Գրքում ես եմ, ընկերներս, հայրենիքս. տեղի ունեցավ գրող Վովա Արզումանյանի «Ճաքած պատերի լուսանցքից» ժողովածուի շնորհանդեսը

Արմատներով արցախցի երիտասարդ գրող Վովա Արզումանյանի «Ճերմակ կարոտ», «Խաղաղությունն ու ես», «Բանակի տղան», «Հետդարձից առաջ» գրքերի շղթային միացավ «Ճաքած պատերի լուսանցքից» ժողովածուն:

Շնորհանդեսը կայացավ Ե. Չարենցի անվան գրականության և արվեստի թանգարանում:

Բացման խոսքում Եղիշե Չարենցի անվան գրականության և արվեստի թանգարանի տնօրեն Վահագն Սարգսյանը ողջունեց ներկաներին, շնորհավորեց գրողին ու ընթերցողներին՝ վստահեցնելով, որ դեռ երկար գրական ճանապարհ ունի անցնելու Վովա Արզումանյանը:

Գրքի խմբագրի՝ բանասիրական գիտությունների դոկտոր, պրոֆեսոր Լաուրա Մուրադյանի խոսքով՝ թեև սա երիտասարդ գրողի հինգերորդ գիրքն է, սակայն Վովան արդեն ունի գրողական կարևոր որակներ, և շատ լուրջ հայտ է:

«Ես համոզված եմ, որ Վովա Արզումանյանի ներուժը դեռ պետք է բացահայտվի»,- հավելեց նա: Գրքի խմբագրի խոսքով՝ Վովայի արձակը նույնքան ինքնատիպ է, որքան պոեզիան:

^{Բանասիրական գիտությունների դոկտոր, պրոֆեսոր Լաուրա Մուրադյանը}

Հայաստանի արվեստի վաստակավոր գործիչ, կինոգետ, գրող Դավիթ Մուրադյանի խոսքով էլ՝ ուրախալի է, որ երիտասարդ գրողի գրքի շուրջ տասնյակ մարդիկ են հավաքվել, որը եզակի երևույթ է: «Այսպիսի բարդ, հակասական ժամանակներում, երբ կարծես գիրքը, գրականությունը, բանաստեղծությունը պիտի «համեստորեն նահանջեն» և սպասեն իրենց ժամին, այս դեպքում չի սպասել, այլ համարձակություն է ունեցել կրկին ներկայանալ ընթերցողին»,- նշեց Դավիթ Մուրադյանը՝ հավելելով, որ Վովա Արզումանյանն ունի հետաքրքիր պոետական ուրվապատկերներ:

^{Հայաստանի արվեստի վաստակավոր գործիչ, կինոգետ, գրող Դավիթ Մուրադյանը}

Հայաստանի գրողների միության անդամ, բանաստեղծուհի, Եղիշե Չարենցի անվան գրականության և արվեստի թանգարանի գիտաշխատող Գոհար Գալստյանի խոսքով էլ՝ հրաշալի գրքի հետ գործ ունենք: Գոհար Գալստյանը նշեց, որ ռիթմով, թեմաների շարունակականությամբ Վովա Արզումանյանը որքան զգայուն արձակագիր է, նույնչափ էլ պոեզիայի մեջ զգայուն է:

«Գրքի հիմնական բաղադրիչը կարոտն է՝ մանկության տնից մինչև աղոթատուն, երկրից մինչև երկինք»,- նշեց Գոհար Գալստյանը:

^{Հայաստանի գրողների միության անդամ, բանաստեղծուհի, Եղիշե Չարենցի անվան գրականության և արվեստի թանգարանի գիտաշխատող Գոհար Գալստյանը}

Արցախի հանրային հեռուստառադիոընկերության լրագրող Վարդուհի Բաղդասարյանն էլ հիշեց տարիներ առաջ իր հեղինակային «Առագաստ» հաղորդաշարի շրջանակներում Վովա Արզումանյանի ծավալուն հարցազրույցը: Լրագրողը այդ ժամանակ փորձել է հարցերով «նեղել» դեռ պատանի ստեղծագործողին, սակայն նա ունեցել է իր պատասխաններն ու այդ ամենի մեջ բառի հանդեպ վերաբերմունքը:

«Հաճախ եմ մտածում՝ ե՞րբ և որտեղի՞ց սկսվեց ամեն ինչ… արդյոք ես գիտե՞մ իմ հարցի պատասխանը: Երևի՝ ոչ, պատասխանողը ժամանակն է…: Երբեք չեմ փորձել գրել այնպիսի բաների մասին, որոնք մեծ կամ փոքր են ինձանից, հեռու կամ շատ մոտ են…: Երբ երկիրդ քո գրկում է, դու՝ երկրիդ, ու երբ ընկերդ դառնում է քարե երջանկություն, եղբայրդ՝ լույս, վանքդ ավերում են աչքիդ առաջ, մնում է միայն մի բան՝ մտածել, մտածել, մտածել…:

«Ճաքած պատերի լուսանցքից» գրքում տեղ գտած ստեղծագործություններում ես եմ, ընկերներս, Արցախս, Հայաստանս, հող հայրենիի արժեքն իմացող հայը…, և սա կենսագրություն է՝ հայրենիքից դեպի սեր ձգվող, բոլորիս ցավի, ապրումների ու սպասումի: Սպասում, որը չի ծերանում…:

^{Երիտասարդ գրող Վովա Արզումանյանը}

Երբ պատերազմից հետո գիրք հրատարակեցի, անընդհատ փնտրտուքների մեջ էի՝ ի՞նչ վերնագրեմ: Ինքս ինձ հետ կռիվ տալով՝ վերանգրեցի՝ «Հետդարձից առաջ»: Իսկ հետո՞: Կլինի՞ հետդարձից հետոն. անընդհատ այս հարցը տանջում էր ինձ: Երկար ժամանակ էր պետք՝ հարցիս պատասխանելու համար, բայց Արցախն ինձ ուժ տվեց, հասկացրեց, որ հետդարձից հետո ամեն ինչ այլ կլինի: Եվ ինձ համար սրբացած Արցախում արմատներս հուշում էին, որ պետք չէ ընկրկել…, և ես երդվեցի գրել, գրել ու էլի գրել…:

Գրում եմ իմ ընկերների, եղբայրների մղած հերոսական պայքարի շնորհիվ, նրանց պարգևած լուսաբացի շնորհիվ: Ցավոք, այս պատերազմում կորցրի շատ մարդկանց՝ ընկերներ, եղբայր, հարևաններ, թանկ ու հարազատ հայրենակիցներ…:»,- նշեց գրքի հեղինակը՝ Արցախի, Հայաստանի և Կալիֆոռնիայի հայ գրողների միության անդամ, գրող Վովա Արզումանյանը:

Գինեձոնի արարողության պատիվը տրվեց գրքի հեղինակին և նրա ընկերոջը՝ Արցախի հերոս Էդգար Մարկոսյանին:

^{Արցախի հերոս Էդգար Մարկոսյանը և գրող Վովա Արզումանյանը}

Շնորհանդեսի ժամանակ Վովա Արզումանյանի ստեղծագործություններից կարդացին դերասաններ, երաժշտական կատարումներով հանդես եկավ մեներգչուհի Աննա Մովսեսյանը: