Փաստաբանները 16 հայց են ներկայացրել news.am կայքի դեմ. առաջին նիստի օրը հայտնի է

4 փաստաբաններ՝ Գեւորգ Մկրտչյանը, Վրեժ Խաչիկյանը, Սիմոն Բաբայանն ու Արսեն Հարությունյանը 16 հայց են ներկայացրել news.am կայքի սեփականատեր «ՆՅՈՒԶ ԷՅԷՄ» ՍՊ ընկերության դեմ:

Փաստաբանները պահանջում են հերքել վերը նշված կայքում զրպարտություն համարվող տեղեկատվությունները: 16 հայցերն էլ վարույթ է ընդունվել Աջափնյակ եւ Դավիթաշեն վարչական շրջանների ընդհանուր իրավասության դատարանի կողմից: Դատական տեղեկատվական համակարգից տեղեկացանք, որ 16 հայցերից մեկով առաջին նիստը նշանակվել է սեպտեմբերի 26-ին, ժամը 11:00-ին:

Հայցվորներն ըստ էության զրպարտություն են համարել Տիգրան Աթանեսյանի գրասենյակում տեղի ունեցած ծեծկռտուքից հետո news.am կայքում տեղ գտած մի շարք հրապարակումներ:

Այսօր հայցվոր, փաստաբան Սիմոն Բաբայանին խնդրեցինք մանրամասնել հայցապահանջը, նաեւ հստակեցնել, թե սույն կայքում տեղ գտած ո՞ր հրապարակումներն է հայցվոր կողմը համարում զրպարտություն: Սիմոն Բաբայանը մեր հարցին պատասխանեց գրավոր: Բաբայանի փոխանցմամբ՝ News.am կայքի դեմ իր կողմից հայցապահանջներ է ներկայացվել «Պնդուկիզմի հաղթանակ», «ՓՊ ղեկավար անձանց կողմից ծեծված Արմեն Սողոմոնյանը որպես մեղադրյալ հրավիրվել է հարցաքննության», «Եթե իրենց թվում է, որ Աթանեսյանն ու Սողոմոնյանը կհրաժարվեն իրենց բողոքներից, չարաչար սխալվում են. Լուսինե Սահակյան», «Պարզապես խայտառակություն է եւ բացահայտ ապօրինություն. Տիգրան Աթանեսյանին հրավիրել են որպես կասկածյալ հարցաքննության», «Աթանեսյանի եւ Սողոմոնյանի վրա հարձակվելու գործով 5 անձի մեղադրանք առաջադրվեց» վերտառությամբ հրապարակումներում տարածած զրպարտչական տեղեկությունների կապակցությամբ:

«Նշված հոդվածները վերաբերում են իմ եւ Տիգրան Աթանեսյանի, Արմեն Սողոմոնյանի միջեւ տեղի ունեցած միջադեպին: Լրատվական միջոցը, որպես փաստ, հանրությանն է ներկայացնում իրականությանը չհամապատասխանող տեղեկություններ՝ արատավորելով իմ պատիվը եւ արժանապատվությունը: Կոնկրետ արտահայտությունները մանրամասն ներկայացված են հայցադիմումներում: Հարկ է նաեւ նշել, որ այս առիթով հարուցված քրեական գործի շրջանակներում իրականացվում է նախաքննություն, այսինքն՝ կատարվածի իրավական գնահատականը դեռ չի տրվել: Հետեւաբար, նման պայմաններում գնահատականներ հնչեցնելը ժամանակավրեպ է եւ հղի բացասական հետեւանքներով: Ինչ վերաբերում է այս լրատվամիջոցին, ապա պետք է նշել, որ Փաստաբանների պալատի, իմ եւ գործընկերներիս վերաբերող՝ News.am-ի կողմնակալ հրապարակումները ինձ համար զարմանալի չեն: Արդեն տեւական ժամանակ է, ինչ News.am-ը ցուցաբերում է նման մոտեցում: News.am-ի նման գործելակերպն էլ պատճառ հանդիսացավ, որ ես խախտված իրավունքներիս պաշտպանությունը իրականացնեմ դատական եղանակով: Իմ կողմից դատարան են ներկայացվել զրպարտություն համարվող տեղեկատվության հերքման եւ ոչ նյութական վնասի դրամային հատուցման հայցապահանջները»,- մեր գրավոր հարցին ի պատասխան նշել է Փաստաբանների դպրոցի տնօրեն, փաստաբան, վերը նշված ծեծկռտուքի գործով մեղադրյալ Սիմոն Բաբայանը:

News.am-ի շահերի ներկայացուցիչ Արամազդ Կիվիրյանը մեր զրույցում ասաց, որ դեռ հայցի պատասխան չեն ներկայացրել: Նա ասաց, որ դեռ ոչ բոլոր հայցերն են ստացել. 16 հայցերից ստացել են 4-5-ը: Բացի դա, պատասխանող կողմը միջնորդություն է ներկայացրել, որպեսզի սույն գործերը ընդդատության կարգով տեղափոխվեն Շենգավիթ վարչական շրջանի ընդհանուր իրավասության դատարան: «Մենք գտնում ենք, որ ընդդատության կանոնների խնդիր կա, նման միջնորդություն ներկայացրել ենք, բոլոր 16 հայցերով: Երբ ընդդատության հարցը կլուծվի եւ դատարանը վարույթ կընդունի, դրանից հետո արդեն կներկայացնենք մեր դիրքորոշումը ներկայացված պահանջների վերաբերյալ»,- ասաց փաստաբան Արամազդ Կիվիրյանը: Ըստ նրա՝ պահանջը, որը ներկայացվել է, պատասխանող կողմի համար ավելի քան ոչ իրավաչափ է, եւ իրականում այստեղ իրավական հարց չէ, որը ենթակա է քննարկման: «Այստեղ պետք է ընդամենը հասկանալ, թե ինչ նպատակ են հետապնդում ներկայացված հայցերը, այսինքն՝ դրանք իրականում չեն հետապնդում ենթադրյալ խախտված իրավունքի վերականգնում: Ներկայացված հայցապահանջները ընդամենը նպատակ են հետապնդում ճնշում գործադրել այս լրատվական կայքի նկատմամբ»,- ասաց ներկայացուցիչը:

Մեր հարցին, թե հայցի ապահովման միջոց կիրառվե՞լ է, Կիվիրյանն ասաց, որ եթե նման որոշում լիներ՝ կիմանային. «Համենայնդեպս հայցի ապահովման միջոց չի կիրառվել»,- ասաց նա: Վերջինիս խոսքով՝ իրավական տեսանկյունից պատասխանող կողմն իր փաստարկները կներկայացնի դատարանում. «Պետք է հասկանալ նաեւ, թե  ինչու է 16 հայց ներկայացվել, որովհետեւ բոլորը կարող էին համախմբել մի հայցապահանջի մեջ եւ ներկայացնել մեկ ընդհանուր հայց: Իրենց թվում է, թե այսպես կարող են ռեսուրս սպառել եւ ճնշում գործադրել լրատվամիջոցի նկատմամբ: Սա պալատի գործառույթն է»,- մեր զրույցում նշեց Արամազդ Կիվիրյանը:

Նշենք, որ News.am կայքի դեմ հայց ներկայացրած 4 փաստաբաններն էլ Տիգրան Աթանեսյանի գրասենյակում տեղի ունեցած միջադեպի գործով մեղադրյալ են: Մեղադրյալի կարգավիճակում են նաեւ Աթանեսյանն ու Արմեն Սողոմոնյանը: