Որն է Շիրակի մարզպետի եղբոր՝ Արման Բաղդասարյանի՝ ՔՊ-ից դուրս գալու իրական պատճառը, ինչու է նա վայր դրել մանդատը

Գյումրու ավագանու անդամակցությունը վաղաժամկետ դադարեցնելն ու մանդատը վայր դնելը Արման Բաղդասարյանը համարում է ոչ թե իր, այլ «Քաղաքացիական պայմանագիր» կուսակցության քաղաքական որոշումը։

«Հայկական ժամանակ»-ի հետ զրույցում վերջինս նշում է՝ որոշման պատճառն իրեն անհայտ է։ Հավանաբար իր՝ ավելի վաղ կուսակցությունից դուրս գալն է կարևոր դեր ունեցել այդ հարցում։

Բաղդասարյանը կուսակցության շարքերը լքելու և մանդատն առաջին անգամ վայր դնելու մասին դիմումը դեռ ապրիլի 15-ին էր ներկայացրել։ Հարցին՝ այս պարագայում ինչո՞ւ 9 ամիս անց միայն կայացվեց նման որոշում, ասում է՝ դա իր պատճառն ունի։

«Ես մանդատից հրաժարվելու դիմումը գրել էի դեռևս ապրիլին, սակայն տեխնիկական խնդիր կար, քանի որ պետք էր առձեռն ներկայացնել դիմումը, իսկ ես էլեկտրոնային էի ուղարկել, և էդ ընթացքում շատերը հրճվում էին իմ հրաժարականի դիմում գրելուց։ Հենց ի հեճուկս նրանց էլ առձեռն չտարա»,- մանրամասնում է նա:

Առձեռն դիմումը չի ներկայացրել, սակայն, ըստ մեր զրուցակցի, թիմում եղել են խոսակցություններ առ այն, որ եթե նա կուսակցական չէ, ուրեմն պետք է մանդատից էլ հրաժարվի։ Բաղդասարյանն ընդգծում է՝ եղել է խոսակցություն, բայց ոչ քաղաքական որոշում։

«Ու իմ հարցը ձգձգվեց, մնաց մինչև նոր վարչության ընտրությունը։ Վարչությունն ընտրվեց, սեպտեմբերի վերջ, հոկտեմբերին, ընտրվելուց հետո առաջին կամ երկրորդ նիստում քննարկվել էր իմ հարցը։ Պաշտոնապես իմ հարցի քննարկման պատճառը չգիտեմ։ Կասկածում եմ, որ հենց կուսակցությունից դուրս գալն էր պատճառը, որովհետև չեմ կարծում, որ քաղաքական թիմը նեղվեր, որ ես սուր քննադատության էի ենթարկում քաղաքային իշխանությանը։ Իմ քննադատությունը երբեք չի եղել անձնավորված, եղել են դեպքեր՝ հեգնել եմ, բայց ոչ թե անձանց, այլ անձանց ոչ պրոֆեսիոնալ գործունեությունը»,- ընդգծում է նա:

Վերջինիս խոսքով՝ քաղաքական առաջադրանքը տրված է եղել մարզպետին (- խմբ․ Շիրակի մարզպետ Նազելի Բաղդասարյանը Արման Բաղդասարյանի քույրն է), մարզպետը կանչել է, ասել՝ նման որոշում կա, հարցրել՝ Արման Բաղդասարյանի ասելիքը ո՞րն է։ «Ես, բնականաբար, ժամանակ խնդրեցի մտածելու համար։ Մեկ օր անց հայտնեցի որոշմանս մասին։ Եթե նման քաղաքական որոշում չլիներ, հիմա ես ավագանու անդամ կլինեի, բայց քանի որ մարդիկ իմ թույլ տեղը գիտեն, հենց թիրախին են խփել»,- նշում է նա:

Հարցին՝ ո՞րն է այդ թիրախը, շեշտում է՝ իր՝ մանդատից ու աթոռից կառչած չլինելու սկզբունքայնությունը։

«Կան սկզբունքներ և արժեքներ, որոնք երբեք չարժե փոխել որևէ մանդատի կամ աթոռի հետ։ Քանի որ էն ժամանակ մենք չհաղթեցինք (- խմբ․ նկատի ունի Գյումրու ՏԻՄ ընտրությունները), ու ես էի լինելու փոխքաղաքապետը, քանի որ թիմին լավ ծանոթ չէի, ինքս ինձ ապահովագրելու համար կողմ էի քաղաքական պատասխանատվության սկզբունքին։ Այսինքն՝ ինչ-որ մի էտապում եթե դու համաձայն չես քաղաքական թիմի որոշումների հետ, եթե դու այլ հայացքներ ունես ու ինքնուրույն ես որոշում, որ պետք է արտաքին քաղաքականությամբ զբաղվես, ապա դա պետք է անես էդ քաղաքական թիմից դուրս, այսինքն՝ դիր մանդատդ, գնա։ Ես էս թեզին կողմ էի, ու այդ մասին գիտեին»,- պարզաբանում է Արման Բաղդասարյանը։

Նա նաև նկատում է, որ եկել է ժամանակ, ու իր այդ թեզն իր դեմ է դուրս եկել. ճիշտ չէր լինի՝ եթե ասեր, թե դա իրեն չի հետաքրքրում, այլապես կստացվեր, որ կողմ է ընտրովի արդարությանը։

«Ինչպես կարող ես մի սկզբունք առաջ քաշես ու մի տարի անց ասես՝ չէ, եկեք իմ պարագայում չկիրառենք։ Անհնար բան է։ Բայց եթե չլիներ նման քաղաքական որոշում, կուզեի շարունակել գործունեությունս որպես ավագանու անդամ, քանի որ, իմ կարծիքով, ուժերիս ներածին չափով քաղաքին օգուտ էի տալիս»,- կարծում է նա:

Նկատառմանը՝ եթե կար նման սկզբունք, սպասելի պետք է լիներ նաև կուսակցությունից դուրս գալու պարագայում ավագանու անդամի մանդատը վայր դնելու հավանականությունը, Բաղդասարյանը համաձայնում է, միաժամանակ բացահայտում, թե ինչի համար է «Քաղաքացիական պայմանագրից» դուրս գալու դիմում ներկայացրել։

«Ճիշտն ասած՝ կուսակցությունից դուրս գալուս միակ պատճառն ուշադրություն գրավելն էր, որովհետև Գյումրին հետին պլան էր մղված այդ ժամանակ: Ես ուզեցի, որ կրկին քաղաքը հայտնվեր ուշադրության կենտրոնում, բայց, ցավոք, ոչ մեկին դա չհետաքրքրեց»,- ասում է նա:

Հարցին՝ ունի՞ լուրջ տարաձայնություններ «Քաղաքացիական պայմանագիր» կուսակցության անդամների հետ, վերջինս բացասական պատասխան է տալիս. «Եթե ես ՔՊ-ի հետ լուրջ անհամաձայնություն ունենայի, ուղիղ 20 օր հետո Հոռոմի խաչմերուկին կանգնած չէի լինի։ Էն ժամանակ, երբ որ ես էնտեղ կռիվ էի տալիս, էստեղի ՔՊ-ականները տաք տեղները նստած ստատուսներ կգրեին, թե Շիրակի մարզը ցույց տվեց իր դեմքը։ Դեմք ցույց տվող էիք, գայիք, կողքերս կանգնեիք»։

Ավագանու կազմում Արման Բաղդասարյանին, ըստ ընտրացուցակի, պետք է փոխարինի մասնագիտությամբ ատամնաբույժ Վահագ Մկրտչյանը։

Նկատենք, որ Գյումրու համայնքապետարանի պաշտոնական կայքում առկա տվյալով, սակայն, Արման Բաղդասարյանը դեռ «Քաղաքացիական պայմանագիր» խմբակցության ավագանու անդամ է։