ՔՊ-ն և «Հայկական երազանք»-ը տապալեցին Անի խոշորացված համայնքի նորընտիր ավագանու անդրանիկ նիստը․ համայնքապետ չընտրվեց

Քվորում չլինելու պատճառով այսօր Շիրակի մարզի Անի խոշորացված համայնքի նորընտիր ավագանու առաջին նիստը չկայացավ։ ՏԻՄ ընտրությանը մասնակցած երեք ուժերից՝ «Քաղաքացիական պայմանագիր», «Հայկական երազանք» և «Ազգ-համայնք» դաշինք, նիստին ներկա էր միայն «Ազգ-համայնք» դաշինքը, մյուսները չէին ներկայացել։ 

Ըստ ընթացակարգի՝ «Ազգ-համայնք» դաշինքը մեկ ժամ սպասեց, որպեսզի մյուս ուժերը ներկայանան նորընտիր ավագանու անդրանիկ նիստին, ինչը, սակայն, տեղի չունեցավ։ Հաջորդ նիստը նշանակվեց երկուշաբթի՝ նոյեմբերի 14-ին։

Բոյկոտի հետևանքով Անի խոշորացված համայնքն այսօրվանից չունի ղեկավար, քանի որ նոյեմբերի 11-ից օրենքի ուժով դադարեց գործող համայնքապետ Արտակ Գևորգյանի պաշտոնավարման ժամկետը։ Նկատենք, որ Գևորգյանը ներկայացնում է «Ազգ-համայնք» դաշինքը։

Նիստին ներկա Շիրակի մարզպետարանի պատասխանատուն փաստեց՝ դժվար իրավիճակի առաջ են կանգնել, քանի որ ներկա պահին օդում առկախ մնաց համայնքի ղեկավարի հարցը։

«Լիազորությունների ժամկետն ավարտված համայնքի ղեկավարն իրավունք չունի նման գործառույթ իրականացնել։ Քանի դեռ Կառավարության կողմից չի նշանակվել համայնքի ղեկավարի պաշտոնակատար, փաստացի Անի համայնքը չի ունենա ղեկավար»,- ասաց Վաղինակ Հովհաննիսյանը։

Մեկ տարբերակ, սակայն, քննարկվել է. եթե համայնքն ունի ղեկավարի տեղակալ, հնարավոր է՝ կարողանա որոշակի գործառույթներ իրականացնել, որպեսզի խոշորացված համայնքի բնականոն կյանքը կոլապսի չենթարկվի՝ մինչև պաշտոնակատարի նշանակումը: Ինչը, ըստ պատասխանատուի, սարերի հետևում չէ։

Եթե երկուշաբթի օրը Անի խոշորացված համայնքում կրկին համայնքապետ չընտրվի, կտրամադրվի երկշաբաթյա ժամկետ, որի անարդյունք ավարտի պարագայում ավագանու լիազորությունները վաղաժամկետ կդադարեցվեն, և կնշանակվեն արտահերթ ընտրություններ։

««Ազգ-համայնք» դաշինքը, ժողովրդից ստացած վստահության քվեն հաշվի առնելով, իր պարտավորությունը կատարեց ու մասնակցեց նիստին, մյուս ուժերի մասով չեմ կարող մեկնաբանել: Օրենքի բարդությունն այնտեղ էր, որ համայնքի ղեկավար ընտրվելու համար անհրաժեշտ է 50 + ձայն, մենք ունենք 49․44: Մյուս ուժերի այսօրվա բոյկոտը միայն ու միայն մեր հաղթանակը ոչնչացնելու մեջ էր։ Եթե իրենց մասնակցությունը լիներ, կընտրվեր համայնքի ղեկավար։ Չեկան այդ ուժերը: Ես սա թուլության նշան եմ համարում»,-լրագրողների հետ զրույցում ասաց «Ազգ-համայնք» դաշինքը ղեկավարող Արտակ Գևորգյանը:

Նկատենք, որ սեպտեմբերի 25-ին տեղի ունեցած ՏԻՄ ընտրություններից հետո ստեղծված իրավիճակում Անի խոշորացված համայնքում երեք քաղաքական ուժն այդպես էլ ընդհանուր համաձայնության չեկավ դաշինք կազմելու հարցում։ Գևորգյանը մեկ անգամ ևս ընդգծեց՝ ինքը հենարանի կարիք չունի, իր համար կարևորը ժողովրդի քվեն է:

Հարցին՝ այնուամենայնիվ, պատրա՞ստ էր աշխատել մյուս քաղաքական ուժերի հետ, ասաց՝ դա բանակցային գործընթաց է, և եթե արվեր ի շահ քաղաքացու և Հայաստանի Հանրապետության, խնդիր չէր տեսնի։

«Բայց եթե արվում է աթոռների բաշխման կամ գործընթացներ տապալելու համար, ինձ համար անցանկալի է։ Այլ հարց, եթե լիներ առողջ տրամաբանություն հանուն ժողովրդի։ Մենք մեկ սկզբունք ենք ունեցել և ունենք՝ ծառայել ժողովրդին։ Հատկապես այսօր խիստ կարևորում ենք ներքին խռովությունների ընդվզումները սահմանափակելը։ Եվ հիմա մեր մարտահրավերը արտաքին թշնամու դեմ պայքարն է, ոչ թե իրար մեջ թշնամի որոնելը»,- նշեց Արտակ Գևորգյանը։

Նոր ընտրություններից Գևորգյանը չի վախենում, սակայն համայնքի զարգացման տեսանկյունից այս ժամանակահատվածը լուրջ հապաղում է համարում։

Հիշեցնենք՝ Անի խոշորացված համայնքում 2022 թվականի սեպտեմբերի 25-ին տեղի ունեցած ՏԻՄ ընտրություններին մասնակցած երեք ուժերից ոչ մեկին չէր հաջողվել 50 տոկոսից ավելի ձայն ստանալ։ Մանդատների ընդհանուր թիվը 21-ն է. «Ազգ-համայնք» դաշինքն ունի 10, ՔՊ-ը՝ 8, իսկ «Հայկական երազանքը»՝ 3 մանդատ։

Սամսոն Մատինյան