Չգիտեմ, թե ինչպես ենք քվեարկելու. Էդուարդ Շարմազանովը՝ վարչապետի ընտրության մասին

Ազգային ժողովի փոխնախագահ Էդուարդ Շարմազանովն այսօր լրագրողների հետ զրույցում հայտարարեց, որ խորհրդարանում մեծամասնություն կազմող ՀՀԿ խմբակցությունն աջակցելու է վարչապետի ընտրությանը: Շարմազանովը դժվարացավ պատասխանել հարցին, թե ինչպես են քվեարկելու ՀՀԿ խմբակցության բոլոր պատգամավորները, սակայն հավաստիացրեց, որ անհրաժեշտ 53 ձայնը կապահովվի, որպեսզի պատգամավորների 1/3-ի առաջադրած թեկնածուն ընտրվի վարչապետի պաշտոնում:

«Չգիտեմ, թե ինչպես ենք քվեարկելու, սակայն վարչապետի ընտրությանը Հանրապետականն աջակցելու է: Ինչ քանակով կաջակցի, ոնց կաջակցի, չեմ կարծում, որ դա էական է: Էականն այն է, որ անհրաժեշտ 53 ձայնն ապահովվի և 1/3-ի ստորագրությունն ունեցող անձնավորությունը դառնա վարչապետ»,- նշեց Շարմազանովը:

Անդրադառնալով հարցին, ինչո՞ւ ՀՀԿ-ն մայիսի 1-ին տապալեց վարչապետի ընտրությունը, իսկ հաջորդ օրը որոշում կայացրեց մայիսի 8-ին թեկնածու չառաջադրել եւ սատարել պատգամավորների 1/3-ի առաջադրած թեկնածուին՝ Շարմազանովը պատասխանեց, որ ՀՀԿ խմբակցությունն այդ պահին այդպես է հարմար գտել:

«Իսկ ինչ վերաբերվում է իմ դիրքորոշմանը, այն չի փոխվել: Ես իմ դիրքորոշումն արտահայտել եմ մայիսի մեկին վարչապետի ընտրության հարցի քննարկման ժամանակ, եւ շարունակում եմ մնալ նույն կարծիքին, սակայն դա չի նշանակում, որ այլ կարծիք չպետք է լինի: Ես իմ գործունեության ընթացքում միշտ բազմակարծության եւ այլակարծության կողմնակից եմ եղել: Մայիսի 1-ին մեր քվեարկությունը եղել է բացարձակապես քաղաքական, եւ մենք արտահայտել ենք մեր քաղաքական դիրքորոշումը»,- ասաց ՀՀ ԱԺ փոխնախագահը:

Դիտարկմանը, որ Սերժ Սարգսյանը Մոսկվա էր գնացել եւ վերադառնալուց հետո ՀՀԿ-ն փոխեց իր դիրքորոշումը, Շարմազանովն ասաց.

«Սերժ Սարգսյանը Մոսկվա չէր գնացել, նա ՀՀ-ում է եւ մնալու է Հայաստանում»,- ասաց նա եւ ընդգծեց, որ կարեւորն այն է, որ վարչապետն ընտրվում է, կարեւորն այն չէ, թե ովքեր են քվեարկում:

Շարմազանովն անդրադարձավ նաեւ արտահերթ ընտրությունների անցկացման հավանականությանը: Նա նշեց, որ արտահերթ ընտրությունների անցկացումը պատվերով համերգ չէ, որ ով երբ ցանկանա, արտահերթ ընտրություն անի:

«Կա Սահմանադրություն, որտեղ հստակ ամրագրված է, թե ինչպես կարող ենք գնալ արտահերթ ընտրությունների: Եթե մայիսի 8-ին մենք ընտրում ենք վարչապետ, իսկ ես գրեթե 100 տոկոսով համոզված եմ, որ մենք ունենալու ենք վարչապետ, արդեն արտահերթ ընտրությունների գնալ չենք կարող: Եթե վարչապետը բերում է կառավարության ծրագիր, եւ այդ ծրագիրը ստանում է օժանդակություն, այդ դեպքում էլ արտահերթ ընտրությունների չենք կարող գնալ: Իրենք էլ օրակարգ են բերում Ընտրական օրենսգրքում փոփոխությունների հարց, իսկ դա ոտքի վրա քննարկելու հարց չի: Պետք է նստենք, քննարկենք: Ընտրական օրենսգիրքը սահմանադրական օրենք է, որտեղ փոփոխությունների համար պահանջվում է պատգամավորների 3/5-ի ձայների առկայություն: Լինելու են դեբատներ: Ամեն ինչը պետք է իրականացնենք ըստ ժամանակացույցի»,- ասաց Էդուարդ Շարմազանովը:

Հարցին՝ չի բացառո՞ւմ, որ Նիկոլ Փաշինյանի՝ վարչապետի պաշտոնում ընտրվելուց հետո մեծամասնությունը կընդունի նրա ներկայացրած ծրագիրը, Շարմազանովը պատասխանեց. «Նայած՝ ինչ ծրագիր կլինի»:

Էդուարդ Շարմազանովը բացառեց, որ ՀՀԿ-ական պատգամավորները իրենք կարող են ստորագրահավաք սկսել վարչապետի թեկնածու առաջադրելու համար:

ՀԺ-ի հարցին՝ Նիկոլ Փաշինյանը հայտարարում է, որ ՀՀԿ-ն երկրում այլեւս իշխանություն չունի, արդյո՞ք նա համամիտ է, Շարմազանովն ասաց.

«Դեռ ունենք, բայց, եթե մայիսի 8-ին վարչապետը փոխվի, բնականաբար չենք ունենա: Եթե կառավարություն չես, ուրեմն իշխանություն չես»:

Էդուարդ Շարմազանովը նաեւ նշում էր, որ Հայաստանը այն երկիրը չէ, որ բարձր գոռան եւ իշխանությունը փոխվի: Մեր դիտարկմանը, որ հարյուր հազարավոր մարդիկ հրապարակում գոռացին եւ իշխանությունը փոխվում է, նա մեկնաբանեց.

«Այնուամենայնիվ, խորհրդարանում է որոշվում իշխանությունն ու ընդդիմությունը»: