Էդմոն Մարուքյանը կարծում է, որ ոչ միայն «Իմ քայլը», նաեւ ԲՀԿ-ն պետք է սատարի Մանե Թանդիլյանին

Իրենց ընդդիմություն հռչակած «Լուսավոր Հայաստան» եւ «Բարգավաճ Հայաստան» կուսակցությունները առաջիկայում պայքարի նոր առիթ են ունենալու: Խոսքն այն մասին է, թե ով է լինելու Ազգային ժողովի նախագահի ընդդիմադիր տեղակալը: Հունվարի 14-ին տեղի է ունենալու 7-րդ գումարման Ազգային ժողովի առաջին նիստը: Այդ օրը ձեւավորվելու են Ազգային ժողովի խմբակցությունները, որոշվելու է մշտական հանձնաժողովների թիվը, ընտրվելու են խորհրդարանի նախագահը եւ երեք տեղակալները: Արդեն պարզ է, որ նախագահի եւ երկու տեղակալների պորտֆելները զբաղեցնելու են «Իմ քայլը» խմբակցության ներկայացուցիչները: Այս պաշտոններում «Քաղաքացիական պայմանագիր» կուսակցության վարչությունն առաջադրել է համապատասխանաբար Արարատ Միրզոյանի, Լենա Նազարյանի եւ Ալեն Սիմոնյանի թեկնածությունները:

Խորհրդարանի նախագահի ընդդիմադիր տեղակալի պաշտոնում «Լուսավոր Հայաստան» կուսակցությունն առաջադրելու է իր նախընտրական ցուցակի 2-րդ համար Մանե Թանդիլյանին: ԲՀԿ-ն եւս հայտարարել է թեկնածու առաջադրելու մասին, սակայն դեռ ընտրված թեկնածու չկա: Հիշեցնենք, որ Սահմանադրության 104 հոդվածի առաջին կետի համաձայն՝ ԱԺ նախագահի տեղակալն ընտրվում է ցանկացած ընդդիմադիր խմբակցության կազմում ընտրված պատգամավորների կազմից: Այսինքն՝ պարտադիր պայման չէ, որ 3-րդ տեղակալը լինի ամենամեծ ընդդիմադիր խմբակցությունից:

ԲՀԿ-ում ողջունում են Մանե Թանդիլյանի թեկնածությունը, բայց նշում են, որ ԲՀԿ-ն եւս առաջադրելու է իր թեկնածուին: «ԲՀԿ-ն որպես երկրորդ քաղաքական ուժ եւ ամենամեծ ընդդիմադիր խմբակցություն առաջադրելու է նախագահի տեղակալի թեկնածու հունվարի 14-ին մեկնարկելիք ԱԺ նիստում: Թե ով է լինելու մեր թեկնածուն առաջիկա օրերին կիմանաք, այս պահին որեւէ հրատապության խնդիր չկա»,- «Հայկական ժամանակ»-ի հետ զրույցում ասաց ԲՀԿ քաղխորհրդի գլխավոր քարտուղար Նաիրա Զոհրաբյանը:

ԲՀԿ-ն նոր ձեւավորվելիք ԱԺ-ում ունենալու է 26 պատգամավոր, ԼՀԿ-ն՝ 18, իսկ «Իմ քայլը»՝ 88: Նախագահի տեղակալն ընտրվում է պատգամավորների ընդհանուր թվի ձայների մեծամասնությամբ: Այսինքն՝ վճռորոշը լինելու է «Իմ քայլը» խմբակցության քվեարկությունը եւ այստեղ չի բացառվում, որ քաղաքական ուժերն իրենց թեկնածուներին առաջադրելիս հաշվի առնեն ՔՊ-ականների ճաշակը, մասնավորապես, իրենց թեկնածուն անձնական ինչպիսի կապերի մեջ է իշխանության հետ:

Նաիրա Զոհրաբյանից հետաքրքրվեցինք՝ արդյո՞ք ԲՀԿ-ում չեն կարծում, որ ՔՊ-ն կաջակցի Մանե Թանդիլյանին, քանի որ նա, նախ, եղել է կառավարության անդամ, իսկ բացի այդ էլ՝ ՔՊ-ն եւ ԼՀ-ն ԵԼՔ-ով ճանապարհ են անցել: «Ես ՔՊ-ականների տրամադրություններին ծանոթ չեմ: Ես ասում եմ այն, ինչ որոշել է ԲՀԿ-ն, մենք անպայմանորեն առաջադրելու ենք մեր թեկնածուին»,- եզրափակեց Զոհրաբյանը՝ չմեկնաբանելով, թե արդյո՞ք Թանդիլյանն իրենց համար մրցակցային թեկնածու է:

«Լուսավոր Հայաստան» կուսակցության նախագահ Էդմոն Մարուքյանը ՀԺ-ի հետ զրույցում շատ վստահ հայտարարեց, որ իրենց թեկնածուին աջակցելու է ոչ միայն իշխող «Իմ քայլը» խմբակցությունն, այլ նաեւ ԲՀԿ: Հարցին՝ ԲՀԿ-ն ինչո՞ւ պետք է սատարի Մանե Թանդիլյանին, Մարուքյանը պատասխանեց. «Միմյանց հետ աշխատել ենք, գիտենք, որ նա լավ պատգամավոր է, լավ նախարար է եղել: Նա բոլոր չափանիշներին համապատասխանում է, թե՛ բարոյական, թե՛ էթիկական, թե՛ մարդկային: Նա լավ փոխխոսնակ կարող է լինել եւ պետք է լինի լավ փոխխոսնակ»:

Դիտարկմանը, որ ԲՀԿ-ն էլ մտադրված է իր թեկնածուին առաջադրել եւ նրան տեսնել 3-րդ տեղակալի պաշտոնում, Մարուքյանն ասաց, որ տեղեկություններ չունի ԲՀԿ-ի ցանկությունների մասին: «Կառաջադրեն, կտեսնենք»,- ասաց նա:

ՔՊ վարչության անդամ, ԱԺ նախագահի տեղակալի իշխանության թեկնածուներից Ալեն Սիմոնյանը ՀԺ-ի հետ զրույցում նշեց, որ «Քաղաքացիական պայմանագիր» կուսակցությունը այս հարցի հետ կապված քաղաքական որոշում դեռ չունի: «Պարզ չի, թե ով է լինելու ԲՀԿ-ի թեկնածուն, ԼՀԿ-ն էլ երեկ է իր թեկնածուի մասին ասել, մեզ մոտ դեռ քննարկում չի եղել»:

Ալեն Սիմոնյանը ՀԺ-ի հարցին ի պատասխան չբացառեց տարբերակ, որ ՔՊ-ում կորոշվի ազատ քվեարկություն կատարել: «Բոլոր տարբերակներն էլ հնարավոր են, քանի դեռ քննարկում չի եղել»: ՀԺ-ի մյուս հարցին, որ Մանե Թանդիլյանը տեւական ժամանակ կառավարության անդամ է եղել, սա ինչ-որ կերպ կարո՞ղ է անդրադառնալ ՔՊ-ականների քվեարկության վրա, Սիմոնյանը պատասխանեց, որ իրենց համար տարբերություն չկա:

«Մենք ԼՀԿ-ի մեր գործընկերների հետ ինչ-որ ճանապարհ ունենք անցած, բայց ակնհայտ է, որ ԲՀԿ-ն ավելի շատ քվե է ստացել ՀՀ քաղաքացիների կողմից եւ տրամաբանությունը հուշում է, որ իրենց թեկնածուն շատ ավելի մեծ առավելություն պետք է ունենա այս ընտրության մեջ: Այս երկու հանգամանքները հաշվի առնելով՝ կքննարկենք, կհասկանանք: Մոտակա ժամանակները կքննարկենք, ժամանակ դեռ կա, պետք է նաեւ իմանանք, թե ԲՀԿ-ն ում է ներկայացնում»,- ասաց Սիմոնյանը:

Հարցին, եթե պարզ լինի, թե ով է ԲՀԿ-ի թեկնածուն, հնարավո՞ր է, որ ՔՊ-ն անձով պայմանավորված որոշում կայացնի, Ալեն Սիմոնյանը պատասխանեց. «Կարող է անձ լինի, որ մեր համար անընդունելի լինի՝ նախկին գործունեության պատճառով»: