Կեղտոտ քարոզարշավ է, կեղտոտ եւ սեւ PR տեխնոլոգիաների կիրառմամբ. քաղաքագետն՝ ընտրությունների մասին

Երեւանի ավագանին կձեւավորվի «Իմ քայլը», «Լույս», «Երեւանցիներ» դաշինքներից եւ «Բարգավաճ Հայաստան» ու «Դաշնակցություն» կուսակցություններից: «Հայկական ժամանակ»-ի հետ զրույցում նման կանխատեսում է արել քաղաքագետ Արմեն Բաղդասարյանը: Նա միաժամանակ կարծում է, որ այս ընտրությունները խորհրդարանական արտահերթ ընտրությունների նախերգանքն են:

- Պարոն Բաղդասարյան, արդեն մեկ շաբաթից ավելի է` ընթանում է Երեւանի ավագանու արտահերթ ընտրությունների քարոզարշավը: Արդեն պա՞րզ է, թե որ քաղաքական ուժերի ծրագրերն են իրատեսական եւ թեկնածուներից ո՞վ քաղաքապետ ընտրվելու շանս ունի:

- Ծրագրերի մասին չէի ցանկանա խոսել, որովհետեւ ծրագրեր ընդհանրապես չտեսա: Այս ավագանու ընտրությունները տարբերվում են նրանով, որ սա այնքան էլ ծրագրերի պայքար չէ: Սա ավելի շուտ ներքաղաքական կոշտ պայքար է, եւ պայքարում Երեւանի քաղաքապետի պաշտոնը 2-րդական, 3-րդական դեր է կատարում:

Հիմնական մրցակիցներն են «Իմ քայլը» դաշինքը, «Բարգավաճ Հայաստան» կուսակցությունը, «Լույս» դաշինքը եւ ես կտայի նաեւ Արարատ Զուրաբյանի անունը, որովհետեւ նա քաղաքային ենթակառուցվածքներ ղեկավարելու փորձ ունի:

- Ի՞նչ եք կարծում՝ ընտրություններն ինչպիսի՞ ելք կունենան: Կհաջողվի՞ «Իմ քայլը» դաշինքին ձեւավորել բացարձակ մեծամասնություն, թե՞ այդուամենայնիվ, կոալիցիա կազմելու անհրաժեշտություն կլինի:

- Եթե ընտրությունները լինեին դասական ընտրություններ, այսինքն՝ պայքարն ընթանար քաղաքապետի թեկնածուների միջեւ, կարծում եմ, որ «Իմ քայլը» դաշինքի թեկնածուն բացարձակ մեծամասնություն չէր ստանա եւ ավելի հավանական կլիներ կոալիցիա կազմելը: Այս իրավիճակում, երբ քաղաքական դաշտը սեւ ու սպիտակի է վերածված, «Իմ քայլը» դաշինքը մեծ շանսեր ունի միայնակ մեծամասնություն կազմելու: Այսպիսով՝ կոալիցիա կազմելու անհրաժեշտություն չի լինի:

- Ճի՞շտ էր դաշտը սեւ ու սպիտակի բաժանելը: Ո՞րն է դրա նպատակը ու ի՞նչ կտա այդ բաժանումը:

- Սեւ ու սպիտակի բաժանելն ընդհանրապես սխալ է, քանի որ հասարակությանն են պառակտում, ինչպես նաեւ քաղաքական դաշտն են պառակտում: Այս իրավիճակում նման տարանջատումը ձեռնտու է «Իմ քայլը» դաշինքին՝ զուտ նախընտրական մարտավարության առումով, որովհետեւ սեւ ու սպիտակի դիտանկյունից որ նայում ենք՝ «Իմ քայլը» դաշինքի շանսերը կտրուկ մեծանում են: Այս դեպքում հասարակությունը ձայն է տալիս ոչ թե Հայկ Մարությանին, այլ Նիկոլ Փաշինյանին: Նրա վարկանիշն ավելի բարձր է, քան Հայկ Մարությանի վարկանիշը:

- Վերջին օրերին քարոզարշավը կոշտ երանգներ է ստանում: ԲՀԿ-ի քաղաքապետի թեկնածուն կոպիտ հայտարարություններ արեց՝ մեղադրանքներ հնչեցնելով «Իմ քայլը» դաշինքի հանդեպ, որոնք նույն օրն իսկ թեեւ հերքվեցին, բայց ակնհայտ լարվածությունը դեռ շարունակվում է: Ինչո՞վ է պայմանավորված ԲՀԿ-ի վարքը:

- Ես ԲՀԿ-ին չէի առանձնացնի: Պետք է արձանագրել, որ սա կեղտոտ քարոզարշավ է, կեղտոտ եւ սեւ PR տեխնոլոգիաների կիրառմամբ: Սա բացասական երեւույթ է, որովհետեւ կա լարվածություն եւ արդյունքների անորոշություն: Քաղաքական իրավիճակն ընդհանրապես շատ անորոշ է, եւ այս ընտրությունները դիտարկվում են խորհրդարանական արտահերթ ընտրությունների նախերգանք: Խաղադրույքը շատ ավելի մեծ է, քանի Երեւանի ավագանու ընտրությունները, դրա համար էլ այդքան կեղտոտ տեխնոլոգիաներ են կիրառվում: Դա միայն ԲՀԿ-ն չի կիրառում, բոլորն են կիրառում:

- Թերեւս ակնհայտ է, դուք էլ, ըստ էության ասացիք, որ առաջին տեղը զբաղեցնելու է «Իմ քայլը» դաշինքը: Ըստ ձեզ, 2-րդ եւ 3-րդ տեղերի համար մրցակցությունը ո՞ր ուժերի միջեւ կընթանա եւ որ ուժերը կանցնեն Երեւանի ավագանու կազմ:

- «Իմ քայլը» դաշինքից բացի, ավագանու կազմում կլինեն նաեւ ԲՀԿ-ն, «Լույս» դաշինքի թեկնածուները, «Երեւանցիներ» դաշինքը եւ ՀՅԴ-ն: Այս հինգ ուժերը, ամենայն հավանականությամբ, կձեւավորեն Երեւանի ավագանու կազմը:

- Երեւանի ավագանու ընտրությունների արդյունքները ինչպե՞ս կազդեն առաջիկա զարգացումների վրա: Հնարավո՞ր է, որ բացարձակ մեծամասնություն հավաքելու դեպքում իշխանությունը շատ ավելի շուտ կգնա խորհրդարանի լուծարմանը: Այս պարագայում ինչպե՞ս իրենց կպահեն այս պահին ԱԺ-ում գտնվող ուժերը:

- Եթե «Իմ քայլը» դաշինքը կարողանա բացարձակ մեծամասնություն կազմել, ինչպես Նիկոլ Փաշինյանն է ակնկալում՝ 80 տոկոս, կարծում եմ, որ ոգեւորվածության այդ ալիքի վրա իշխանություններն ավելի կոշտ քայլերի կգնան խորհրդարանական արտահերթ ընտրություններ կազմակերպելու հարցում: Ես կարծում եմ, որ «Իմ քայլը» դաշինքը 80-90 տոկոս չի հավաքի: Ընդդիմախոս ուժերը նույնպես զգալի դերակատարում կունենան եւ կարծում եմ, որ Երեւանի ընտրություններից հետո ներքաղաքական պայքարն ավելի կթեժանա: Նոր իշխանությունների համար ավելի դժվար կլինի խորհրդարանական արտահերթ ընտրություններն ապահովել ավելի վաղ, քան ապրիլ-մայիսին: Խորհրդարանական ուժերը, բացի «Քաղաքացիական պայմանագիր» կուսակցությունից, կընդդիմանան, որ Ազգային ժողովի ընտրություններն ավելի վաղ լինեն:

Հիշեցնենք, որ Երեւանի ավագանու ընտրությունները տեղի են ունենալու սեպտեմբերի 23-ին: Քաղաքապետի պաշտոնի համար պայքարում է 8 կուսակցություն եւ չորս դաշինք: Այս օրերին ընթանում է նախընտրական քարոզարշավը: Թեկնածուները փորձում են իրենց ծրագրերը ներկայացնել երեւանցիներին: