Փաշինյանը ցույց տվեց, որ միաժամանակ կարող է լինել և՛ իշխանություն, և՛ հեղափոխական. Kommersant

Հայաստանի վարչապետ Նիկոլ Փաշինյանը մարտի 1-ին հաղթեց ընդդիմության հետ փողոցային դիմակայությունը: Երևանում նրա հրավիրած երեկոյան հանրահավաքը շարունակվեց գիշերային քայլերթով, որն անձամբ ղեկավարում էր պարոն Փաշինյանը: Այդ օրը Կառավարության ղեկավարը հակագրոհ ձեռնարկեց ընդդիմադիրների վրա և ցույց տվեց, որ կարող է լինել իշխանություն, միաժամանակ հեղափոխական պայքար մղել հակառակորդների դեմ:

Նիկոլ Փաշինյանին հաջողվում է իրականացնել անհնարինը քաղաքականության մեջ: Իշխանություն ունենալով երկրում՝ նա անհրաժեշտության դեպքում ակնթարթորեն մտնում է հեղափոխականի դերի մեջ: Եվ այս մոգությունն աշխատում է: Մարտի 1-ին նրա կոչով տասնյակ հազարավոր կողմնակիցներ հնազանդ հավաքվեցին մայրաքաղաքի Հանրապետության հրապարակում:

Այդ օրը նրանք այդտեղ էին պետք պարոն Փաշինյանին: Վարչապետի ակցիային գրեթե միաժամանակ խորհրդարանի առջև հանրահավաք էր անցկացնում «Հայրենիքի փրկության շարժման» շուրջ համախմբված ընդդիմությունը: Նիկոլ Փաշինյանի համար կարևոր էր ցույց տալ, թե ում կողմն է աջակցությունը: Եվ դա աշխատեց. Հանրապետության հրապարակի բազմությունն ավելի տպավորիչ էր, քան հակակառավարական ցույցը:

Վարչապետը Կառավարության շենքից հրապարակ մտավ անվտանգության միջանցքով, որը նախապես ստեղծել էր ոստիկանությունը: Նա բարձրացավ բեմ և ավելի քան մեկ ժամ ղեկավարեց բազմությանը՝ ստիպելով նրան կա՛մ հավանություն տալ գոռալով, կա՛մ բարկացած սուլել, կա՛մ էլ լռել: Դա նման էր հիպնոզի և ամենից շուտ հիշեցնում էր 2018-ի թավշյա հեղափոխության հանրահավաքները:

«Եթե չիմանաս, որ բեմից խոսում է մի մարդ, որը երեք տարի ղեկավարում է երկիրը, կարող ես մտածել, թե պայծառ հռետորը ընդդիմության առաջնորդն է, որը ժողովրդին հանում է ռեժիմի դեմ պայքարի»,- գրում է պարբերականը:

Այն փաստը, որ ինքն իշխանություն է, պարոն Փաշինյանը հասկացնել տվել միայն մեկ անգամ՝ ելույթի սկզբում ներողություն խնդրելով իր թույլ տված սխալների համար: Ապա, ի հիշատակ Ղարաբաղյան վերջին պատերազմում զոհվածների, խնդրեց բոլորին միացնել իրենց բջջային հեռախոսների լապտերները, և հրապարակը փայլատակեց լույսերով: Ելույթի մնացած մասն արդեն ոչ թե Փաշինյան-վարչապետն էր խոսում, այլ Փաշինյան-հեղափոխականը:

Հայաստանում, ըստ նրա, միայն ժողովուրդը կարող է որոշել, թե ով պետք է լինի իշխանության: Սա պատասխան էր իր պաշտոնանկության մասին ընդդիմության և Գլխավոր շտաբի սպաների պահանջներին, որոնք վարչապետը անվանեց «ժողովրդից իշխանությունը խլելու փորձ»:

Վարչապետի հրաժարականը պահանջող Գլխավոր շտաբին Նիկոլ Փաշինյանը մեղադրեց ռազմական հեղաշրջման փորձի մեջ: Նա վստահեցրեց ժողովրդին, որ զինվորականների հայտարարությունն արվել է Հայաստանի նախկին նախագահ Սերժ Սարգսյանի դրդմամբ:

Դրա համար վարչապետը Գլխավոր շտաբի պետ Օնիկ Գասպարյանին անվանեց «դավաճան»՝ նրան մեղադրելով Սերժ Սարգսյանի հրամանը կատարելու համար:

Ըստ Նիկոլ Փաշինյանի՝ Օնիկ Գասպարյանը պետք է հրաժարական տա, իսկ հայտարարությունը ստորագրած մյուս գեներալները կարող են հրաժարվել այդ գաղափարից ու վերադառնալ ծառայության՝ նախապես վստահեցնելով, որ նրանց ոչինչ չի սպառնում:

Վարչապետը հույս հայտնեց, որ նախագահ Արմեն Սարգսյանը, որը նախօրեին վերադարձրել էր Գլխավոր շտաբի պետին պաշտոնանկ անելու իր միջնորդագիրը, ի վերջո կկայացնի որոշում, որը կհամապատասխանի «պետության շահերին»:

Բազմությանը, որն ագահաբար կլանում էր նրա յուրաքանչյուր խոսքը, պարոն Փաշինյանը լուր հայտնեց: Այս տարվա հոկտեմբերին տեղի կունենա սահմանադրական հանրաքվե՝ կառավարման կիսանախագահական ձևին վերադառնալու համար: 2015-ին ընդունված և երեք տարի առաջ ուժի մեջ մտած Սահմանադրությունը, ըստ վարչապետի, բացահայտեց հսկայական թերություններ, այն ստեղծում է ճգնաժամային իրավիճակների ռիսկեր:

Կառավարության ղեկավարը կարծում է, որ ներկա ճգնաժամը կարող է կարգավորվել արտահերթ խորհրդարանական ընտրությունների միջոցով: Վարչապետը հավաստիացրեց, որ ինքն ու իր թիմը պատրաստ են այդ քայլին, եթե խորհրդարանական ընդդիմությունն իրենց հետ հուշագիր ստորագրի:

Նա չնշեց, թե ինչպես է նախաձեռնելու խորհրդարանի լուծարումը: Սահմանադրության համաձայն՝ արտահերթ ընտրությունների համար վարչապետը պետք է հրաժարական տա, իսկ խորհրդարանը երկու անգամ պետք է ձախողվի Կառավարության նոր ղեկավարի թեկնածությունը քվեարկելու հարցում: Վերջերս «Իմ քայլը» իշխող դաշինքի խմբակցությունը առաջ քաշեց արտահերթ ընտրությունների համար խորհրդարանի ինքնալուծարման գաղափարը:

Նման մեխանիզմ Սահմանադրության մեջ ներկայումս սահմանված չէ, բայց իշխանությունները պատրաստ են կատարել համապատասխան փոփոխություն: «Իմ քայլը» խմբակցության անանուն աղբյուրը հայտնել է, որ արտահերթ ընտրությունների կազմակերպման գործընթացը կմեկնարկի շատ մոտ ապագայում՝ Գլխավոր շտաբի պետի հարցի լուծումից անմիջապես հետո: