Հանրապետական կուսակցությունը նաև Քոչարյանի տերն է

Ռոբերտ Քոչարյանը հարցազրույց է տվել «Ազատություն» ռադիոկայանին՝ անդրադառնալով ԼՂ խնդրին, տնտեսական գործընթացներին, երկրում ձեւավորված բարոյաքաղաքական մթնոլորտին:

«Այսօր մենք ականատեսն ենք դառնում մի շարք անբարենպաստ գործոնների կուտակման, ինչը լուրջ անհանգստություն է առաջացնում: Ռուսաստանյան զենքի մատակարարմամբ ռազմական հավասարակշռության խախտումը, ԼՂ հարցով միջազգային կազմակերպությունների մի քանի տհաճ բանաձեւերը եւ զեկույցները, Ադրբեջանի նախաձեռնությամբ տարածաշրջանային համագործակցության նոր ֆորմատի ձեւավորումը (իհարկե՝ առանց Հայաստանի), մեր երկիրը շրջանցող «Հյուսիս-Հարավ» տրանսպորտային միջանցքի ստեղծումը: Տեղի ունեցողի աշխարհաքաղաքական հետեւանքները երկարատեւ բացասական ազդեցություն են ունենալու երկրի տնտեսության, միջազգային եւ տարածաշրջանային գործերում մեր կշռի ու ազդեցության եւ իհարկե՝ ԼՂ հարցով բանակցային գործընթացի մեջ ներգործելու մեր ռեսուրսի վրա»,- հայտարարել է Քոչարյանը:

Նա ասել է, թե իր կառավարման տարիներին երկիրը ինտենսիվ զարգանում էր, մենք առաջ էինք անցել Ադրբեջանից թե բարեփոխումներով, թե արտաքին քաղաքական ակտիվությամբ եւ բանակցում էինք, վստահ լինելով, որ ի զորու ենք չեզոքացնել հակամարտության ուժային լուծման ցանկացած փորձ: Գնահատելով Հայաստանում ստեղծված քաղաքական, տնտեսական վիճակը, Քոչարյանը հայտարարել է, որ ոչ մի հուսադրող բան ասել չի կարող: «Մեր վիճակագրությունն այլեւս չի արտացոլում իրական տնտեսական իրավիճակը, իսկ կառավարությունը դադարել է ձեւակերպել եւ ձեւավորել տնտեսական քաղաքականությունը»,- ասել է Քոչարյանը: Նա գնահատել է նաեւ «Սասնա ծռեր» խմբի գործողությունը: Ըստ նրա, հասարակության արձագանքը խմբի գործողություններին դեղին քարտ է երկրի քաղաքական համակարգին: «Այսպիսի երեւույթը հնարավոր չէ արհամարհել եւ դրա հետ պետք է ինչ-որ բան անել, հակառակ դեպքում երկիրը ապրելու է ասես վառոդի տակառի վրա: Պետք են արմատական ռեֆորմներ, մարդիկ պետք է քաղաքական մրցակցություն տեսնեն երկրում եւ փոփոխությունների հնարավորություն՝ լեգիտիմ ընտրական գործընթացի, այլ ոչ թե պետական հիմնարկներ գրավելու եւ պատանդներ վերցնելու միջոցով»,- ասել է Քոչարյանը:

Իշխող ՀՀԿ-ից Քոչարյանին երեկ առաջինը արձագանքեց ՀՀԿ երիտթեւի նախագահ, ԱԺ պատգամավոր Կարեն Ավագյանը: «Ռոբերտ Քոչարյանը հերթական հարցազրույցով աշխարհի ինչ-որ ծայրից կրկին հիշեցրեց իր մասին։ Հավանաբար արդեն նկատելի է Վարդան Օսկանյանի քաղաքական ձեռնարկումների անհեռանկարայնությունը, ինչը ստիպում է Քոչարյանին երեւալու ճիգեր գործադրել»,- ֆեյսբուքյան իր էջում գրեց Ավագյանը։ Նա նշել էր, թե Քոչարյանի հարցազրույցում քողարկված չարախնդություն է տեսել: «Փաստերի սելեկտիվ ընտրությունը գոնե թե դա է վկայում: Անբարենպաստ գործոններ են թվարկվում, որ աչք է ծակում. մատնանշում է՝ «ԼՂ հարցով միջազգային կազմակերպությունների մի քանի տհաճ բանաձեւերը եւ զեկույցները», բա մի քանի շատ հաճելի բանաձեւերն ու զեկույցնե՞րն ուր են:

Մատնանշում է. «մեր երկիրը շրջանցող «Հյուսիս-Հարավ» տրանսպորտային միջանցքի ստեղծումը», կընդունեի, եթե սա ասեր Բաքու-Ջեյհանը կամ Ադրբեջանը Կարսին կապող երկաթուղին Հայաստանով անցկացրած գործիչը: Եվ մշտական «հաղթաթուղթը». «այն տարիներին երկիրը ինտենսիվ զարգանում էր, մենք առաջ էինք անցել Ադրբեջանից..»: Այստեղ միանգամից հարց է առաջանում՝ ինչո՞վ. համեմատե՛ք այն ժամանակվա տնտեսական աճերը Հայաստանի ու Ադրբեջանի միջեւ, համեմատե՛ք աշխատավարձերի մակարդակը, համեմատե՛ք տնտեսական միջավայրի պարամետրեր ու նորից ասեք՝ ինչո՞վ՝ բարեփոխումներո՞վ, ազատություններո՞վ, հա իհարկե, այն տարիներին մենք ավելի քիչ կայքեր ու սոցիալական ցանցեր էինք փակել, քան Ադրբեջանում, դրանում համաձայն եմ...»,- գրել էր Ավագյանը:

ԱԺ նախկին նախագահ, ՀՀԿ պատգամավոր Սամվել Նիկոյանը, անդրադառնալով Ռոբերտ Քոչարյանի հարցազրույցին՝ մեզ հետ զրույցում հայտարարեց, թե 10 տարի առաջ գրանցված տնտեսական զարգացումը միջազգային տնտեսական ոլորտում բարենպաստ իրավիճակի արդյունք էր: «Ռ. Քոչարյանի նախագահության ամբողջ ժամանակահատվածում կառավարության ղեկավարները եղել են ՀՀԿ-ի ներկայացուցիչները, կառավարության եւ ԱԺ-ի մեծամասնականները` նույնպես: Ինչո՞ւ եք տարանջատում»,- ասաց Նիկոյանը: Նկատառմանը, որ Քոչարյանն է տարանջատում, ՀՀԿ-ական պատգամավորը արձագանքեց. «Դրա համար էլ ե՛ւ ձեզ եմ հիշեցնում, ե՛ւ պարոն Քոչարյանին, որ ե՛ւ այն ժամանակ էինք մենք իշխանության, ե՛ւ հիմա: Պարզապես այն ժամանակ աշխարհատնտեսական իրավիճակը բավականին բարենպաստ է եղել, այն ժամանակ մեր կառավարությունը կարողացել է տնտեսական լավ ցուցանիշներ, երկնիշ տնտեսական աճ ապահովել: Իհարկե, մենք կարող ենք այդ նույն երկնիշ տնտեսական աճը շարունակել նաեւ հիմա, եթե տարածաշրջանում լիներ նույնչափ բարենպաստ պայմաններ՝ ՌԴ տնտեսությունը գտնվեր տնտեսական վերելքի մեջ»:

- Պարոն Նիկոյան, Քոչարյանն անդրադարձել է նաեւ «Սասնա ծռեր» խմբի գործունեության արդյունքում ստեղծված իրավիճակին ու հավելել, որ մեր երկրին արմատական ռեֆորմներ են անհրաժեշտ: Ի վերջո իշխանություններն ի՞նչ են անում այդ ուղղությամբ, բացի հայտարարություն անելուց:

- Իշխանությունները եւս գտնում են, որ բարեփոխումների առկա տեմպերն անբավարար են, որ հանրային պահանջն ավելին է: Այսօր իշխանությունը տեսնում է, որ բարեփոխումների հարցում պետք է ընդառաջ գնա հանրության տեսակետներին, բայց դրանք պետք է լինեն ոչ թե ժողովրդահաճո, այլ միայն մեր երկրի կայունությանը, առաջընթացին, մեր քաղաքական իրավիճակի կայունացմանը, վստահության մթնոլորտի բարելավմանն ուղղված քայլեր: Կարծում եմ, այդ քայլերը կլինեն, եւ մեր ժողովուրդը դրա ականատեսը կլինի մոտակա ժամանակներում:

- Նման խոստումներ շատ են տրվել:

- Խոստումներ տրվել են, ու դրանցից շատ բան է իրականացվել, բայց կարծում եմ, հիմա ինչ ասվում է սպասվող բարեփոխումների վերաբերյալ, տեղի կունենա: Իսկ ամենամեծ փոփոխությունները, որն իր մեջ ներուժ է պարունակում, Սահմանադրական փոփոխություններն են, եւ գարնանը տեղի ունեցող ընտրությունների արդյունքում մեր հասարակությունը կստանա իր ցանկացած փոփոխությունները:

- Այդ փոփոխություններն ընդամենը պաշտոնանկություննե՞ր կամ պաշտոնափոխություննե՞ր են լինելու, թե՞ իրական բարեփոխումներ:

- Կարող են եւ պաշտոնական փոփոխություններ լինել, որոնք բերելու են նոր մարդիկ, նոր մտածելակերպ, նոր մոտեցումներ: