«Առանց անցքերի հնարավոր չէր ստանալ այն արդյունքը, որին հասարակությունն ականատես եղավ ամանորյա օրերին». Գրիգորյան

Երևանի քաղաքապետի տեղակալ Սուրեն Գրիգորյանը հայտնել է, որ քաղաքապետարանն ամփոփել է 2023 թվականի ամանորյա լուսավորության ծրագրի իրականացման աշխատանքները, նշել, որ Հանրապետության հրապարակի շենքերին արված անցքերը նույնպես փակվել են:

«Հայկական ժամանակ»-ի հետ զրույցում Գրիգորյանը, հակառակ պնդումներին, ասում է՝ ամանորյա լուսավորության համար շենքերին արված անցքերը որևէ կերպ չեն կարող համարվել վնաս՝ դրանք համարելով «անհրաժեշտ ներգործություն»։ Վերջինիս հավաստմամբ՝ առանց անցքերի հնարավոր չէր ստանալ այն արդյունքը, որին հասարակությունն ականատես եղավ ամանորյա օրերին՝ հաշվի առնելով նախագծի իրականացման սեղմ ժամկետները։

«Եթե ունենայինք ավելի երկար ժամանակ, գուցե այլ արդյունք ստանայինք, բայց հաշվի առնելով, որ ժամկետները սեղմ էին, որովհետև պարտադիր էր լուսավորության զարդարանքներն ավարտել մինչև «Մանկական Եվրատեսիլի» բացման արարողությունը, ժամկետները տեղափոխվեցին։ Անցքերի փակման գաղափարը չի առաջացել հնչած քննադատությունից հետո, ի սկզբանե պայմանագիրը կնքելու ժամանակ նախատեսված էր այդ պարտավորությունը կապալառու ընկերության համար, և, ի վերջո, անցքերը փակվել են՝ դրանց փակման մեթոդաբանությունը համաձայնեցնելով Ճարտարապետության և շինարարության Հայաստանի ազգային համալսարանի հետ»,- մանրամասնում է նա:

Փոխքաղաքապետի խոսքով՝ կապալառու ընկերությունը փակել է միայն ամանորյա լուսավորության համար իր արած անցքերը։

«Ինչպես բազմիցս նշել եմ, Հանրապետության հրապարակի շենքերը տարիներ ի վեր տարբեր առիթներով ենթարկվել են ներգործության, բայց կապալառու ընկերությունը հարթել է միայն իր արած ներգործությունը։ Շենքերի վրա կան բաներ, որոնք տասնամյակների պատմություն ունեն ու իրականցվել են տարբեր նախագծերի շրջանակներում։ Շատ հեշտ ապացուցելի է, որ անցքերն էին նոր, որոնք՝ հին, այսինքն՝ վաղուց առկա էին շենքերի վրա»,- վստահեցնում է Գրիգորյանը։

Ըստ նրա՝ օրեր առաջ Կառավարության աշխատակազմի գործերի կառավարչի հետ քննարկվել է նաև շենքերին այդ ժամանակ հասցված վնասները կարգավորելու հարցը։ Պետք է հստակեցնել, թե ինչ միջոցներով ու մասշտաբներով է արվելու։ Այստեղ իրականացնողը քաղաքապետարանը չէ, Գրիգորյանը, սակայն, չի բացառում փոքր ներգրավվածությունը․ «Ես ինքս տեսել եմ, որ անցքեր կան, որոնք մեր արած անցքերից չափերով ավելի մեծ են, կամ քարերը կոտրված են։ Այդ բոլորը փորձելու ենք կարգավորել»։

Երևանի քաղաքապետարանի ներկայացուցիչը նաև հիմա, երբ փակվել են ամանորյա զարդարանքների համար արված անցքերը, չի բացառում ապատեղեկատվության ու մանիպուլյացիոն գործընթացները։ Հիշեցնում է մի դեպք, երբ «5-րդ ալիք» հեռուստատեսության լրագրողն ամանորյա անցքերի վերաբերյալ խոսակցությունների ֆոնին կադրի համար հեղյուսը մտցրել էր հրապարակի շենքերից մեկի պատի մեջ:

«Այդ ժամանակ հեղյուսը մտցրել էր անցքն ու նկարագրել, թե մենք ենք արել, բայց բոլորս էլ ականատես եղանք, որ մենք չենք։ Քաղաքացիների մոտ տպավորություն էր, որ շենքերն ամբողջական վիճակում են եղել, ու հիմա ինչ կա, այդ պրոցեսից հետո է եղել։ Այժմ մտավախություն կա, որ նույն կերպ կգործեն և կմանիպուլացնեն։ Բայց այս անգամ բոլոր պնդումները պետք է պատրաստ լինեն ըստ օրենքի ապացուցել»,- ասում է Գրիգորյանը։

Հարցին՝ իսկ Երևանում պատմամշակութային շենքերին գովազդներ փակցնել թույլ չտալու համար վերահսկող մեխանիզմներ գործարկվելո՞ւ են, Սուրեն Գրիգորյանը նշում է․ «Այս մասով նույնպես քննարկումներ ենք ունեցել։ Մշակում ենք ուղեցույցներ։ Կարծում եմ՝ առաջիկա ավագանու նիստին կներկայացնենք հարցը։ Ոչ միայն պատմամշակութային շենքերին փակցվող, այլ ընդհանրապես որևէ շենքին գովազդ փակցվելու գործառույթները կվերանայվեն»:

Փոխքաղաքապետը վստահ է՝ հնարավոր է ունենալ մեխանիզմ, որն իսկապես կվերահսկի այդ գործընթացը։ Բացի տուգանքներից և գովազդի թույլտվության կարգերը վերանայելուց, անհրաժեշտ է քաղաքացիների մոտ հանրային պատասխանատվությունն առաջ մղել, որպեսզի հասկանանք՝ բիզնեսը պատմամշակութային արժեքներից վեր չէ։