ՀՀԿ-ի տեսահոլովակից հետո «Ռեինկարնացիայի» համերգի տոմսերի շուրջ 10 տոկոսը ետ է վերադարձվել

սպիտակով նշված են դեռ չվաճառված տոմսերը

Չնայած նրան, որ Հայաստանի Հանրապետական կուսակցության նախընտրական տեսահոլովակում երգելը «Ռեինկարնացիա» խմբի դեմ բողոքի ալիքի վերածվեց, խմբի վաղը նախատեսված համերգը կայանալու է:  

Համերգը տեղի է ունենալու մարտի 8-ին՝ ժամը 19:00-ին, Կարեն Դեմիրճյանի անվան մարզահամերգային համալիրի փոքր դահլիճում: Տոմսերի արժեքը սկսվում է 3000 դրամից եւ հասնում մինչեւ 15.000: Tomser.am եւ Tomsarkgh.am օնլայն հարթակներից տեղեկանում ենք, որ համերգից մեկ օր առաջ շատ փոքր քանակությամբ չվաճառված տոմսեր են մնացել:

Համացանցում երեկվանից տեղեկություններ են շրջանառվում, որ հանդիսատեսը հետ է վերադարձնում արդեն գնված տոմսերը: Այս տեղեկությունը հաստատեցին Tomsarkgh.am ընկերությունից, սակայն չնշեցին, թե որքան տոմս է հետ վերադարձվել: Tomser.am ընկերությունից, սակայն ասացին, որ իրենց հատկացված տոմսերն ամբողջությամբ վաճառված են, վերադարձ չկա:

ՀՀԿ-ի տեսահոլովակի տարածումից հետո, ընդհանուր առմամբ, եղել է շուրջ 10 տոկոս տոմսերի վերադարձ, սակայն հետո վերադարձված տոմսերը վաճառվել են: Այս մասին մեզ հետ զրույցում հայտնեց «Ռեինկարնացիա» խմբի արտ-մենեջեր Նարեն (ազգանունը չցանկացավ հրապարակել): Ստորեւ ներկայացնում ենք նրա հետ մեր զրույցը.

- Նարե, ՀՀԿ-ի տեսահոլովակում նկարահանվելու հետ կապված համացանցային աղմուկն ինչպե՞ս է ազդել համերգի կազմակերպման վրա, կայանալո՞ւ է, թե՞ ոչ:

- Ճիշտն ասած, այդ համերգը մենք դեռ անցած տարի ենք պլանավորել, ինչ-ինչ պատճառներով չստացվեց, բայց մենք հենց մարտի 8-ի համար էինք նախատեսել, դրա համար շատ ցավալի  է, որ այս քաղաքական օրերի հետ համընկավ: Բայց քանի որ համերգը ոչ մի կապ չունի Հանրապետական կուսակցության հետ, կազմակերպչական ոչ մի առնչություն չունենք, նույն բնականոն հունով ընթանում է: Պարզապես, հենց այդ օրը որոշվեց հեռարձակել (ՀՀԿ-ի տեսահոլովակը-խմբ.), այդ օրը որոշակի վերադարձ եղել է տոմսերի, բայց որը հետագայում նորից վաճառվեց: Այնպես որ հիմա առանձնապես խնդիրներ չկան:

- Համերգը կայանալու է:

- Համերգը կայանալու է, հնչելու են «Ռեինկարնացիայի» բոլոր երգերը, որոնք իրենց մեջ ունեն բացասական խոսքեր: Այսինքն՝ ովքեր որ ներկա կլինեն համերգին կամ հետո եթերում կտեսնեն՝ կհամոզվեն, որ իսկապես Հանրապետական կուսակցության հետ ոչ մի կապ չունի:

- Իսկ ինչպե՞ս էր եղել, որ խմբի տղաները մասնակցել էին այդ տեսահոլովակի նկարահանմանը, չէի՞ն կանխատեսել, որ նման խնդիրներ են լինելու:

- Ճիշտն ասած «Ռեինկարնացիան» եւ ես ոչ մի առնչություն չենք ունեցել այդ տեսահոլովակի նկարահանման հետ, քանի որ կազմակերպչական աշխատանքը, ամեն ինչ «Շարմ» հոլդինգն է արել, դա ընդունվել է որպես «Շարմ» հոլդինգի կողմից տեսահոլովակի հերթական առաջարկներից մեկը, թեեւ նախապես իմացել ենք, որ դա լինելու է Կարեն Կարապետյանի նախընտրական քարոզարշավի տեսահոլովակ: Եվ քանի որ հետո էլի ինչ-որ առաջարկներ են եղել քաղաքական (այսինքն՝ կոնկրետ միայն ՀՀԿ-ի առաջարկը չի, որ ընտրվել է, մյուսներինն էլ է ընտրվել), մենք հույս ունեինք, որ դա չի ընկալվի դեպի Հանրապետական կուսակցություն ուղղվածության նշան:

- Առաջիկայում է՞լ որ քաղաքական ուժի հարթակում կամ տեսահոլովակում կտեսնենք «Ռեինկարնացիային»:

- Ճիշտն ասած հիմա ոչ մի բան չեմ ուզում խոսել մեր առաջիկա ծրագրերի մասին: Ուզում ենք լռություն պահպանել: Ճիշտ չի, որ հիմա մենք խոսենք, ժողովուրդը խոսի, իրար քննադատենք եւ այլն: Դրա փոխարեն առաջիկա մեր աշխատանքների եւ գործունեության շնորհիվ մարդիկ իրենք էլ կտեսնեն, որ իրականում ոչ մի քաղաքական գործունեություն չենք ծավալում: Այսինքն՝ «Ռեինկարնացիան» միշտ երգում է ժողովրդի համար, կապ չունի պատվերը ով է տվել:

- Խմբի տղաները ինչպե՞ս են արձագանքել իրենց հասցեին քննադատություններին, այս աղմուկին: Նեղվե՞լ են:

- Ինչպես բոլոր երաժիշտները՝ իրենց հանդիսատեսից որոշակի նեղվածություն կա, քանի որ չէին մտածում, որ այսպես կատեգորիկ միանգամից կմտածեն, որ եթե այս տեսահոլովակում նկարահանվել է, ուրեմն վերջ, Հանրապետական կուսակցությանն է վաճառվել: Որովհետեւ երաժիշտները իրենք իրենց գործն են կատարում, իրենք ուղղակի նվագում են ու դրական լիցքեր են տալիս իրենց հանդիսատեսին:

- Այսինքն՝ իրենց համար միեւնույնն է, թե որ քաղաքական ուժը կառաջարկի նկարահանվել իր տեսահոլովակում:

- Այո, քանի որ որեւէ ձեւով «Ռեինկարնացիան» չի ներկայանում որպես որեւէ քաղաքական ուժի բաղադրիչ: Եղել է համերգի կամ տեսահոլովակի պատվեր, որն ընդունվել է:

- «Ռեինկարնացիա» խմբի տղաները ինչպիսի՞ քաղաքական հայացքներ ունեն: Որեւէ ուժի իրականում համակրո՞ւմ են:

- Ոչ, նույնիսկ հնարավոր է ընդդիմադիր ուժերի հետեւորդներ էլ լինեն նվագախմբում: Մենք քաղաքական թեմայով զրույց չենք ունեցել, որ իմանամ ով ինչ քաղաքական ուղղվածություն ունի, բայց հիմնականում անկուսակցական են:

- Վաղվա համերգը Համալիրի մեծ դահլիճո՞ւմ է:

- Ոչ, փոքր դահլիճում:

- Դա քանի՞ տեղանոց է:

- 2000 տեղանոց, կարծեմ:

- Այսինքն՝ հիմա կարելի է ասել, որ այդ բոլոր տոմսերը վաճառված են:

- Այո:

- Մոտավորապես, ինչքա՞ն է եղել վերադարձը:

- Ես, ճիշտն ասած, տոմսերի հետ կապված շատ հստակ տեղեկություններ չունեմ, դրանցով «Մարկ պրոդաքշընն» է զբաղվում, այնպես որ հստակ տեղեկություն չեմ կարող տալ, բայց կարծում եմ մոտ 10 տոկոսն է եղել:

- Հիմա դա վաճառվե՞լ է:

- Այո վաճառվել է, չգիտենք ում կողմից՝ գնվել: