Ես հույսս չէի դնի 0 հանրային վստահությամբ դատարանի վրա. «Սասնա ծռերի» անդամ Գ. Եղիազարյան

«Սասնա ծռերի» անդամ Գագիկ Եղիազարյանը բաց նամակ է հղել՝ խմբի անդամների ազատման հետ կապված: Նամակը ներկայացնում ենք առանց խմբագրման.

«Շարադրեմ այս օրերին անչափ չարչրկված թեմաների վերաբերյալ իմ կարծիքներն ու մոտեցումները, այսինքն՝ թե ես ինչպես եմ պատկերացնում եւ ինչպես կվարվեի ինքս։

Իհարկե, ես ողջունում եմ դատարանների գործունեությանը չմիջամտելու, նրանց անկախության ամրապնդմանը աջակցելու դիրքորոշումը։ Կարծում եմ՝ ցանկացած բանական քաղաքացի այս թեմայի վերաբերյալ տարբերվող դիրքորոշում ունենալ չի կարող։ Բայց մի «փոքրիկ» լրացում ունեմ․ դատարանը պետք է լինի ոչ միայն անկախ, չուղղորդվող, անկաշառ, այլ առաջին հերթին պետք է լինի արդար եւ անկողմնակալ, վեր կանգնած լինի ճղճիմ մեկնաբանություններից։ Օրինակ՝

- Դատարանի կանչով առանց հարգելի պատճառների չներկայանալու ճանապարհով խոչընդոտելը, որը իրական դիտարկելիս, դատարանը գնահատում է Գ․ Եղիազարյանի ընդգծված բացասական վերաբերմունքը դատարանի եւ առհասարակ արդարադատության նկատմամբ, ինչը եւս վկայում է այն մասին, որ հայտնվելով  ազատության մեջ, վերջինս կխոչընդոտի դատարանում գործի քննությանը՝ դատարան չներկայանալու եղանակով,- Ինչի՞ց ես եզրակացրել, պրն․ Մակյան, որ ես ունեմ «ընդգծված բացասական վերաբերմունք առհասարակ արդարադատության նկատմամբ»։ Ախր այստեղ մեր սիրելի Էդմոն Մարուքյանը կասեր՝ սիրելու բա՞ն եք, որ սիրենք։

Ես, իհարկե ներողություն եմ խնդրում, եթե պակաս ինֆորմացված եմ (պատճառը անազատության մեջ գտնվելս է), բայց ես դեռեւս չեմ հանդիպել ուղերձի, որտեղ ասված լիներ, որ դատավորները պետք է լինեն անկախ եւ արդար, իսկ եթե, Աստված մի արասցե, այդպիսին չլինեն եւ այն էլ քաղաքական կոնտեքստ ունեցող դատավարությունների առումով, ապա նրանք լրջագույն պատասխանատվության կենթարկվեն, քանի որ քաղաքական դատավարությունները, քաղաքական դրդապատճառներով անարդար դատավճիռները մեր բոլոր քաղաքացիների ու ողջ հանրության դեմ են։

Նաեւ ես մի փոքրիկ վերապահում ունեմ այն բոլոր իրավապահների նկատմամբ, ովքեր տարիներ շարունակ ոչ միայն կոռումպացված են եղել, ոչ միայն աշխատել են «վերեւներից» եկող հրահանգներով, այլեւ անմիջականորեն պատասխանատուն են այն նույն անարդար որոշումների ու վճիռների, որոնց արդյունքում քաղբանտարկյալները հայտնվել են ճաղերից այն կողմ։

Անդրադառնամ մեկ այլ թեմայի նույնպես, որի մասին իմ տեղեկությունները սահմանափակվում են մամուլից ունեցածով։

Կրթության նախարարը կոչ է արել, որ ուսուցիչները ազատվեն իրենց պարտադրված ՀՀԿ անդամատոմսերից։ Ոչ մի բացասական բան, որեւէ հարկադրանք, խղճին եւ ազատություններին հակասող ոչինչ չեմ տեսնում․ ավելին՝ ողջունում եմ եւ խրախուսում։

Իմ կարծիքով, չէր խանգարի նմանատիպ մեկ այլ ուղերձ էլ հղել ասենք արդարադատության նախարարի կողմից՝ այդ նույն ապօրինություններ կատարած դատավորին, որ հարգելիներս, ձեզ շանս, հնարավորություն է տրված շտկելու ձեր իսկ կողմից նախկինում կատարված սխալները, ինչը, ի դեպ, հետագայում որպես մեղմացուցիչ հանգամանք հաշվի կառնվի եւ կամ՝ հակառակը։

Հավանաբար, կգտնվեն մարդիկ, որոնք մեր գործողությունների, մեր հայտարարությունների մեջ ավելորդ շտապողականություն եւ րոպե առաջ ազատություն ստանալու անզուսպ ցանկություն կփորձեն գտնել։

Մի կողմ թողնելով իմ ի ծնե ունեցած ազատատենչությունը՝ փոքր-ինչ հիասթափեցնեմ նրանց․ տասնհինգ ամիս ամբողջովին իզոլացված ենք եղել արտաքին աշխարհից, մեր ամենամերձավոր հարազատներից անգամ, իսկ հաջորդող յոթ ամիսներին էլ՝ մեծ դրական տեղաշարժեր չեն եղել, բայց միեւնույնն է՝ մենք ունենք բավարար չափով կամք, համառություն եւ համբերություն՝ մեր պայքարը հաղթական ավարտին հասցնելու։

Իրականում ժամ առաջ ազատվելու մեր ձգտումը պայմանավորված է հայրենիքին ծառայել շարունակելու մղումով ու ցանկությամբ։

Ես ամեն դեպքում հույսս չէի դնի տասնյակ տարիներ շարունակ ՀՀ քաղաքացիներին հուսախաբ արած, զրո հանրային վստահությամբ դատարանների վրա։

Հ․Գ․ Բողոքի ակցիաները ուղղված էին եւ են ստահոդ դատարանների եւ արդարադատության ապականված ողջ համակարգի դեմ՝ ժողովրդի վստահությունը վայելող ղեկավարին այդ տաժանակիր գործում աջակցելու մղումով եւ դա, պետք է որ, ակնհայտ լիներ»։