Ինչու Գագիկ Ծառուկյանը երեկ չի ասել «Նառա, դու սուս». պատասխանը կհնչի այսօր երեկոյան

ԲՀԿ-ն չի սկսել սեւ PR իրականացնել, այս ամենը եղել է արձագանք սոցցանցերում տեղի ունեցած ԲՀԿ-ի դեմ կոնկրետ տեղեկատվական ռեկետի, որի կուլմինացիան եղել է երեկ Նաիրա Զոհրաբյանի ելույթը: Այսօր ԱԺ ճեպազրույցների ժամին հայտարարեց «Ծառուկյան» խմբակցության պատգամավոր Իվետա Տոնոյանը: Նա նաեւ նշեց, որ մարդկանց հստակ ասում են, որ Նաիրա Զոհրաբյանին չընտրեն:

«Եթե այս իրավիճակը շարունակվում է, բնական է, որ մի պահ լինում է արձագանք: Մենք փաստեր ունենք ձեռքի տակ, եւ մտադիր ենք եվրոպական կառույցներին եւս ներկայացնել, որովհետեւ այն, ինչ տեղի է ունենում, դուրս է տրամաբանության սահմաններից»,- ասաց Տոնոյանը:

Պատգամավորը նշեց, որ ունեն փաստեր, որտեղ հնչում են վիրավորանքներ թեկնածուի հասցեին, սպառնալիքներ, կոչեր: «Նախարարության աշխատակիցների կողմից այդ ամենը խրախուսող քարոզչություն է: Նախարարության աշխատակիցներն անձնական էջերում համատարած ատելություն ու ագրեսիան են տարածում Նաիրա Զոհրաբյանի դեմ: Այդ մարդկանց ֆեյսբուքյան էջերում պարզ մոնիտորինգն էլ ցույց է տալիս, թե ինչ քարոզչություն է տարվում: Ես չեմ կարծում, որ նախարարությունների աշխատակիցների նման պահվածքը կարող է որեւէ մեկի աչքից վրիպած լինել»,- ասաց նա:

Դիտարկմանը՝ եթե նախարարության աշխատակից են, դա դեռ չի նշանակում, որ Նիկոլ Փաշինյանի թիմից են, Իվետա Տոնոյանը պատասխանեց, որ այդ առցանց ֆեյսբուքի էջը ուսումնասիրելիս պարզ է դառնում, թե ինչ ուղղություն են տանում:

Խմբակցության ղեկավար Վահե էնֆիաջյանը նշեց, որ ինֆորմացիան հավաքագրման փուլում է եւ որ օրենքով սահմանված կարգով բոլոր միջոցներից օգտվելու են: Հարցին, թե դիմե՞լ են այդ փաստով իրավապահ մարմիններին, պատգամավորը նշեց, որ դեռ չեն դիմել:

Հարցին՝ երեկ Նիկոլ Փաշինյանի կողմից եղած հայտարարությունը, թե նրանք, ովքեր լարում են իրավիճակը, նրանց կլարենք երկրից, արդյո՞ք իրենց էր ուղղված, Իվետա Տոնոյանը պատասխանեց. «Մի առիթով Ծառուկյանն ասել է, եւ ես հաստատեմ, որ լուրջ քաղաքական ուժը, կամ առաջնորդը որեւէ ակնարկներով հայտարարությանը չի արձագանքում, եթե լինի հասցեական մեսիջ, կլինի կոնկրետ պատասխան»,- ասաց նա:

Նաիրա Զոհրաբյանը երեկ իր հանրահավաքում նշել էր, որ «Իմ քայլը» դաշինքի ցուցակում Սերժ Սարգսյանի, Զորի Բալայանի եւ Միքայել Մինասյանի բարեկամներն են տեղ գտել: Քաղաքապետի թեկնածու Հայկ Մարությանը սա հերքել է: Լրագրողներն ԱԺ-ում ԲՀԿ-ական պատգամավորներից հետաքրքրվեցին, թե որտեղից այդ տեղեկությունները իրենց: «Վիկտոր Մնացականյանը հանդիսանում է Միքայել Մինասյանի սանիկը, Իզաբելլա Աբգարյան. նա նախկինում աշխատել է նախագահականի լրատվական ՊՈԱԿ-ում եւ գիտենք, թե ինչ քաղաքական հայացքներ ունի: Հակոբ Բալայան. Զորի Բալայանի՝ Սերժ Սարգսյանի նախկին խորհրդականի զարմիկը: Մնացածի չակերտները չենք բացում, այսքանով եզրափակենք»,- ասաց Վահե Էնֆիաջյանը:

Լրագրողի դիտարկմանը, որ հիմա ԲՀԿ-ականները ընկել են Զորի Բալայանի զարմիկի, Միքայել Մինասյանի սանիկի հետեւից, բայց մի քանի ամիս առաջ «Ծառուկյան» խմբակցությունն ինքն էր կողմ քվեարկում Սերժ Սարգսյանի վարչապետ դառնալու օգտին, Վահե Էնֆիաջյանն ասաց. «Ես դեմ եմ քվեարկել: Մեր քաղաքական ուժն էլ ազատ է քվեարկել»:

Երեկ Գագիկ Ծառուկյանը չի եղել հանրահավաքին եւ Նաիրա Զոհրաբյանի ելույթի ժամանակ չի ասել «Նառա, դու սուս»: Լրագրողները հետաքրքրվեցին, թե ինչ կարծիք ունի այս մասին Գագիկ Ծառուկյանը: Արդյո՞ք կիսում է թեկնածուի մտքերը: «Գագիկ Ծառուկյանն այսօր երեկոյան Նորքի հանրահավաքին ներկա է լինելու եւ կարծում եմ, որ անձամբ կպատասխանի հարցին»,- ասաց Իվետա Տոնոյանը:

«Հայկական ժամանակ»-ը հարց հնչեցրեց՝ ինչո՞ւ են թիրախավորել քաղաքական ուժի թեկնածուին եւ ինչո՞ւ է Նաիրա Զոհրաբյանը ցանկանում հենց Հայկ Մարությանի հետ բանավիճել, մասնավորապես, հետաքրքրվեցինք՝ արդյո՞ք նրան սեւով ներկայացնելու խնդիր կա, քանի որ տարօրինակ է, թե ինչու՞ օրինակ Ռեֆորմիստների կուսակցության թեկնածուի հետ չեն ցանկանում բանավիճել:

«Որեւէ մեկին սեւացնելու կամ սպիտակացնելու խնդիր չունենք: Մենք հույս ունենք, որ արդար, համահավասար հանդիպում տեղի կունենա եւ մենք վստահ ենք, որ մեր թեկնածուն հնարավորություն ունի Երեւանի փոփոխություններ անելուն: Հիմնական մրցակցությունն ընթանում է Հայկ Մարությանի եւ Նաիրա Զոհրաբյանի միջեւ»,- ասաց Վահե Էնֆիաջյանը: