Հուլիսյան մարտերն ի ցույց դրեցին սեփական անվտանգության մարտահրավերներն ինքնուրույն լուծելու Հայաստանի ընդունակությունը

Աշխարհագրական, կամ նույնիսկ ռազմական առումով տեղային Տավուշյան մարտերը հոգեբանական, քաղաքական, աշխարհաքաղաքական չափազանց մեծ նշանակություն ձեռք բերեցին: Կարևոր արդյունքներ գրանցեցին, և առիթը պատեհ է, որ արձանագրենք, թե որոնք են հուլիսյան մարտերի արդյունքները Հայաստանի համար:

Սարդարապատում կայացած պարգևատրման արարողության ժամանակ ելույթի իր խոսքում ասաց ՀՀ վարչապետ Նիկոլ Փաշինյանն ու ներկայացրեց այդ մարտերի արդյունքները:

Արդյունք 1

Արդեն երկար տարիներ Ադրբեջանի ռազմաքաղաքական ղեկավարությունը զարգացնում էր այն թեզը,  թե ՀՀ-ի և Արցախի դեմ պատերազմ չսկսելը արդեն իսկ Բաքվի կողմից արվող չափազանց մեծ զիջում է  ոչ միայն Արցախին ու Հայաստանին, այլև միջազգային հանրությանն ընդհանրապես, որովհետև, ըստ նրանց կառուցած տրամաբանության, վերջին տարիներինԱդրբեջանի բանակը հասել էր մարտունակության այնպիսի մակարդակի, որ ի վիճակի էր շատ արագ, 24 ժամում լուծել Ղարաբաղի հարցը:

Սրա հիման վրա երկար տարիներ ձևավորվում և մատուցվում էր մի խոսույթ, թե Ղարաբաղի հարցի խաղաղ կարգավորումը հնարավոր է միայն հայկական կողմի միակողմանի զիջումների հիման վրա:

Հուլիսյան հաղթական մարտերը ջախջախեցին արդեն շուրջ 10 տարի Ադբեջանի ռազմաքաղաքական ղեկավարության  կողմից կառուցված խոսույթը՝ ապացուցելով, որ Ղարաբաղի հարցը չունի ռազմական լուծում և Ադրբեջանը պետք է անխուսափելիորեն որդեգրի կառուցողական մոտեցումներ:

Արդյունք 2

Մեր կառավարությունն արդեն ավելի քան 2 տարի միջազգային հանրության և Ադրբեջանի ղեկավարության հետ շփումներում, նաև հրապարակային հայտարարություններում ընդգծել է Հայաստանի հետ ուժի, սպառնալիքների, հարկադրանքի լեզվով խոսելու որոշ սուբյեկտների անհեռանկարայնությունը:

Մենք հստակ ասել ենք, որ որևէ մեկին թույլ չենք տա նման տոնայնությամբ կամ ակնարկներով խոսել մեզ հետ, և այդպես վարվելու փորձ անողները դառնորեն կզղջան:

Հուլիսյան հաղթական մարտերն ապացուցեցին մեր քաղաքական հայտարարությունների վստահելիությունը, ապացուցեցին, որ տարածաշրջանի ռազմաքաղաքական իրավիճակի և ուժերի հարաբերակցության մեր գնահատականները սթափ են և ճշգրիտ:

Արդյունք 3

Արդեն 2.5 տարի Հայոց բանակում տեղի են ունենում լայնածավալ բարեփոխումներ: Խոսում եմ ոչ միայն բոլորին տեսանելի և քննարկվող, այլև ոչ հրապարակային, լուռ ընթացակարգերով տեղի ունեցող բարեփոխումների մասին, որոնք ունեն ռազմավարական և մարտավարական բովանդակություն:

Այսօր, ըստ էության ապացուցեցինք, որ Հայաստանն ի վիճակի է առանց հյուծող սպառազինությունների մրցավազքի մեջ մտնելու, ինտելեկտուալ աշխատանքով մարտավարական և  ռազմավարական նորարարություններով ապահովելու ռազմական առավելություն:

Հուլիսյան հաղթական մարտերի ընթացքում արձանագրվել է բացառիկ մի իրավիճակ. մարտական գործողությունների ընթացքում սահմանապահ մարտական դիրքերում մենք ոչ մի զոհ չենք ունեցել: Ունեցել ենք միայն մեկ թեթև վիրավոր: Այն դեպքում, երբ արդեն իսկ հանրահռչակ Անվախ դիրքը և հարակից բոլոր դիրքերն եղել են ամենածանր հրետակոծությունների, հատուկ ջոկատայինների զանգվածային հարձակումների թիրախում:

Սա նշանակում է, որ Հայաստանի բանակը հասել է մարտավարական աննախադեպ բարձունքի, ինչն էլ ավելի է մեծացնում մեր վստահությունը, որ ունենք տարածաշրջանում  որոշիչ ազդեցություն ունեցող մարտունակ և ինտեեկտուալ բանակ:

Արդյունք 4

Երկար ժամանակ խոսում ենք ՀՀ-ում ոազմարդյունաբերությւան զարգացման մասին, և սա հայտարարել ենք առաջնահերթություն: Հուլիսյան հաղթական մարտերն ի ցույց դրեցին հայկական ռազմարդյունաբերության  բարձր արդյունավետությունը և ապացուցեցին, որ մենք ունենք  տեխնոլոգիական համաշխարհային քարտեզի վրա մեր պատվավոր և կայուն տեղն արձանագրելու հնարավորություն:

Հուլիսյան մարտերի ընթացքում մեր ԶՈւ կողմից խոցվեցին բարձր տեխնոլոգիական զինատեսակներ, որոնք մինչ այդ համարվում էին անխոցելի: Քչերը գիտեն, որ դրանք խոցվել են հայկական արտադրության և Հայաստանում արդիականացում անցած  զինատեակների փոխգործակցության  արդյունքում:

Արդյունք 5

Հուլիսյան հաղթական մարտերն ի ցույց դրեցին սեփական անվտանգության մարտահրավերներն ինքնուրույն լուծելու Հայաստանի ընդունակությունը: Բայց այդ ընթացքում տեղի ունեցած մի շարք իրադարձություններ, որոնք մի հստակեցրեցին ոչ միայն մեզ, այլ ամբողջ տարածաշրջանին ուղղված սպառնալիքների շրջանակը:

Մյուս կողմից ամրապնդեցին մեր վստահությունը մեր ռազմավարական գործընկերների և դաշնակիցների նկատմամբ, ինչն առավել մեծացնում է տարածաշրջանի խաղաղոիւթյան և կայունության երաշխավորի դերն արդյունավետ կատարելու Հայաստանի հնարավորությունը:

Հիշեցնենք, որ քիչ առաջ Սարդարապատի հուշահամալիրում ՀՀ վարչապետ Նիկոլ Փաշինյանը պարգևատրեց Տավուշյան հաղթական մարտերի ակտիվ դերակատարներին: 16 զինծառայող պարգևատրվեց «Մարտական խաչ» առաջին աստիճանի, 55 զինծառայող՝ «Մարտական խաչ» երկրորդ աստիճանի շքանշանով։

Վարչապետի միջնորդությամբ կապիտան Ռուբեն Սանամյանը պարգևատրվեց Ազգային հերոսի կոչումով՝ Հայրենիքի շքանշանով։