ՀՀԿ-ն հիմա էլ Ադրբեջանին է բզբզում. խմբագրական

Երեկ խորհրդարանական մեծամասնությունը՝ ՀՀԿ խմբակցությունը 56 դեմ ձայնով մերժեց Նիկոլ Փաշինյանին ՀՀ վարչապետի պաշտոնում ընտրելու առաջարկը: Փաշինյանը ստացավ 45 կողմ ձայն:

ՀՀԿ խմբակցության անդամները այդպես էլ չկարողացան հիմնավորել իրենց դիրքորոշումը: Որեւէ ծանրակշիռ փաստարկ, թե ինչու պետք է դեմ քվեարկեն, այդպես էլ չհնչեց: Ու ՀՀԿ-ն կրկին անգամ ի ցույց դրեց ստեղծված իրավիճակը բոլորովին չհասկանալու իր «տաղանդը»: Մեկն ասաց՝ որտեղ եք տեսել, որ խորհրդարանական փոքրամասնության առաջադրած թեկնածուն դառնա վարչապետ, իսկ մեծամասնությունը լինի ընդդիմություն, մյուսը որպես փաստարկ բերեց այն, որ Փաշինյանը 4 եվրոյանոց որսորդական վերնաշապիկով է երթ անում, երրորդը հայտարարեց, թե Փաշինյանը 1996 թվականին ընդդիմություն է եղել, մի ուրիշ ՀՀԿ-ական մեղադրեց Փաշինյանին նրանում, որ հոգեկան խնդիրներ ունեցող մի անձնավորություն Էջմիածնում փորձել է սղոցել Մայր տաճարի խաչը, եւս մեկն էլ որպես փաստարկ, թե ինչու է դեմ քվեարկելու, ասաց որ նույնիսկ Փաշինյանի հայրը չի ուզում, որ որդին վարչապետ դառնա, եղավ մեկն էլ, որ մեջբերեց Փաշինյանի՝ 2001 թ. գրած մի հոդվածի՝ կոնտեքստից կտրված մի հատված:

Դե, ՀՀԿ-ն անադեկվատության մի շքերթ է սկսել, որը կարծես ավարտ չունի: ՀՀԿ առաջնորդը ապրիլի 22-ին եկավ Փաշինյանի հետ բանակցելու, մի երկու բառ ասաց, սպառնաց նոր մարտի 1-ով, գնաց, իսկ հաջորդ օրը վերագտավ ադեկվատությունը եւ հայտարարեց հրաժարականի մասին, ասելով, թե Նիկոլ Փաշինյանը ճիշտ էր, ինքը՝ սխալ: Հետո համաժողովրդական շարժման դեմ փորձեց դուրս գալ ՀՀԿ փոխնախագահ Կարեն Կարապետյանը: Փորձեց դա անել դրսից «տղա բերելով», բայց մի ինչ-որ պահի թերեւս  վերագտավ ադեկվատությունը եւ հետ քաշվեց ու չառաջադրվեց որպես ՀՀԿ-ի վարչապետի թեկնածու:

Ու «Իմ քայլը» նախաձեռնության դեմ ՀՀԿ-ի յուրաքանչյուր անադեկվատ քայլ թողեց ճիշտ հակառակ էֆեկտը: Գնալով հրապարակում աճում է մարդկանց թիվը, իսկ նրանց գործողությունները դառնում են ավելի վճռական, շարժմանը միացող պաշտոնյաների թիվը ավելանում է, սփյուռքից աջակցության մասին հայտարարությունները ավելի հաճախակիանում են...: Մի խոսքով ՀՀԿ-ի յուրաքանչյուր քայլ, որը ուղղված չէ իշխանությունը անցնցում ու առանց նախապայմանների փոխանցելուն, մոտեցնում է ՀՀԿ-ի անվերապահ «կապիտուլյացիայի» պահը: Կապիտուլյացիա, որի արդյունքում ՀՀԿ-ն որպես կառույց իսպառ փոշիանալու է առանց հետագայում կենդանության նշաններ ցույց տալու հեռանկարի: Եվ ՀՀԿ-ն երեկ արեց այդպիսի քայլերից հերթականը՝ մերժեց Փաշինյանին վարչապետ նշանակելու առաջարկը: Դրա արդյունքը եղավ այն, որ Երեւանի Հանրապետության հրապարակը, որը մինչ այժմ զարմացնում էր իր մարդաշատությամբ, երեկ արդեն չէր բավարարում, եւ մարդիկ չէին կարողանում մոտենալ հրապարակին: Ըստ գնահատականների, քվեարկությունից հետո հրապարակում հավաքվել էր մոտ 200 հազար մարդ, ու դա ամենեւին չափազանցություն չի թվում:  

Անադեկվատության այս շքերթին, անշուշտ, կարելի է ժպիտով հետեւել եւ ըմբոշխնել ՀՀԿ-ի ինքնավերացման համառությունը: Բայց այստեղ կա մի բայց: Ռուսական միջամտության սպառնալիքների ռեսուրսը ըստ էության սպառելով՝ ՀՀԿ-ն իր «զինանոցից» հանեց թերեւս վերջին «գործիքը»: Խոսքը ադրբեջանական պատրաստվող հարձակման մասին «լուրերն» ու «վերլուծություններն» էին: Անշուշտ, կարելի է ենթադրել, որ իրականում ՀՀԿ-ականները մտահոգված էին նրանով, որ օգտվելով ներքաղաքական ճգնաժամից, Ադրբեջանը կփորձի ռազմական գործողություններ սկսել: Բայց եթե անկեղծ լինենք, դա ավելի շատ նման էր մեսիջի՝ ուղղված Ադրբեջանին: Ադրբեջանին չափազանց ձեռնտու է, որ ՀՀԿ-ն շարունակի ատամներով կառչած մնալ իշխանությանը: Պատկերացնել կարելի է, թե որքան կարեւոր է Ադրբեջանի համար «երկխոսել» մի հակառակորդի հետ, որի վստահությունը սեփական ժողովրդի մոտ արդեն հասել է բացարձակ զրոյի, եւ ինչեր է պատրաստ զիջել հակառակորդ երկրի այդպիսի վստահություն ունեցող իշխանությունը:

Այս տեսանկյունից ՀՀԿ պատգամավորների նման պահվածքը, իրոք, այլ բան, քան Ադրբեջանին ուղղված մեսիջ, դժվար է գնահատել: Երեւի ՀՀԿ-ում հաշվարկել են, որ համաժողովրդական շարժումը կասեցնելու միակ ու վերջին տարբերակը ադրբեջանական հարձակումն է: Եթե դա այդպես է, ապա թերեւս լավ չեն հաշվարկել: Եթե Ադրբեջանը ընդունի այդ մեսիջը ու գնա ինչ-որ գործողությունների, ապա դա կտրուկ կփոխի ներքաղաքական իրավիճակը ոչ հօգուտ ՀՀԿ-ի: Գուցե ՀՀԿ-ին թվում է, թե իրադարձությունների նման զարգացման հետեւանքները հնարավոր կլինի բարդել շարժման վրա: Բայց դա նույնպես իրավիճակը ադեկվատ գնահատելու կարողության իսպառ բացակայություն է: Բայց կան տեղեկություններ, որ Ադրբեջանը կարծես անհաղորդ է ՀՀԿ-ի այդ առաջարկին եւ լուրջ պատրաստություններ սահմանին գոնե առայժմ չի անում:

Որոնք կարող են լինել ՀՀԿ-ի հաջորդ քայլերը: Հնարավոր է, որ ՀՀԿ-ն կրկին տապալի յոթ օր անց տեղի ունենալիք վարչապետի ընտրությունները, լուծարի ԱԺ-ն ու գնա նոր ընտրությունների առանց ընտրական օրենսդրությունը փոխելու: Այս դեպքում ՀՀԿ-ն թերեւս հույսեր ունի, որ կարող է օգտագործել իր ռեսուրսները՝ փող, թաղային կրիմինալ, ադմինիստրատիվ ռեսուրսներ եւ այլն: Բացառված չէ, որ այդ ռեսուրսները որոշ չափով աշխատեն, եւ ՀՀԿ-ն տեղ գտնի ապագա ԱԺ-ում: Բայց այլեւս բացառված է, որ մեծամասնություն կազմի: Իսկ այդ պարագայում ՀՀԿ-ն ուղղակի դուրս կմղվի լուսանցք ու կդառնա խորհրդարանական մյուս բոլոր ուժերի համար «բոքսի տանձ»: Մյուս տարբերակն այն է, որ ՀՀԿ-ն մի տեղից պեղի մի նոր թեկնածու, առաջադրի նրան վարչապետի պաշտոնում ու իր ունեցած ձայներով նշանակի նրան այդ պաշտոնում: Բայց դա ուղղակիորեն նշանակում է այս իրավիճակի պահպանում լավագույն դեպքում: Այդ վարչապետը մի քանի օր անց կրկին հրաժարական է տալու: Մի խոսքով, ՀՀԿ-ն որեւէ խելամիտ քայլ, բացի լիակատար ու անվերապահ կապիտուլյացիայից, պարզապես չունի:

Տպել
4367 դիտում

«Փորձում են Գեւորգ Լոռեցյանին այլ հոդվածով մեղադրանք առաջադրելու հիմքեր ստեղծել». պաշտպան

Nissan ընկերությունը նվազեցնում է արտադրությունն ու փակում գործարաններ. աշխատակիցները բողոքում են

33-ամյա տղամարդուն ինքնասպանության հասցնելու գործով ձեռք են բերվել տվյալներ դիտավորությամբ կյանքից զրկելու վերաբերյալ

Նիգերիայում զինված հանցախումբը հարձակվում է գյուղերի վրա. տասնյակ սպանվածներ կան

Արցախում դիմակների դեֆիցիտը բացառված է

Կայացել է «Մարդու իրավունքները և կանայք Հայաստանի զինված ուժերում» ծրագրի ղեկավար հանձնաժողովի նիստը

Մարտի առաջին կեսին կատարվել է կորոնավիրուսի 411 թեստ, մայիսի առաջին կեսին՝ 16.828, մահացածների մեծ մասը 60-70 տարեկան է

ԱՄՆ-ի դրամաշնորհով ֆինանսավորված Medmedia.am-ը COVID-19-ի մասին ապատեղեկատվություն է տարածում Հայաստանում. The Guardian

Ակունք գյուղում հացատուն է հրդեհվել

Մարմաշենում մահացած երիտասարդի գլխի վրա բռնությամբ զուգորդված ներգործության հետքեր են հայտնաբերվել. կա ձերբակալված

Ռուբեն Հայրապետյանի որդին ինքնակամ ներկայացել է ՔԿ. խափանման միջոց է ընտրվել ստորագրությունը

Հրդեհ է բռնկվել Արտավազ գյուղի անտառում

ԱԱՏՄ-ն Կենտրոն վարչական շրջանում դիտարկած 45 տնտեսվարողից 17-ի մոտ խախտումներ է արձանագրել

Մեր պետությունների միջև փոխվստահության վրա հիմնված համագործակցությունը հետագայում էլ ավելի կխորանա. Գիորգի Գախարիա

Վարչապետի եւ նախարարի միջեւ չի կարող հակասություն լինել․ Նիկոլ Փաշինյան

Ոչ ոք չի կարող բացառել, որ կվերադառնանք կարանտինի, բայց մինչ այդ կլինեն այլ խստացումներ. վարչապետ

316 քաղաքացի գտնվում է ծանր վիճակում, 53-ը՝ ծայրահեղ ծանր․ Արսեն Թորոսյան

Կենտրոն վարչական շրջանում մշտադիտարկվել է 40 տրանսպորտային միջոց, արձանագրվել է իրավախախտման 18 դեպք

2000 քաղաքացու նկատմամբ վարչական վարույթ է հարուցվել, կասեցվել՝ 62 տնտեսվարողի գործունեություն. ՀՀ ոստիկանապետ

Իրավիճակն առավել քան լուրջ է և գնալով՝ ավելի լրջանում է. վարչապետ