Հաց բերողի արձանի տեղում շատրվաններ կլինեն. այգին պաստառապատվել է (տեսանյութ)

Երեւան քաղաքի ավագանին պատրաստվում է հավանության արժանացնել «Վարդանյան Ընտանիք» բարեգործական հիմնադրամի կողմից քաղաքին բարեկարգ այգի նվիրելու առաջարկին: Ավագանու դեկտեմբերի 26-ի նիստի օրակարգում ներառված հարցերից մեկի ուսումնասիրության արդյունքում տեղեկանում ենք, որ դիմելով Երեւանի քաղաքապետարանին՝ «Վարդանյան Ընտանիք» բարեգործական հիմնադրամը պատրաստակամություն է հայտնել Երեւան քաղաքի 2800-ամյակի կապակցությամբ Երեւան քաղաքին՝ հանրօգուտ նպատակներով, կատարել նվիրաբերություն:

Այն կիրականացվի Երեւան քաղաքի Ա. Մյասնիկյանի արձանի ետնամասում գտնվող Իտալիայի, Բեյրութի, Խորենացու եւ Գ. Լուսավորիչի փողոցների սահմաններով պարփակված այգում իրականացվելիք շինարարական եւ բարեկարգման աշխատանքների արդյունքը Երեւան քաղաքին նվիրաբերելու ձեւով:

Բացի այգու հիմնանորոգման աշխատանքներից, «Վարդանյան Ընտանիք» բարեգործական հիմնադրամը պատրաստակամություն է հայտնել իր միջոցների հաշվին իրականացնել այգու շատրվանների ինժեներական եւ տեխնիկական սպասարկումը, սարք-սարքավորումների խոտանման դեպքում՝ դրանց վերականգնումը, փոխարինումը նորով, վնասված սալերի փոխարինումը եւ վերանորոգումը, ինչպես նաեւ կանաչ գոտիների խնամքն ու սպասարկումը: Երեւան համայնքի համաձայնությամբ՝ Այգու ամբողջ տարածքում իրականացնել է շուրջօրյա տեսավերահսկում եւ այլն:

Երեւան համայնքը պարտավորվում է վճարել այգում օգտագործված ոռոգման եւ խմելու՝ ներառյալ շատրվանների ջրի դիմաց վճարները, այգու սպասարկման, լուսավորության համար ծախսված էլ. էներգիայի վճարները, ինչպես նաեւ այգու աղբահանության եւ մաքրության համար անհրաժեշտ վճարներն ամբողջ տարվա ընթացքում, ինչպես նաեւ ապահովել այգում շատրվանների աշխատանքը եւ այլն:

Ավագանին պատրաստվում է վաղվա նիստում հավանություն տալ Երեւան քաղաքի 2800-ամյակին նվիրված՝ «Վարդանյան Ընտանիք» բարեգործական հիմնադրամի՝ Երեւան քաղաքի Ա.Մյասնիկյանի արձանի ետնամասում գտնվող Իտալիայի, Բեյրութի, Խորենացու եւ Գ.Լուսավորչի փողոցների սահմաններով պարփակված այգու բարեկարգման նպատակով իրականացվելիք շինարարական, այդ թվում՝ շատրվանների կառուցման աշխատանքների արդյունքը՝ Երեւան համայնքին նվիրաբերելու առաջարկին:

«Վարդանյան Ընտանիք» բարեգործական հիմնադրամի հետ կկնքվի նվիրաբերության պայմանագիր: Այգին առնվազն 99 տարի պետք է հանդիսանա համայնքի սեփականությունը եւ ծառայի նվիրաբերության պայմանագրով նախատեսված նվիրաբերության նպատակին:

Շինարարական եւ բարեկարգման աշխատանքները «Վարդանյան Ընտանիք» բարեգործական հիմնադրամը պարտավորվում է իրականացնել մինչեւ 2018 թվականի սեպտեմբերի 25-:

Շինարարական եւ բարեկարգման աշխատանքները, ներառյալ՝ նախագծման աշխատանքները, իրականացվում են «Վարդանյան Ընտանիք» բարեգործական հիմնադրամի հաշվին՝ վերջինիս ընտրած կապալառուների միջոցով:

Նշենք, որ այգում մոտ մեկ ամիս առաջ Հաց բերող անունով հայտնի Արթուր Սարգսյանի արձանը տեղադրելու մտադրության մասին հայտարարել էին մի խումբ մտավորականներ: Ավելին, հրապարակվել էր նաեւ արձանի էսքիզները եւ արձանի տեղադրման կոնկրետ վայրը: Արթուր Սարգսյանը 2016 թվականի հուլիսյան իրադարձությունների ժամանակ սնունդ էր տարել ոստիկանության ՊՊԾ գունդ, որից հետո կալանավորվեց, ապա հացադուլ հայտարարեց: Շատ չանցած Արթուր Սարգսյանն ազատ արձակվեց եւ օրեր անց մահացավ:

Ի դեպ, 2018 թվականին լրանում է 2008 թվականի մարտի մեկի ողբերգական իրադարձությունների 10-րդ տարելիցը: Ամեն տարի քաղաքացիները ծաղիկներ էին տեղադրում Մյասնիկյանի արձանի պատվանդանին, սակայն եկող տարի նման հնարավորություն չի լինի: Այգին եւ արձանն այժմ ցանկապատված է եւ պատված «Ավելի բարեկարգ Երեւան» պաստառներով: