ՀՀ-ում հայտնաբերված կորոնովիրուսով վարակված տղամարդը մեկուսացված է. հսկվում են չվերթի մյուս ուղեւորները ևս. Ա. Թորոսյան

Թեհրանից Հայաստան ժամանած կորոնավիրուսով վարակված ՀՀ 29-ամյա քաղաքացին մեկուսացված է: Այս մասին ընթացող ասուլիսում հայտարարեց ՀՀ Առողջապահության նախարար Արսեն Թորոսյանը: «Այն ինչ տեղի է ունեցել երեկ, ճիշտ հայտնաբերված դեպք է: Թեհրանից բոլորին ուղեկցել է մեր մասնագետը:  Բոլորը եղել են դիմակներով: Եվ ուղեւորները, եւ անձնակազմը կրել են դիմակներ, ՀՀ-ում ունեցել են դուրս գալու առանձին ուղի, պրակտիկորեն չեն շփվել այլ անձանց հետ, եւ վտանգ քիչ են ներկայացրել այլոց համար: Չեն ունեցել ախտանշաններ եւ բոլորը գնացել են տուն: Հիմա, երբ կա այս դեպքը, ըստ միջազգային ռեկոմենդացիաների, եթե ինքնաթիռում հայտնաբերվում է կորոնավիրուսով վարակված որեւէ անձ, անկախ նրա մոտ եղած հիվանդության ծանրությունից խորհուրդ է տրվում նրանից երկու շարք առաջ, երկու շարք ետ, եւ իր շարքը մեկուսացնել 14 օր ժամանակով, ինչն այս պահին կատարվում է, եւ արդեն ավարտական փուլում է: Նաեւ մեկուսացվել են ուղեւորին կնոջ հետ տուն տարած մարդիկ: Տաքսի ծառայությունից չեն օգտվել նրանք: Վարչապետի գրառումը հիմնված է եղել իմ տված ինֆորմացիայի վրա, որն այդ պահին ամբողջական չի եղել, եւ ԱԱԾ-ն մի քանի ժամում պարզեց այդ տեղեկատվությունը: Նույնը վերաբերում է հիվանդանոց գնալուն: Քաղաքացին հիվանդանոց է գնացել շտապօգնության մեքենայով, որի անձնակազմը նույնպես մեկուսացվում է: Դրանից դուրս գտնվողները չեն համարվում ռիսկի գոտում գտնվող անձինք: Չնայած շատ քիչ է այլ անձանց վարակելու հավանականությունը, մենք բոլոր ուղեւորներին պահում ենք հսկողության տակ»,-ասաց նախարարը:

Հայտնաբերված դեպքը հանրային առողջապահական լուրջ վտանգ չի ներկայացնում, ավելին, ըստ Արսեն Թորոսյանի, հիվանդի համար եւս վտանգ չի ներկայացնում, քանի որ այս պահին փաստացի այդ անձը մեկուսացված է հիվանդանոցում, սակայն որեւէ բուժական միջամտություն չի իրականացվում նրա նկատմամբ:

Առողջապահության նախարարությունը մինչ օրս 117 թեստ է իրականացրել:

Արսեն Թորոսյանը հայտարարեց, որ նոր կորոնավիրուսով վարակվածության տարածվածությունը կանխարգելելուն ուղղված ՀՀ-ում իրականացվող հակահամաճարակային միջոցառումները համապատասխանում են բոլոր չափանիշներին, եւ ավելին են հաճախ, քան այլ երկրների կողմից արվող միջոցառումներն են: «Խոսքը նաեւ ՀՀ-ից շատ ավելի զարգացած եւ հարուստ երկրների մասին է: Թերացման մասին խոսելը պարզապես ավելորդ է: ՀՀ ԱՆ կողմից իրականցված աշխատանքները, որոնք մեկնարկել են հունվարի 22-ից, երբ ԱՀԿ-ն առաջին արտակարգ ժողովն արեց այս վիրուսի վերաբերյալ, էֆեկտիվ են եղել: Այսքան ժամանկ ՀՀ-ում չենք ունեցել վիրուսի բերովի դեպք: Որեւէ երկիր ապահովագրված չէ այս վարակն ունենալու հանգամանքից: Չեմ ուզում ապագայի կանխատեսումներ անել, սակայն պետք է նշեմ, որ մեր կողմից կատարվող աշխատանքները թույլ են տալիս առավելագույն չափով կանխարգելել լոկալ դեպքերը, որովհետեւ սա ընդամենը բերովի դեպք էր, որն իհարկե նոր քայլեր անելու անհրաժեշտություն է առաջացրել,»,-շեշտեց նախարարը: