Սպանվել է Գագիկ Պողոսյանը

Երեկ վաղ առավոտյան,  Թումանյան 35 հասցեում գտնվող բնակարանի մուտքում տեղի ունեցած պայթյունի արդյունքում զոհվել է ՊԵ նախկին նախարար, ՀՀ վարչապետի խորհրդական, վարչապետի վերահսկողական ծառայության պետ Գագիկ Պողոսյանը: Պայթյունը տեղի է ունեցել այն պահին, երբ Պողոսյանը բացել է իր բնակարանի դուռը: Հետագայում պարզվել է, որ Պողոսյանենց բնակարանի դռան բռնակին  նռնակ է հարմարեցված եղել: Պողոսյանին հիվանդանոց է տեղափոխել նրա վարորդը՝ կնոջ եւ որդու ուղեկցությամբ: Ստացած վերքերից, սակայն, Գ. Պողոսյանը հիվանդանոցում մահացել է: Բեկորային վնասվածքներ է ստացել նաեւ նրա որդին՝ Խաչատուր Պողոսյանը: Բժիշկների հավաստմամբ, նրա կյանքին վտանգ չի սպառնում: Ինչեւէ, հայաստանցիները ականատես են լինում եւս մեկ աղմկոտ սպանության: Չնայած, արդեն իսկ վարկածներ են հնչում, թե մահափորձը կարող էր ուղղված լինել ոչ թե Գ. Պողոսյանի, այլ նրա որդու դեմ: Նկատենք միայն, որ մարդասպանը չէր կարող հաշվի չառնել, որ դուռը կարող էր բացել Պողոսյանների ընտանիքի ցանկացած անդամ: Հիշեցնենք նաեւ, որ 1999 թվականի հոկտեմբերի 27-ից հետո սա առաջին աղմկոտ սպանությունն է Հայաստանում:

Ինչպես միշտ է պատահում նման դեպքերում, իրավապահ մարմինների տարածած տեղեկատվությունը այլ մանրամասներ չի պարունակում, եւ տեղի ունեցածի ընդհանրական պատկերը ստիպված ենք կառուցել ոչ պաշտոնական տեղեկությունների հիման վրա: Ըստ այդ տեղեկությունների, ահաբեկիչը, ամենայն հավանականությամբ, օգտագործել է «ԷՖ-1» տեսակի   մարտական նռնակ: Այդ մասին է վկայում դեպքի վայրում մեր գտած բեկորը: Նռնակը օղակը քաշած վիճակում դրված է եղել բռնակի եւ դռան արանքում: Դռան բռնակը ներքեւ իջեցնելուն պես նռնակը ընկել է ներքեւ եւ գլորվելով դեպի դուրս բացվող դռնից մոտ 60 սանտիմետր հեռավորության վրա՝ մի քանի վայրկյան անց պայթել: Այդ ժամանակ տանը եղել են Գ.Պողոսյանը, նրա կինն ու որդին: Պայթյունի պահին Գագիկ Պողոսյանը գտնվել է  շեմի վրա, որդին՝ նրանից քիչ ետ, կինը՝ սենյակում: Ուշագրավ է Պողոսյանների ընտանիքի հետ մտերիմ մի կնոջ պատմածը: Վերջինիս ասելով, երբ Գ.Պողոսյանը աշխատանքի գնալու սովորական ժամին մոտեցել է դռանն ու ներքեւ իջեցրել բռնակը, լսվել է պայթյունի նմանվող ուժեղ ձայն: Դա, հավանաբար, եղել է գետնին ընկնող նռնակի ձայնը: Ձայնը լսել է նաեւ հորը աշխատանքի ճանապարհող Խաչատուրը եւ փորձել հորը կանգնեցնել: Գագիկ Պողոսյանը, այդուհանդերձ, բացել է դուռը, եւ այդ պահին էլ տեղի է ունեցել պայթյունը: Բազմաթիվ բեկորային վնասվածքներ ստացած Գ.Պողոսյանը գիտակցությունը չի կորցրել եւ «Ինձ տեղ հասցրեք» ասելով՝ փորձել է իջնել աստիճաններով: Գիտակցությունը նա կորցրել է աստիճանների վրա: Գ.Պողոսյանը հիվանդանոց է տեղափոխվել իր ծառայողական մեքենայով, որը այդ պահին կանգնած է եղել շենքի մուտքի մոտ: Ըստ մեր ունեցած տեղեկությունների, Գագիկ Պողոսյանի մահվան պատճառը եղել է գլխի խոր վնասվածքը:

Առայժմ անհայտ է, թե երբ է գործել ահաբեկիչը՝ գիշերը, թե առավոտյան: Բնակարանի մուտքի անցուդարձին հետեւող տեսախցիկը, որի մոնիտորը տեղադրված է Պողոսյանների բնակարանում, որեւէ բան չի ֆիքսել: Ըստ մեր ունեցած տեղեկությունների, այն անջատված է եղել: Այս փաստը, թերեւս, խոսում է այն մասին, որ Գագիկ Պողոսյանը որեւէ սպառնալիք չի ստացել, կամ եթե սպառնալիքներ եղել են, ապա դրանց լուրջ չի վերաբերվել: Ընտանիքի մտերիմները հերքեցին այն լուրերը, թե Գ.Պողոսյանը դիմել է համապատասխան մարմիններին՝ իրեն թիկնապահ տրամադրելու խնդրանքով: Պետեկամուտների նախարարի պաշտոնից հեռանալուց անմիջապես հետո նա հրաժարվել էր թիկնապահների ծառայությունից:

Նկատենք, որ Գագիկ Պողոսյանի դեմ իրականացրած այս ահաբեկչությունը իր բնույթով նորություն է: Խնդիրն այն է, որ ահաբեկիչը ոչ մի կերպ չէր կարող կանխատեսել, թե ով կբացի դուռը՝ Գ.Պողոսյա՞նը, նրա կի՞նը, թե՞ որդին: Պողոսյանների ընտանիքի մտերիմներից մեկի հավաստմամբ, առաջինը սովորաբար դուռը բացում է երրորդ կուրսի ուսանող Խաչատուր Պողոսյանը, որը 8:30-ին գնում է դասի՝ համալսարան: Ահաբեկիչը չէր կարող կանխագուշակել նաեւ, որ 4 հարկանի շենքի երկրորդ հարկում գտնվող բնակարանի դռան բռնակին դրած նռնակը չի նկատի շենքի բնակիչներից եւ ոչ ոք:  Ավելացնենք, որ Գագիկ Պողոսյանը անցած կիրակի՝ սեպտեմբերի 9-ին նշեց իր 49 ամյակը: Ըսկ ընդամենը 11 օր անց՝ սեպտեմբերի 22-ին տեղի էր ունենալու Խաչատուր Պողոսյանի հարսանիքը: Վերջինս նոյեմբերի 12-ին դառնում է 20 տարեկան:

Հ.Գ. Կառավարությունից առայժմ հրաժարվեցին տեղեկացնել, թե վերջին շրջանում որտեղ էր ստուգումներ իրականացնում Գ. Պողոսյանի ղեկավարած վերահսկողական ծառայությունը: Մեզ հայտնի է միայն երկու գերատեսչություն՝ բնապահպանության եւ ՊԳԿ նախարարությունները: Ասենք նաեւ, որ դեպքի կապակցությամբ հարուցված գործի նախաքննությունը վարում է ՀՀ գլխավոր դատախազության ՀԿ գործերի բաժինը:

Հայկ Գեվորգյան

Տպագրվել է «Հայկական Ժամանակ» օրաթերթի՝ 2001 թվականի սեպտեմբերի 12-ի համարում