Երեք ամիս պարտաճանաչ նիստերը հետաձգում եք, սպասում եք մի պաշտպան չգա, գնաք տուն. դատավոր

Ավան եւ Նոր Նորք վարչական շրջանների ընդհանուր իրավասության դատարանում դատավոր Արտուշ Գաբրիելյանի նախագահությամբ շարունակվում է «Սասնա ծռեր» խմբի 18 անդամի գործով արտագնա դատական նիստը:

Արդեն երեք ամիս է՝ դատարանը նախապատրաստական փուլից չի անցել դատաքննության, չնայած այն հանգամանքին, որ դատավոր Արտուշ Գաբրիելյանն առանց մի քանի պաշտպանների ներկայության դատական նիստ է անում:

Այսօրվա դատական նիստին չէր ներկայացել ամբաստանյալներ Մարտիրոս Հակոբյանի եւ Արայիկ Հակոբյանի պաշտպան Լուսինե Սահակյանը: Դատարանը նրա բացակայությունը համարեց հարգելի եւ որոշեց՝ պաշտպանի բացակայությունը խոչընդոտ չէ նիստը շարունակելու համար:

Սա հերթական անգամ առաջացրեց պաշտպանների դժգոհությունը: «Եթե պարտադիր չի պաշտպանի ներկայությունն այս փուլում, ապա մենք այստեղ ժամանակ ենք վատնում եւ կարող ենք հանգիստ գնալ, դուք պաշտպանների ներգրավում անեք: Հիմա ես շփոթվել եկել եմ, դուրս գամ սանկցիա ե՞ք կիրառելու»,- դատավորից հետաքրքրվեց ամբաստանյալ Արամ Մանուկյանի պաշտպան Ինեսսա Պետրոսյանը: Ի պատասխան Արտուշ Գաբրիելյանն ասաց՝ այո, պաշտպանի հարցին՝ շփոթվելու համա՞ր, դատավորը դրական պատասխան տվեց:

Ինեսսա Պետրոսյանը շարունակեց իր դժգոհությունը. «Եթե պաշտպանները հարգելի պատճառով բացակայում են ինչպե՞ս եք նիստը շարունակում եւ պաշտպաններ ներգրավվում»: Դատավորը հակադարձեց. «Ձեր ուզածն էլ նա է, որ եթե մեկ պաշտպան չի ներկայանում, հետաձգենք, գնանք տուն... Բարի եղեք մտածեք ձեր պաշտպանյալների մասին: Ի վնաս ձեր պաշտպանյալների գործողություն եք անում»,- դիմելով փաստաբանին ասաց Գաբրիելյանը:  Ինեսսա Պետրոսյանն էլ հակադարձեց՝ նշելով, որ ծանր մեղադրանքներ են առաջադրվել, եւ յուրաքանչյուրն ամբաստանյալ ունի պաշտպանի իրավունք, իսկ պաշտպանի բացակայությամբ նիստի շարունակությունը ոտնահարում է ամբաստանյալների իրավունքը: «Դուք բոլորով միասին պարտաճանաչ երեք ամիս դատական նիստը հետաձգում եք: Կարող եմ մի քանի պաշտպանների թվարկել, որոնք պարտաճանաչ ներկայացել են դատական նիստին: Հիմա այնպիսի տպավորություն եք թողնում, որ ոչ թե եկել եք Ձեր պաշտպանյալի իրավունքների հետ կապված գործողություններ իրականացնեք, այլ տեսնեք, որ եթե մի պաշտպան բացակայում է, ապա հետաձգեք նիստը, գնաք»,- ասաց դատավորը:

Այնուհետեւ դատավոր Արտուշ Գաբրիելյանը մեղադրող դատախազ Պետրոս Պետրոսյանի հիշեցումից հետո ամբաստանյալ Գեւորգ Իրիցյանի պաշտպան Նինա Կարապետյանցից պահանջեց լքել նիստերի դահլիճը։ Դատավորը նշեց, թե նախորդ նիստին Իրիցյանը հրաժարվել է իր ծառայություններից, ուստի դատարանը որոշում է կայացրել փաստաբանին հեռացնել գործի վարույթից: Նինա Կարապետյանցն էլ ի պատասխան ասաց, որ դատարանի նման որոշում ինքը չի ստացել:

Գործով մասնակից մյուս պաշտպանները դատարանի այս պահանջը անօրինական համարեցին։

«Դուք այստեղ ինչ եք անում, լքեք նիստերի դահլիճը»,- դիմելով Նինա Կարապետյանցին ասաց դատավորը, ինչից հետո պաշտպանը հեռացվեց:

Արտուշ Գաբրիելյանը դժգոհությունն արտահայտող պաշտպաններին արգելեց այլեւս խոսել։

Դատավորի գործողությունների դեմ առարկող Ինեսսա Պետրոսյանի նկատմամբ էլ դատարանը սանկցիա կիրառեց՝ նախազգուշացման տեսքով: Այս սանկցիան կիրառվեց այն բանից հետո, երբ մեղադրող դատախազ Պետրոս Պետրոսյանը հայտարարեց, թե պաշտպանները խանգարում են դատավարության կարգը՝ տեղից հայտարարությունն են անում:

Դատական նիստին ներկա չէ Սերգեյ Կյուրեղյանի պաշտպան Մուշեղ Շուշանյանը։ Փաստաբան Իննեսա Պետրոսյանն ասաց, որ Շուշանյանը առողջական խնդիրներ ունի եւ գտնվում է հիվանդանոցում. «էնքան դատարանի բակում կանգնեց, հիվանդացավ»,- ասաց Պետրոսյանը: Դատավոր Արտուշ Գաբրիելյանը պնդեց՝ Շուշանյանը երեք նիստ է՝ բացակայում է, եւ որոշում կայացրեց հանրային պաշտպան ներգրավել՝ Լիանա Գասպարյանին։

Վերջինս պնդեց՝ ինքն առանց Կյուրեղյանի համաձայնության չի կարող ներգրավվել գործում։ Կյուրեղյանին դահլիճ բերելու որոշում կայացվեց։ Ուղեկցող ոստիկանը դատավորին հայտնեց, որ Կյուրեղյանը չի ցանկանում բարձրանալ նիստերի դահլիճ. «Հենց հիմա բարձրացրեք վերեւ»,- դիմելով ուղեկցողին ասաց դատավորը: Ինչից հետո պաշտպան Արա Ղարագյոզյանը հայտարարեց. «Այսինքն՝ բռնություն եք գործադրելու»: Գաբրիելյանն բացասական պատասխան տվեց, ապա նիստը ընդմիջեց Սերգեյ Կյուրեղյանին նիստերի դահլիճ բարձրացնելու համար: