Չեն կարող լկտի պահվածքով մեկին ուղարկել ԱԺ. լրագրողները պետական մարմիններում հնարավոր է՝ զրկվեն հավատարմագրումից

Պետական մարմիններում հավատարմագրված լրագրողն աշխատանքային գոտում սահմանված կանոնները խախտելու դեպքում հնարավոր է՝ զրկվի հավատարմագրումից:

Սա սահմանվելու է «Զանգվածային լրատվության մասին» օրենքում լրացում կատարելու մասին նախագծով, որը հեղինակել են «Քաղաքացիական պայմանագիր» խմբակցության քարտուղար Արթուր Հովհաննիսյանը և նույն խմբակցության պատգամավոր Լիլիթ Մինասյանը:

Ըստ նախագծի՝ լրագրողին հավատարմագրումից զրկելու է այն պետական մարմինը, որտեղ նա խախտել է սահմանված կանոնները:

«Հայկական ժամանակի» հետ զրույցում Արթուր Հովհաննիսյանը պարզաբանում է՝ մինչև այսօր օրենքի շրջանակներում չկա որևէ մեխանիզմ, որը լրագրողի՝ պետական մարմնում էթիկայի կանոնների կամ կարգապահական կանոնների խախտման դեպքում որևէ լուծում կառաջարկի: Նախագծի մշակման անհրաժեշտությունն առաջացել է՝ այդ բացը լրացնելու համար:

«Զանգվածային ազատության մասին լրատվության օրենքում բաց կա՝ պետական մարմինների և լրատվամիջոցների միջև փոխգործակցության առումով: Օրենքը սահմանում է, որ պետական մարմինները կարող են սահմանել լրագրողների հավատարմագրման մերժման և բացահայտման հիմքերը: Այսինքն՝ պետական մարմինները գործնականում հնարավորություն չունեն կեսից դադարեցնել լրագրողի հավատարմագրումը, եթե անգամ լրագրողն անում է ցանկացած բան, որը օրենքից դուրս է, խախտում է կանոնները»,- նկատում է պատգամավորը:

Հովհաննիսյանի խոսքով՝ նշված օրենքի կետերը նաև հակասում են միմյանց: Օրենքի մեկ այլ հոդվածում ասվում է՝ լրագրողի հավատարմագրման դադարեցումը հնարավոր է միայն նրան հավատարմագրման ներկայացրած լրատվամիջոցի դիմումով, սակայն այս դեպքում լրատվամիջոցը չի ներկայացնում դիմումը:

«Օրինակ՝ այսօրվա դեպքով, երբ «Հրապարակ» օրաթերթի կողմից որպես լրագրող հավատարմագրված Վահե Մակարյանը «Քաղաքացիական պայմանագիր» խմբակցության պատգամավորի հասցեին հնչեցրել էր սպառնալիքներ և վիրավորանք պարունակող արտահայտություններ: Նրա հավատարմագրման հետ ոչինչ անել հնարավոր չէ, քանի դեռ լրատվամիջոցը, որտեղ նա աշխատում է, տվյալ լրագրողի հավատարմագրումը դադարեցնելու համար դիմում չի ներկայացրել: Բոլորս հասկանում ենք, որ լրատվամիջոցը այդ դիմումը չի ներկայացնելու: Այսինքն՝ պետական մարմիների և լրատվամիջոցների միջև փոխգործակցության մասով առաջանում է խնդիր: Այսօրվա օրինակը այն վառ օրինակներից է, որը մեր տրամաբանության մեջ չի տեղավորվում»,- ասում է ՔՊ քարտուղարը:

Նշենք, որ այսօր դատապարտող հայտարարությամբ էր հանես եկել նաև «Քաղաքացիական պայմանագիր» խմբակցությունը՝ հայտնելով, որ վերոնշյալ լրագրողը պատգամավոր Վահագն Ալեքսանյանի հասցեին հնչեցրել է սպառնալիքներ և վիրավորանք պարունակող արտահայտություններ։ Խմբակցությունից, սակայն, չէին մանրամասնել, թե կոնկրետ ի՞նչ խոսակցություն է տեղի ունեցել:

«Զանգվածային լրատվության մասին» օրենքում լրացում կատարելու մասին նախագծի հետ կապված որոշ շրջանակներ արդեն կարծիքներ են հայտնել, այդ թվում՝ նաև բացասական, ասում է Արթուր Հովհաննիսյանը: Նրա խոսքով՝ այդ շրջանակների գլխավոր նպատակը ԱԺ-ում այսօրվա միջադեպերի նման միջադեպեր ստեղծելն է:

«Այս նախագիծը հնարավորություն է տալու լկտի պահվածքով լրագրողների մուտքը սահմանափակել կամ առհասարակ արգելել պետական մարմիններ: Սակայն, եթե հավատարմագրումը դադարեցված լրագրողը, կամ նրա կազմակերպությունը դեմ է դադարեցմանը, կարող է օրենքով սահմանված կարգով արտահայտել իր բողոքը: ՀՀ-ում գործում են բոլոր մեխանիզմները՝ որոշումները բողոքարկելու համար»,- ասում է պատգամավորը:

Հովհաննիսյանը նաև ընդգծում է՝ որևէ լրագրողի հավատարմագրումից զրկելը չի նշանակում, որ լրատվամիջոցն այլևս իրավունք չունի լրագրող հավատարմագրել պետական մարմիններում, այն իրավունք ունի այլ լրագրողի ներկայացնել հավատարմագրման:

«Զանգվածային լրատվության մասին» օրենքում լրացում կատարելու մասին նախագիծը շրջանառության մեջ է, պետք է անցնի առաջարկությունների փուլը, այնուհետև քննարկվի համապատասխան հանձնաժողովում, որից հետո ներկայացվի լիագումար նիստերի դահլիճ:

Մերի Խաչատրյան