ԲՀԿ-ի ակցիան տապալել է

Տաքսիստների կազմակերպած ցույցին ներկա էին Կապի եւ տրանսպորտի նախարար Գագիկ Բեգլարյանը, ԲՀԿ պատգամավորներ Վարդան Օսկանյանը, Վահե Էնֆիաջյանը, Վահան Բաբայանը: Սակայն, երբ Գագիկ Բեգլարյանը զրուցում էր «Քաղաքացիական դիրքորոշում» հկ-ի նախագահ Գեւորգ Դոստուրյանի հետ, ԲՀԿ պատգամավորները առանց տաքսու վարորդներին մոտենալու` գնացին: Այս կապակցությամբ Վահան Բաբայանը իր ֆեյսբուքյան էջում գրել է, որ ինքն ու իր գործընկերները եկել են անակնկալի, քանի որ տաքսիստների իսկ հրավերով պետք է կայանար ԲՀԿ պատգամավորական խմբակցության պատգամավորների հանդիպումը տաքսիստների հետ: «Մինչ մեր ժամանումը հանդիպումն արդեն սկսվել էր, բայց ոչ թե մեր, այլ ՀՀ Տրանսպորտի եւ կապի նախարար Գագիկ Բեգլարյանի հետ, եւ մենք նպատակահարմար չգտանք միանալ այդ քննարկումներին, քանի որ ակցիայի կազմակերպիչները բազմաթիվ անգամ դիմել էին մեր խմբակցությանը` նման հանդիպում կազմակերպելու խնդրանքով եւ նախապես պայմանավորվել էին հանդիպել մեր պատգամավորների հետ: Հիշեցնեմ նաեւ, որ տաքսիստների հասարակական նախաձեռնության ղեկավարները օրերս հանդիպել էին ԱԺ ԲՀԿ խմբակցության քարտուղար Նաիրա Զոհրաբյանի ու այլ պատգամավորների հետ, եւ ԲՀԿ-ն իր պատրաստակամությունն էր հայտնել աջակցելու` նրանց խնդիրները խորհրդարանում վեր հանելու եւ լուծում տալու հարցում: Քիչ առաջ ԱԺ ԲՀԿ խմբակցության քարտուղար Նաիրա Զոհրաբյանի հետ խոսել է ակցիայի կազմակերպիչ` «Քաղաքացիական դիրքորոշում եւ ակտիվ հասարակություն» ՀԿ նախագահ Գեւորգ Դոստուրյանը, ով վստահեցրել է, որ այսօրվա ակցիային հրավիրված են եղել բացառապես ԲՀԿ պատգամավորները»,-գրել է ԱԺ պատգամավոր Վահան Բաբայանը:

Երեկ  Գեւորգ Դոստուրյանը մեզ հետ զրույցում ասաց, որ իրենք նամակ են գրել ՀՀ վարչապետին, որի մեջ մասնավորապես ասվում է, որ տաքսու լիցենզավորման օրենքի եւ կարգի նոր նախագիծը անհանգստություն է առաջացրել բազմաթիվ տաքսու վարորդների մոտ: «Թեեւ ներկայացվում է, որ նոր նախագիծը ավելի է պարզեցնում լիցենզավորման պրոցեսը եւ դեղին համարների վերացմամբ էժանացվում է` բանն այն է, որ նախ մեծ մասը արդեն ավել գումարի ծախսը արել է եւ երկրորդ, որը ամենակարեւորն է, այդ դեղին համարի կամ նոր առաջարկվող թղթի կտորի նպատակը դաշտը օրինականացնելն էր, որն էլ նույնիսկ դեղին համարով այս հինգ տարիների ընթացքում չի արվել: Էլ ոնց հավատանք, որ այդ թղթի կտորով կանեք, հետեւաբար խնդրում ենք` մինչ նոր նախագիծ առաջարկելը այս գործող դեղին համարների միջոցով (որը ակնհայտ  ավելի հեշտ է) դաշտը գոնե 95 տոկոս օրինականացրեք,  թող մեկուկես տարի անցնի, տեսնենք, որ կարողանում ենք օրինական դաշտը ապահովել, այդ ժամանակ նոր նախագիծ առաջարկեք»,- Դոստուրյանի փոխանցմամբ նշված է ՀՀ վարչապետին ուղղված նամակում:

Կապի եւ տրանսպորտի նախարար Գագիկ Բեգլարյանը լրագրողներին նախ ասաց, որ կխոսի վարորդների հետ, ապա նոր լրագրողները կմոտենան, սակայն լրագրողները մոտեցան եւ վերջիններիս ներկայությամբ Բեգլարյանը լսեց տաքսիստների մտահոգությունը եւ փորձեց պարզաբանումներ տալ` ապրիլի 1-ից ուժի մեջ մտնող նոր օրենքի պահանջների մասին: Վերջինս` Դոստուրյանի հետ զրույցում ասաց. «Էն ինչ-որ արվում է այսօր կառավարությունում, արվում է բոլորի համար: Հիմա 30 հոգի հավաքված ենք, խոսում ենք 5000-6000 ավել մարդու համար, որոնք այլ բան են պահանջում: Իրականում ՀՀ Կառավարությունը հօգուտ տաքսիստների որոշում է կայացրել ու զարմանալի է, որ դու (նկատի ունի  Դոստուրյանին) շարունակում ես այդ թեման»: Նա նաեւ հայտարարեց, թե Գեւորգ Դոստուրյանն առաջնորդվում է իր շահերով, քանի որ նոր օրենքն ուժի մեջ մտնելուց հետո տվյալ հկ-ն այլեւս չի կարողանալու տաքսիստներից 5000 դրամ գանձել (խոսքը հարկային մարմիններին ներկայացվող փաստաթղթերի համար տաքսիստներին աջակցություն ցուցաբերելու դիմաց ստացվող գումարի մասին է- հեղ.), քանի որ նրանք մուծելու են միայն պետական տուրք՝ 12 հազար դրամ՝ նախկին 17 հազարի դիմաց։ Դոստուրյանն էլ ի պատասխան ասաց. «Դուք փորձում եք քողարկել պետության անգործությունը»։ «Անբարո բաներ մի խոսա, ես ոչ մի բան չեմ քողարկում։ Ես չեմ թողնի որեւէ մեկին այս մարդկանց հաշվին գումար աշխատել, դրանցից մեկը դու ես»,- բարկացած նշեց նախարարը։  Ապա դիմելով լրագրողներին` ասաց. «Հիմա իմաստը հասկացաք ինչումն է, իրանց պահանջը այս մարդկանց գումարը՝ ամսական 5000 դրամ գանձելն է,  մենք զրկել ենք էս մարդկանց բիզնեսից»,-նշեց Բեգլարյանը: Նաեւ հավելեց, որ կառավարությունը, հանելով դեղին համարանիշերը, լուծում է հենց հավասարության խնդիրը։ «Ես ընդունում եմ, որ  չորս տարի եղել եք անհավասար դաշտում, բայց մենք արդարությունը վերականգնեցինք»,-ասաց նա: Տաքսիստների գրեթե բոլոր հարցերին պատասխանելուց հետո` Բեգլարյանը հարցրեց ներկաներին. «Ես ուզում եմ լսել, իմ բացատրելուց հետո՝ լավա՞, թե՞ վատ մի հատ բարձր ասեք` լավա, արա, տղա՛ եք»։ Տաքսիստները կրկնեցին` «լավա»: «Հարգելի լրագրողներ, դուք լսեցի՞ք, որ տաքսիստներն ասում են՝ լավա»,- լրագրողներին ասաց Բեգլարյանը:

Գեւորգ Դոստուրյանը եւ մի քանի վարորդներ մեզ հետ զրույցում ասացին, որ նախարարի պարզաբանումից հետո էլ միեւնույն է չեն հավատում, որ դաշտը կկարգավորվի:

Տաթեւ Խաչատրյան