի ճիշտ՝ դեմ եմ այդպիսի մեկնաբանություններին: Վերջին հաշվով մենք խոսում ենք մեկ հայրենիքի մասին, եւ այդ զարգացումները տեղի են ունենում մեկ հայրենիքի շրջանակներում: Դուք գիտեք, որ մենք ապրում ենք մեկ հայրենիքում՝ երկու պետությամբ, եւ ես չեմ կարծում, որ նման միջնորդությունները խախտում են ձեր կողմից նշված կարգերն ու կանոնները: Ճիշտ հակառակն եմ մտածում եւ ինչպես նախկինում, այսօր, ապագայում էլ առաջնորդվելու եմ այդ մտածելակերպով»,- պատասխանեց Արցախի նախագահը:

Հետընտրական հնարավոր զարգացումների մասին հարցին ի պատասխան էլ՝ Սահակյանն ընդգծեց, որ ստեղծվել են անհրաժեշտ նախադրյալները՝ բարձր մակարդակով ընտրություններ անցկացնելու համար, սակայն եթե լինեն օրենքից դուրս հավանական զարգացումներ, պարտավոր են զսպել դրանք:

«Բոլոր նրանց հանդեպ, ովքեր կփորձեն ոտնձգություններ իրականացնել մեր պետականության դեմ կամ արհեստական լարվածություն ստեղծել մեր հայրենիքում, պարզ է, կգործադրենք օրենքով սահմանված միջոցները»,- ասաց Սահակյանը՝ հավելելով, թե բացառում է նման զարգացումները: