ՀԻՄԱ՝ ՏԱՆԻՔ ՈՒՆԵ՞Ս, ԹԵ՞ ՉՈՒՆԵՍ

Տասնհինգ տաքսու վարորդների` ճանապարհային ոստիկանության կողմից տասնյակ հազարավոր դրամների տուգանք է նշանակվել ավտոմեքենան ապօրինի կայանելու համար: Վարորդները պնդում են, որ այդ տարածքում կայանելու թույլտվությունն իրենց բանավոր կերպով տվել է Հենրիկ Նավասարդյանը, այնինչ ստացվում է, որ իրենց հանդեպ խարդախություն է եղել:

Ըստ վարորդների` պատմությունը հետեւյալն է: Ավելի քան երկու ամիս առաջ Երեւանի քաղաքապետարանը մի քանի մետր տեղափոխել է «Այրարատ» տոնավաճառի դիմացի մայթին` «Քուին բուրգերի» մոտ տեղակայված հասարակական տրանսպորտի կանգառը: Դրա հետ կապված, այդ տարածքում աշխատող տաքսիստներին եւս առաջարկել են մի փոքր տեղափոխել մեքենաների կայանատեղին: Հենրիկ Նավասարդյանն իր մի քանի գործընկերների հետ այցելել է տարածք եւ վարորդներին առաջարկել կանգառի երկու կողմերում` «Քուին բուրգերից» քիչ ներքեւ եւ դեպի դատարանի շենք, կայանել: «Մեզ ասացին` ձեզ ոչ մի «ԳԱԻ» նեղություն չի տա: Մի քսան վարորդի դիմաց իրենք խոստացան, որ խնդիր չենք ունենա»,- մեր զրույցում ասաց վարորդներից մեկը: Մեկ-երկու ամիս ոչ մի խնդիր չի եղել: Երրորդ ամսում արդեն վարորդները 5000-ական դրամ տուգանքների մասին ծանուցում են ստացել. ճանապարհային ոստիկանությունն այդ կայանումը համարել է անօրինական, տեսախցիկը օրվա մեջ նույն մեքենային մի քանի անգամ արձանագրել է կանոնների խախտում իրականացնելիս: Ըստ վարորդների, կայանատեղիում առկա է կայանումն արգելող նշան: Սակայն Նավասարդյանը վստահեցրել է, որ շուտով նշանը հանելու են: ՃՈ-ից էլ հայտնել են, որ եթե տրանսպորտի վարչությունը տեղադրած լիներ տաքսու կայանումը թույլատրող նշան, ապա իրենք տուգանքները չեղյալ կհամարեին: Վարորդները կարծում են, որ իրենց խաբել են` կանգառի տարածքը «մաքրելու» համար: «Մենք գտնում ենք, որ էս ամեն ինչի մեջ խարդախություն կա: Իրենք եկան մեր գլխի տակ փափուկ բարձ դրեցին, թե` ձեզ չեն նկարի, ձեզ ոչ մի պետավտոտեսուչ բան չի ասի: Գնացինք կանգնեցինք, հոպ-ստոպ` տուգանքն եկավ: Հիմա էդ 5000 դրամները, 1 հատ չի, 2 հատ չի, ո՞վ ա վճարելու: Մարդ կա 6 հատ ունի, մեկը` 7 հատ, 12 հատ տուգանք ունեցող կա: Ու էսպես` 15 մեքենա»,- պատմեց վարորդը, որը խնդրեց չհրապարակել իր անունը: Երբ տաքսիստները փորձել են ՃՈ-ից պարզել, թե ինչու են տուգանվում, այնտեղ պատասխանել են` սա դեռ ինչ է, ծանուցումների կեսը դեռ «ճանապարհին» է:

Քաղաքապետարանի տրանսպորտի վարչության պետը մեզ հետ զրույցում իրեն անտեղյակի նման պահեց: «Ես չգիտեմ ինչի մասին է խոսքը»,-ասաց Նավասարդյանը: Փորձեցինք ներկայացնել խնդիրը: Պաշտոնյան միանգամից ընդհատեց պատմությունը, թե`«էդպես միք ներկայացնի», ակամա ցույց տալով, որ խնդիրն իրեն ծանոթ է: «Ոչ մի բան չենք ակտավորում, ես չգիտեմ ինչի մասին է խոսքը: Իրենք կդիմեն մեզ, մենք կպատասխանենք, երբ որ չի բավարարի` հարցազրույց կտանք»,-ասաց Նավասարդյանը, որը պնդեց, թե մոտ երկու ամիս ոչ մեկի չի հանդիպել: Իսկ 2,5 ամիս առա՞ջ` հարցրինք: «Ես խնդրում եմ ինձ հեռախոսով ոչ մի բան մի հարցրեք: Դուք գրեք, ես գրավոր կպատասխանեմ»,- ասաց Հենրիկ Նավասարդյանը:

- Պարոն Նավասարդյան, սա ձեր անձի շուրջ բարձրացած երկրորդ աղմուկն է: Քաղաքացիները պահանջում են ձեր հրաժարականը: Հրաժարական տալու՞ եք:
- Ես չեմ ուզում ձեր հարցերին պատասխանել, որովհետեւ ամեն ինչ մենք պատասխանել ենք, եւ երեկ էլ քաղաքապետը պատասխանել է:

- Ասում են, որ դուք «վերեւում» աջակցություն ունեք, այդ պատճառով հրաժարական չեք տալիս:
- Ոչ մի ավելորդ հարց: Գրեք պաշտոնական, ես ձեզ պաշտոնական կասեմ:

- Դուք «տանիք» ունե՞ք:
- Ես հիմա զբաղված եմ, բայց էնքան երկար եք հարցեր տալիս:

Այս խոսքերից հետո Նավասարդյանն անջատեց հեռախոսն ու անհասանելի դարձավ:

Երեկ տաքսու վարորդները մի պահ միացան քաղաքապետարանի մոտ նստացույց անող քաղաքացիներին: Երեւանի փոխոստիկանապետ Վալերի Օսիպյանը վարորդներին խոստացավ միջնորդ հանդիսանալ, որպեսզի կողմերը քննարկեն հարցը: Նա վարորդների հետ պայմանավորվեց, որ այսօր հանդիպեն ՃՈ Երեւան քաղաքի վարչությունում՝ խնդիրը պարզաբանելու։ Տաքսիստները մեր զրույցում հույս հայտնեցին, որ հարցին լուծում կտրվի: Հակառակ դեպքում, եթե այսօր խնդիրը չլուծվի, մտադիր են կանգնել իրենց նախկին կայանատեղիում, որն այժմ ավտոբուսների կանգառ է, խոչընդոտելով հասարակական տրանսպորտի աշխատանքը:

Գագիկ Աղբալյան