«Այս ամենն իրականացնելու համար դեռ իրական ջանադրություն է պահանջվելու». քննարկում

«Տարիներ շարունակ քաղաքացիական հասարակությունը, դիտորդական կազմակերպությունները, քաղաքական ուժեր բարձրաձայնել են, որ ընտրողների ցուցակները կեղծվում են եւ օգտագործվում իշխանության շահերից բխող արդյունքներ արձանագրելու համար: Այս համաձայնագրով հիմքեր են դրվում լուծելու առաջ քաշված հարցերը». անդրադառնալով խորհրդարանական ընդդիմության եւ իշխանության կողմից շաբաթ օրը նախաստորագրված ՀՀ նոր ընտրական օրենսգրքում փոփոխություններ կատարելու վերաբերյալ հայտարարությանը՝ այսօր «Մեդիա կենտրոնում» հրավիրված քննարկման հայտարարեց «Թրանսփարենսի Ինթերնեյշնլ հակակոռուպցիոն կենտրոնի» փոխտնօրեն Սոնա Այվազյանը:

Միեւնույն ժամանակ, ըստ նրա, դեռ առաջարկվող մեխանիզմները պետք է կյանքի կոչվեն, որ երեւա, թե որքանով են գործուն, բայց տեսականորեն հույս են տալիս, որ պատշաճ վերահսկողության դեպքում կարող են կանխարգելել ցուցակների հաշվին ուռճացած թվեր ներկայացնելը եւ ընտրությունների արդյունքները կեղծելը:

«Իրավունքի Եվրոպա միավորում» հասարակական կազմակերպության անդամ Տիգրան Եգորյանն առանձնացրեց իր կարծիքով այն ամենաէական կետերը, որոնց շուրջ համաձայնություն է ձեռքբերվել:

«Ամենաէական կետերից է ստորագրված ցուցակների հրապարակման փաստը, որն էապես հնարավորություն կտա կանխարգելելու այլ անձանց փոխարեն քվեարկությունները, լցոնումները եւ քվեարկության արդյունքների կեղծման տեսքով արտահայտվող խախտումները»,- ընդգծեց փաստաբան Եգորյանը, հավելելով, որ էական է համարում նաեւ ընտրախախտումներ իրականացնողների նկատմամբ քրեական օրենսգրքում նախատեսվող խստացումները:

Չնայած այս փոփոխություններին, Եգորյանի համոզմամբ, չեն լուծվում բոլոր խնդիրները: Նա կարծում է, որ այս ամենն իրականացնելու համար դեռ իրական ջանադրություն է պահանջվելու:

«Իշխանությունը պետք է ստույգ երաշխիքներ տրամադրի հանրությանը, որ այն բոլոր համակարգերը, որոնք անհրաժեշտ են հրապարակված ցուցակների ստուգման համար, բացակայող անձանց ստուգման համար, պետությունը կիրառելու է: Ցանկացած անձի հանրապետությունից բացակայության եւ հանրապետությունում քվեարկության պահին ներկայության հարցը պետությունն ունակ է բացահայտելու եւ ներկայացնելու հանրությանը...Մենք կարծում ենք, որ այս կառուցողական կամքը պետք է շարունակվի, որ առաջիկայում ստեղծվի այնպիսի շտեմարան, որը հասանելի կլինի ընտրական պրոցեսի մասնակից բոլոր շահագրգիռ կազմակերպություններին եւ այդ ստուգումը պետության բացառիկ մենաշնորհը լինելուց կդադարի, եւ ցանկացած շահագրգիռ մեկը կկարողանա իրականացնել հանրապետությունում գտնվող եւ բացակայող անձանց ստուգում»,- նշեց Եգորյանը:

«Իրավունքի գերակայություն» ՀԿ-ի անդամ Արտակ Զեյնալյանն իր խոսքում կարեւորեց տեղամասերի՝ տեսախցիկներով հագեցման հնարավորությունը:

«Սա ամբողջը չի, այն, ինչ-որ քաղհասարակությունը եւ մենք որպես փորձագետներ առաջարկում էինք, սակայն էական է»,- ընդգծեց Զեյնալյանը:

Ամփոփելով Ընտրական օրենսգրքի փոփոխությունների շուրջ բանակցությունները՝ «Երևանի մամուլի ակումբի» նախագահ Բորիս Նավասարդյանն ասաց, որ այսպիսի ձգձգման պատճառն այն է, որ տարիներ շարունակ իշխանությունների նկատմամբ կուտակվել է հիմնավորված եւ խորը անվստահություն՝ խոստումները կատարելու առումով:

«Նույնիսկ խորհրդարանում ընդունած դրույթներից իշխանությունը հետո հետ է կանգնում, այնպես որ կան որոշակի մտահոգություններ: Բայց հույս ունենք, որ գոնե այս անգամ հիմքեր չունեն հետ կանգնելու»,- հույս հայտնեց Նավասարդյանը: Միեւնույն ժամանակ նա արձանագրեց Նոր ընտրական օրենսգրքում առկա մի քանի բացեր՝ հատկապես, կապված դիտորդների լիազորությունների, լրագրողների ազատ գործելու հնարավորության հետ:

Խոսք գնաց նաեւ այն մասին, թե ինչու քաղհասարակության ներկայացուցիչները չնախաստորագրեցին համաձայնագիրը:

Բորիս Նավասարդյանն ասաց, որ քաղհասարակության ներկայացուցիչների ֆունկցիան ի սկզբանե փորձագիտական խորհրդակցություն տրամադրելն էր եւ նախատեսված չի եղել, որ պետք է ստորագրեին: