Չկա իմպիչմենտ, չկա ինքնաբացարկ. «Քաղաքացիական պայմանագիրը» պատասխանում է Էդմոն Մարուքյանին

«Քաղաքացիական պայմանագիր» կուսակցության մամուլի խոսնակ Ալեն Սիմոնյանը ֆեյսբուքյան իր էջում արձագանքել է «Լուսավոր Հայաստան» կուսակցության կողմից տարածված նոր հայտարարությանը, որով Էդմոն Մարուքյանն, ըստ էության, հրաժարվել էր Սերժ Սարգսյանին իմպիչմենտի ենթարկելու նախագիծ ներկայացնել ԱԺ.

««Քաղաքացիական պայմանագիր» կուսակցության վարչության անդամ Ռուբեն Ռուբինյանը կուսակցության անունից պարտավորվել էր, որ այսօր «Քաղաքացիական պայմանագիր» կուսակցությունը Վանաձորում հօգուտ «Լուսավոր Հայաստան» կուսակցության ինքնաբացարկ կհայտնի, եթե.

1. «Լուսավոր Հայաստան» կուսակցությունը հայտարարի, որ Սերժ Սարգսյանը անձամբ պատասխանատվություն է կրում Մարտի 1-ի ոճրագործության համար։

2. «Լուսավոր Հայաստան» կուսակցությունը հայտարարի, որ Սերժ Սարգսյանն ընտրվել է կեղծված ընտրություններով և չի հանդիսանում լեգիտիմ նախագահ։ 

3. ԱԺ պատգամավոր Էդմոն Մարուքյանն այսօր Սերժ Սարգսյանին Իմպիչմենտի ենթարկելու նախագիծ ներկայացնի ԱԺ:

«Լուսավոր Հայաստան» կուսակցության նախագահ Էդմոն Մարուքյանը սեպտեմբերի 22-ին, ժամը 15-ի սահմաններում հանդես է եկել հայտարարությամբ, որով.

1. Չի հայտարարել, թե Սերժ Սարգսյանն անձամբ պատասխանատվություն է կրում Մարտի 1-ի ոճրագործության համար եւ այս հարցին որեւէ անդրադարձ չի արել: 

2. Չի հայտարարել, թե Սերժ Սարգսյանն ընտրվել է կեղծված ընտրություններով և չի հանդիսանում լեգիտիմ նախագահ եւ այս հարցին որեւէ անդրադարձ չի արել: 
Ժամը 18.00-ի դրությամբ Սերժ Սարգսյանին իմպիչմենտի ենթարկելու նախագիծ չի ներկայացրել ԱԺ: 

Այսպիսով՝ Էդմոն Մարուքյանը եւ ի դեմս նրա՝ «Լուսավոր Հայաստան» կուսակցությունը մերժել է «Քաղաքացիական պայմանագիր» կուսակցության առաջարկի բոլոր երեք կետերը, ինչը նշանակում է, որ մենք շարունակելու ենք մեր ընտրապայքարը Վանաձորում եւ շարունակում ենք պնդել «Լուսավոր Հայաստանի» եւ Էդմոն Մարուքյանի գործունեության վերաբերյալ մեր կուսակցության Վարչության ներկայացուցիչների՝ նախկինում արած հայտարարությունները:

Ինչ վերաբերում է Նիկոլ Փաշինյանի հեղինակած Իմպիչմենտի նախագծին, ԱԺ պատգամավորը պարտավոր էր իմանալ, որ ԱԺ-ի կողմից այն մերժվելուց հետո դուրս է եկել շրջանառությունից եւ հիմա ԱԺ-ում շրջանառվող փաստաթուղթ չի համարվում, ուստի այլ պատգամավորների միանալը դրան հնարավոր չէ»,- մասնավորապես ասվում է Ալեն Սիմոնյանի հայտարարությունում:

Հիշեցնենք, որ երեկ Էդմոն Մարուքյանը ֆեյսբուքյան իր էջում կատարված գրառմամբ դիմեց Վանաձորի ՏԻՄ ընտրություններին մասնակցող բոլոր ընդդիմադիր ուժերին՝ առաջարկելով միավորել ջանքերը և համատեղ ուժերով ՀՀԿ-ի նկատմամբ հաղթանակը դարձնել առավել աներկբա և վերջնական: Խոսքն, ըստ էության գնում էր հօգուտ «Լուսավոր Հայաստան»-ի ինքնաբացարկ հայտնելու մասին:

Այս գրառմանն արձագանքեց «Քաղաքացիական պայմանագիր» կուսակցությունը: Կուսակցության վարչության անդամ Ռուբեն Ռուբինյանը ֆեյսբուքյան իր էջում գրեց, որ անհասկանալի է, թե ում նկատի ունի պարոն Մարուքյանը՝ ասելով «ընդդիմություն». «ՕԵԿ-ի՞ն, Վարդան Օսկանյանի՞ն, ԲՀԿ-ի՞ն։ ՔՊ-ն երբեք չի միավորվել և չի միավորվելու հանցագործների և խաբեբաների հետ»,- նշում էր Ռուբինյանը։

Այնուհետեւ, Ռուբինյանը կուսակցության անունից Մարուքյանին հետեւյալ առաջարկները ներկայացրեց.

«1. Հայտարարել, որ Սերժ Սարգսյանն անձամբ պատասխանատվություն է կրում Մարտի 1-ի ոճրագործության համար։

2. Սերժ Սարգսյանն ընտրվել է կեղծված ընտրություններով և չի հանդիսանում լեգիտիմ նախագահ։

3. Վաղը (այսօր-խմբ.) ողջամիտ ժամկետում Ազգային Ժողովին ներկայացնել Սերժ Սարգսյանի իմպիչմենտի նախագիծ։

Վերոնշյալ պայմանների կատարման դեպքում ՔՊ-ն կստորագրի իմպիչմենտի նախագծի տակ և Վանաձորում ինքնաբացարկ կանի հօգուտ ԼՀ-ի՝ ակնկալելով բանակցությունների սկիզբ ԼՀ-ի հետ մեկ կուսակցության մեջ միաձուլվելու շուրջ՝ հանուն մեկ, ուժեղ, իսկական ընդդիմության ձևավորման։

Հ.Գ. Եթե իմպիչմենտի նախագիծ գրելու ժամանակ չունեք, կարող ենք ձեզ փոխանցել 2014 թվականին Նիկոլ Փաշինյանի կողմից գրված և ձեր կողմից չստորագրված իմպիչմենտի նախագիծը»»:

Ի պատասխան ԱԺ պատգամավոր, «Լուսավոր Հայաստան» կուսակցության նախագահ Էդմոն Մարուքյանը, որի եղբայրը գլխավորում է հոկտեմբերի 2-ին Վանաձորում կայանալիք ավագանու ընտրություններում «Լուսավոր Հայաստանի» ցուցակը, ֆեյսբուքյան իր էջում գրեց, որ «Քաղաքացիական պայմանագիր» կուսակցության հայտարարություն-առաջարկն իր մեջ պարունակում է քաղաքական շանտաժի տարրեր:

«Եթե Հայաստանի երրորդ ամենախոշոր քաղաքում, ՀՀԿ-ին միասնաբար հաղթելու համար, ՔՊ-ին խանգարող միակ հանգամանքը իմ՝ Սերժ Սարգսյանի իմպիչմենտի նախագծին միանալու մեջ է, ապա, առանց վարանելու պաշտոնապես հայտարարում եմ՝ եթե մինչև այսօր՝ ժամը 18:00-ն, ՔՊ-ն ի պաշտպանություն Լուսավոր Հայաստանի ինքնաբացարկ հայտարարի Վանաձորի ՏԻՄ ընտրություններում, ապա անմիջապես դրանից հետո՝ ցանկացած պահի, պատրաստ եմ միանալ Նիկոլ Փաշինյանի հեղինակած իմպիչմենտի նախագծի տակ (ինչպես առաջարկվել է ՔՊ-ի կողմից):

Այս պահին մեր գլխավոր խնդիրը պետք է լինի միասնաբար հաղթանակ տանել Հանրապետական կուսակցության նկատմամբ, և մեր բոլորի գործողությունները պետք է միտված լինեն այդ նպատակին: Հավատում եմ, որ այս քայլով մենք սկիզբ կդնենք միասնաբար առավել լայն քաղաքական համագործակցության մեր նպատակների և թիմերի միջև»,- գրել էր Մարուքյանը։