Լավ է քաղաքական գործիչը լինի գյուղերում, քան սոցցանցում. Սեդա Սաֆարյանը՝ քաղաքականություն մտնելու, Մարտի 1-ի գործի մասին

Մարտի 1-ի գործով տուժողների իրավահաջորդների ներկայացուցիչ, փաստաբան Սեդա Սաֆարյանը մասնակցելու է հունիսի 20-ին կայանալիք արտահերթ խորհրդարանական ընտրություններին: Սաֆարյանը ներկայանալու է ԱԺ անկախ պատգամավոր Արման Բաբաջանյանի «Հանուն Հանրապետության» կուսակցության ցուցակով, սակայն կուսակցության անդամ չէ: Արտահերթ խորհրդարանական ընտրությունների, իր՝ քաղաքականությունը չսիրելու, Մարտի 1-ի գործի եւ այլնի մասին ՀԺ-ն զրուցել է Սեդա Սաֆարյանի հետ:

- Տիկին Սաֆարյան, ինչո՞ւ որոշեցիք մասնակցել այս ընտրություններին եւ ինչո՞ւ հենց «Հանուն Հանրապետության» կուսակցության ցուցակով: Քննարկումները պարոն Բաբաջանյանի հետ երբվանի՞ց էին սկսվել:

- Մոտ մեկ ամիս է, ինչ քննարկումները սկսվել էին: Ըստ էության, այս իրավիճակում, կոնկրետ ինձ համար ամենահարմար կուսակցությունը «Հանուն Հանրապետությանն» է: Մեր միջեւ երկար քննարկումներ են տեղի ունեցել:

- Ձեզ քաղաքականության մեջ երբեւէ պատկերացրե՞լ եք, ցանկանո՞ւմ էիք զբաղվել քաղաքականությամբ:

- Անկեղծ ասած, ես չէի պատկերացնում ինձ քաղաքականության մեջ: Ես իրավաբան եմ, սիրում եմ իմ մասնագիտությունը, շատ նպատակներ ունեի իմ մասնագիտության ու աշխատանքի հետ կապված՝ իրավունք, պատիժ, պատասխանատվություն... Բայց ժողովրդի հետ հանդիպումների ժամանակ շատերն ասում էին, որ պետք է լինեմ ԱԺ-ում, խորհրդարանում խայտառակ վիճակ է օրենսդրական բացերի առումով, կա ռեֆորմներ անելու անճարություն, ես կարծում եմ՝ այնտեղ մենք անելիք ունենք: Առավել եւս, եթե մեր խմբում լինեն նաեւ այլ իրավաբաններ: Պետք է գնալ ԱԺ եւ քրտնաջան աշխատել: Բայց ես էլի շարունակելու եմ իմ գործունեությունը, ես քաղաքական գործիչ չեմ:

- Այլ կուսակցություններից ստացե՞լ եք առաջարկներ:

- Այո, ստացել եմ, բայց չեմ կարող հրապարակել, թե որ կուսակցություններից: Չեմ ընդունել հրավերները, քանի որ ինձ հոգեհարազատ չեն եղել:

- «Հանուն Հանրապետություն» կուսակցությունը դաշինք կազմելո՞ւ է, կա՞ն քննարկումներ:

- Լինում են հանդիպումներ պարոն Բաբաջանյանի հետ, բայց չեմ կարող նշել, թե որ ուժերի հետ, քանի որ դա իմ գործառույթը չէ, այդ մասին պետք է Արման Բաբաջանյանը խոսի: Իհարկե, մենք քննարկումներ ունենում ենք, կարծիքներ փոխանակում ենք, բայց դեռեւս ամբողջական պատկեր չկա: Կարծում եմ՝ մինչեւ 10 օրվա մեջ ավելի պարզ կլինի:

- Տիկին Սաֆարյան, ո՞ր ուժերին կցանկանայիք տեսնել «Հանուն Հանրապետության» կուսակցության հետ մեկ դաշինքում:

- Կուզենայի տեսնել Դավիթ Սանասարյանին, ինչպես նաեւ Նորայր Նորիկյանին իր՝ «Արդար Հայաստան» կուսակցությամբ, ես տեսնում եմ իրենց աշխատանքը:

- Ձեր եղբայրը՝ Ստյոպա Սաֆարյանը, քաղաքական մեկնաբան է, եղել է նաեւ ԱԺ պատգամավոր, այժմ Հանրային խորհրդի նախագահն է: Արդյոք պարոն Սաֆարյանին է՞լ կարող ենք տեսնել նախընտրական ցուցակներում, առաջարկներ ունի՞:

- Այո, ունի առաջարկներ, բայց չեմ կարող ասել, թե նա ինչ կորոշի: Առաջիկա մեկ շաբաթվա մեջ նա էլ կորոշի, թե ինչ է անելու: Ստյոպայի մեջ հոգնածություն ու հիասթափություն կա, ինքն էլ է մտածում, որ պետք է գնա մի տեղ ու բարձրաձայնի հարցեր: Բայց եթե պետք է գնաս, նույն տեղում դոփես, իմաստ չկա: Այնպիսի խմբի հետ պետք է աշխատես, որ կարողանա լուրջ փոփոխություններ մտցնել:

- Քաղաքական գործիչների առօրյայի շատ կարեւոր մաս են կազմում սոցիալական ցանցերը, սակայն Դուք ոչ մի սոցիալական ցանցում չկաք գրանցված: Ապագայում Ձեզ կտեսնե՞նք որեւէ օնլայն հարթակում, թե՞ շարունակելու եք Ձեր գործունեությունը ծավալել օֆլայն տիրույթում:

- Ես գտնում եմ, որ այսօրվա կոնֆլիկտային իրավիճակներում կա սոցցանցերի դերը: Հազար ձեւի լսարան կա, որտեղ դու կարող ես երեւալ, էլ չեմ ասում, որ ավելի լավ է քաղաքական գործիչը երեւա մի հեռավոր գյուղում, քան՝ սոցցանցերում: Ես պետք է գործնական քայլեր անեմ, մարդու հեղինակությունն իր արած գործերով է երեւում:

- Պատգամավոր ընտրվելու դեպքում, ամենայն հավանականությամբ կլինեք Պետաիրավական հարցերի հանձնաժողովում, քանի որ մասնագիտությամբ իրավաբան եք: Արդեն մտածե՞լ եք, թե ի՞նչ նախագծեր եք առաջարկելու:

- Այո, կլինեմ այդ հանձնաժողովում: Ես իրավաբան եմ եւ շատ լավ գիտեմ, թե մեր օրենսդրության մեջ ինչ բացեր կան: Լուրջ աշխատանքները, վերափոխումները պետք է դառնան ծրագիր, եւ այդ ծրագրերը պետք է ներկայացվեն հանրությանը: Վերջերս էլ տեսաք, ինչ նորմի կպանք՝ ասեցին՝ հակասահմանադրական է: Ես գտնում եմ, որ ՀՀ օրենսդրությունը լուրջ վերանայման կարիք ունի ու դրա վերանայման ձեւաչափը մենք կընտրենք:

- Տիկին Սաֆարյան, Դուք Մարտի 1-ի գործով տուժողների իրավահաջորդների ներկայացուցիչ եք, ավելի վաղ մեզ հետ զրույցում նշել էիք, որ պատրաստվում եք բողոքարկել Երեւան քաղաքի ընդհանուր իրավասության դատարանի՝ Ռոբերտ Քոչարյանի եւ մյուսների նկատմամբ քրեական հետապնդումը դադարեցնելու վերաբերյալ որոշումը: Արդյոք շարունակելո՞ւ եք զբաղվել այդ գործով:

- Ես կհասցնեմ ե՛ւ բողոքարկել ե՛ւ Եվրոպական դատարան դիմել: Պատգամավոր դառնալուց հետո ես, բնականաբար, չեմ կարող դրանով զբաղվել, բայց իմ ուղարկած գործերն արդեն քննության առարկա կդառնան: Ոչինչ չի խոչընդոտում, որ իմ գործը շարունակողի հետ ես խորհրդակցեմ՝ այս գործի հետագա ընթացքի վերաբերյալ, ես չեմ կտրվի այս գործից ու ամեն բան կանեմ, որպեսզի հասնենք արդարության: Ես շատ մեծ պլաններ ունեմ այս մեծ գործընթացի եւ դրա հետագա զարգացումների հետ:

ԱՆՅՈՒՏԱ ԱԹԱՆԵՍՅԱՆ