Օրենքի եւ էթիկայի խախտում

Դատական նիստին չէր ներկայացել սպանված Կարեն Եսայանի մոր` Անահիտ Իսկանդարյանի փաստաբան Վարդուհի Էլբակյանը: Դատական նիստի ընթացքում դատարանը լսեց գործով չորս վկաներ` ավտոլվացման կետի պահակ Մանվել Թորոսյանին, ամբաստանյալ Հարություն Սարգսյանի ընկեր Արմեն Խաչատրյանին, ամբաստանյալի հարեւան Վլադիմիր Ղազարյանին եւ տաքսու վարորդ Արտաշես Զաքարյանին: Ամբաստանյալ Հարություն Սարգսյանի պաշտպան Լուսինե Սահակյանը մեզ հետ զրույցում ասաց, որ քրեական գործով չկա գոնե մեկ ցուցմունք կամ ապացույց, որով կարող է հիմնավորվի Հարություն Սարգսյանի առնչությունը սպանության կատարմանը: «Այսօրվա չորս վկաներից մեկը` Արմեն Խաչատրյանը` Հարություն Սարգսյանի ընկերը, ցուցմունք էր տալիս այն մասին, որ ինքը Հարություն Սարգսյանի միջնորդությամբ ավտոմեքենա է ձեռք բերել, ընդ որում նաեւ հայտնեց, որ նախաքննության ընթացքում նա ապօրինի զրկվել է ազատությունից, իրեն բերման են ենթարկել ոստիկանության բաժին անօրինական կարգով, այնուհետեւ պահել են երկու օր շարունակ այնտեղ, այն բանի համար, որ ինքը հեռախոսազրույց է ունեցել Հարություն Սարգսյանի հետ»,-փոխանցեց պաշտպան Լուսինե Սահակյանը: Մեր հարցերին ի պատասխան նա ասաց, որ գործով մյուս երեք վկաների ցուցմունքներով եւս հիմնավորվեց, որ նախաքննությունը կատարվում է օրենքի խախտումներով:

Անդրադառնալով ամբաստանյալ Հարություն Սարգսյանին` Սահակյանը նշեց, որ իր պաշտպանյալը իր մեղքն ընդունել է մասնակի. «Հարություն Սարգսյանին երկու հոդվածով է մեղադրանք առաջադրված` առաջինը դա սպանություն կատարելու մեջ, որով նա իրեն մեղավոր չի ճանաչում, ի սկզբանե երբեք չի ճանաչել ու հիմա էլ չի ճանաչում, իսկ 188 հոդվածի 1-ին մասով (ապօրինի ձեռնարկատիրություն վարելը) իրեն մեղավոր է ճանաչում»,-ասաց Լուսինեն:

Հարցին, թե ինչո՞վ են պայմանավորված այս դատական նիստերի ընթացքում կրկնվող միջադեպերը, ի պատասխան ասաց, որ այս գործով բոլոր դատական նիստերին էլ միջադեպեր լինում են. «Լարվածությունը գալիս է նրանից, որ Կարեն Եսայանի մայրը վստահ է, որ սպանություն կատարողը Հարություն Սարգսյանն է, եւ այդ վստահությունը գալիս է նրանից, որ ի սկզբանե` նախաքննության ընթացքում մամուլում հրապարակումներ եղան` իբրեւ թե Հարություն Սարգսյանը իրեն մեղավոր է ճանաչել, իբրեւ թե Հարություն Սարգսյանը տարել եւ ինչ-որ զենքի տեղ է ցույց տվել, որովհետեւ հանրապետության ոստիկանապետը հայտարարել է, որ հանցագործությունը բացահայտված է: Այսինքն` ի սկզբանե մայրը տրամադրված է, թե իբր հանցագործություն կատարողներից մեկը ( իր դիրքորոշումն այն էր, որ մի խումբ անձինք են սպանություն կատարել) Հարություն Սարգսյանն է»,-պատասխանեց Լուսինե Սահակյանը: Ինչպես նաեւ ամբաստանյալ Հարություն Սարգսյանի պաշտպանն ասաց, որ քանի որ քրեական գործում ընդհանրապես ոչ մի ապացույց չկա, որ Սարգսյանը սպանություն է կատարել, ինչպես մեղադրողները, այնպես էլ տուժողի իրավահաջորդի ներկայացուցիչները պարբերաբար աշխատում են ստեղծել այնպիսի տպավորություն, իբրեւ թե իրենք ունեն բազմաթիվ ապացույցներ, բազմաթիվ ցուցմունքներ եւ պարբերաբար երկար հարցեր են տալիս վկաներին` եւ այն վկաներին, որոնք ընդհանրապես ոչ մի առնչություն չունեն քրեական գործի հետ, որովհետեւ քրեական գործով մեկ ապացույց գոյություն չունի, որով կհիմնավորվի, որ Հարություն Սարգսյանը սպանության հետ առնչություն ունի: «Ըստ այդմ, քանի որ նրանք թույլ են տալիս քրեական դատավարության օրենսգրքի կոպիտ խախտումներ, բացի դրանից էթիկայի կոպիտ խախտումներ, դատարանում ստեղծվում է լարված իրավիճակ, որովհետեւ պաշտպանական կողմը փորձում է նրանց բերել քրեական դատավարության դաշտ, այսինքն` որպեսզի նրանք գործեն օրենքով սահմանված կարգով»,-հավելեց պաշտպան Սահակյանը: Հարցին, թե այս լարված իրավիճակում ի՞նչպիսին է դատավոր Սարոյանի պահվածքը, պատասխանեց հետեւյալ կերպ. «Դատարանում չի պահպանվում դատական նիստի կարգը, որպեսզի դատավարության մասնակիցները կարողանան օրենքով սահմանված կարգով իրենց լիազորությունները նորմալ իրականացնել»:

Հաջորդ դատական նիստը տեղի կունենա այսօր` ժամը 12:00-ին:

Տաթեւ Խաչատրյան