Մենք հասանք մեր արդյունքին. ԱԺ-ն լուծարվեց, բայց լիագումար նիստեր են տեղի ունենալու

«Մենք հասանք մեր արդյունքին»,- 6-րդ գումարման Ազգային ժողովի իրավունքի ուժով արձակումն այսպես ազդարարեց խորհրդարանի նախագահ Արա Բաբլոյանը: Հայտնի է, որ Սահմանադրության համաձայն, եթե երկու անգամ վարչապետ չի ընտրվում, ապա խորհրդարանը լուծարվում է իրավունքի ուժով: Սա Ազգային ժողովի վերջին նիստ էր եւ ակնկալվում էր, որ Արա Բաբլոյանը ելույթ կունենար, կխոսեր մեկ ու կես տարի գործունեություն ծավալած խորհրդարանի հաջողությունների կամ անհաջողությունների մասին:

Մեծ հաշվով՝ այս խորհրդարանը որեւէ դրական քայլ չի կատարել, որը կբխեր հանրության շահերից եւ հիմա լուծարման շեմին արժեր դրանք ամփոփել: Սա այն խորհրդարան էր, որ ՀՀԿ-ի իշխանության շարունակականության համար հազար ու մի սահմանադրական օրենքներ է ընդունել ու փոփոխել: Արա Բաբլոյանը կես նախադասությամբ նաեւ չհայտարարեց, որ Ազգային ժողովն արձակվում է, քանի որ խորհրդարանին չհաջողվեց երկրորդ անգամ վարչապետ ընտրել:

Պատգամավորների ձայների 0 դեմ, 0 կողմ, 13 ձեռնպահ հարաբերակցությամբ վարչապետ չընտրվելուց հետո միայն Նիկոլ Փաշինյանը քվեարկությունից րոպեներ անց գրառում կատարեց ֆեյսբուքյան իր էջում՝ փաստելով․ «Ազգային ժողովը արձակված է իրավունքի ուժով: Շնորհավորում եմ»:

Փաշինյանն այնուհետ մոտեցավ եւ ողջունեց խորհրդարանի բակում իրեն սատարող քաղաքացիներին: Հետո շնորհակալություն հայտնեց եւ հեռացավ: Այդ ընթացքում լրագրողների հետ զրույցում նախընտրեց չմեկնաբանել խորհրդարանի արձակումը: Փաշինյանի խոսքով՝ պայմանավորվածություն կա, որ արտահերթ ընտրությունները տեղի կունենան դեկտեմբերի 9-ին: Վարչապետի պաշտոնակատարը, ի պատասխան լրագրողի հարցին ասաց, որ ինքը ռեյտինգային ընտրակարգով չի առաջադրվելու․ «Համապետական թեկնածու եմ լինելու»: Սա պայմանավորված է այն հանգամանքով, որ նա այս պահին ունի հանրային մեծ աջակցություն եւ որ ընտրատարածքում էլ, որ առաջադրվի անհավասար պայմաններ կստեղծվեն մյուս թեկնածուների համար:

Վարչապետի ընտրության քվեարկությանը չմասնակցեցին ՀՅԴ, «Ծառուկյան» եւ ՀՀԿ խմբակցությունները, իսկ ԵԼՔ դաշինքն ու Ազգային ժողովի նախագահ Արա Բաբլոյանը ձեռնպահ քվեարկեցին: ԱԺ փոխնախագահ Էդուարդ Շարմազանովը մինչեւ քվեարկությունը մեր զրույցում փոխանցել էր, որ Փաշինյանի թեկնածությանը կողմ չքվեարկելու մասին ունեն կուսակցության եւ խմբակցության որոշում: «Կարծում եմ, այստեղ ի վերջո, հեղափոխությունից վեց ամիս անց, իշխանության եւ ընդդիմության կարծիքները համընկան: Թե՛ իշխանությունը եւ թե՛ ընդդիմությունը կարծում են, որ վարչապետին չպետք է ընտրել»:

Հանրապետականներից շատերը վարչապետի ընտրության նիստին չէին եկել: Ներկա էին միայն նրանք, ովքեր «անցել են» իշխանության կողմը: Ներկաներից ԱԺ-ում ելույթ ունեցավ Էդուարդ Շարմազանովը. նա նշեց, որ հեղափոխությունից վեց ամիս անց երկրում տնտեսության հետ կապված որեւէ դրական տեղաշարժ չի գրանցվել:

Անզեն աչքով երեւում էր, որ շատ պատգամավորներ անտրամադիր էին: Մասնավոր զրույցներում նշում էին, որ պատճառը խորհրդարանի լուծարումն է: Անկախ Ազգային ժողովի արձակումից՝ այն պահպանում է իր լիազորությունները: Կարող են հրավիրվել Ազգային ժողովի հերթական եւ արտահերթ նիստեր, ընդունվել օրենքներ եւ փոփոխություններ կատարել: Այս խորհրդարանը մինչեւ նոր խորհրդարանի ձեւավորումը պահպանում է իր բոլոր լիազորությունները: Այս օրերին Ազգային ժողովի մշտական հանձնաժողովների համատեղ նիստերում քննարկվում է «ՀՀ 2019 թվականի պետական բյուջեի մասին» ՀՀ օրենքի նախագիծը: Իր աշխատանքներն է նաեւ շարունակում Գեւորգ Կոստանյանի նախագահած Քննիչ հանձնաժողովը:

Առաջիկայում Ազգային ժողովի լիագումար նիստեր են սպասվում: Մասնավորապես, Ազգային ժողովի պաշտոնական կայքի համաձայն՝ նոյեմբեր եւ դեկտեմբեր ամիսների համար նիստերի ամրագրված օրեր կան: