Սելին Դիոնը հետաձգել է համերգային շրջագայությունը Եվրոպայում. երգչուհին հազվադեպ հանդիպող բարդ հիվանդություն ունի

Կանադացի երգչուհի Սելին Դիոնը հայտնել է, որ իր մոտ հազվագյուտ հանդիպող նյարդաբանական հիվանդություն է ախտորոշվել և ստիպված է չեղարկել հաջորդ տարի Եվրոպայում նախատեսված համերգները։

«Ինստագրամ»-իր իր էջում երկրպագուներին ուղղված տեսաուղերձում 54-ամյա երգչուհին խոստովանել է, որ իր մոտ վերջերս ախտորոշվել է մկանային կծկման համախտանիշ՝ քիչ ուսումնասիրված պրոգրեսիվ հիվանդություն, որի ժամանակ մարմնի տարբեր մասերում սկսում է մկանային սպազմ առաջանալ։ Սա ցավ է բերում, սահմանափակում հիվանդի շարժունակությունը և խանգարում նրան նորմալ կյանք վարել։

«Ցավոք սրտի, սպազմերն ու կծկումները ազդում են իմ առօրյա կյանքի բոլոր ասպեկտների վրա: Դա տեղի է ունենում, երբ ես քայլում եմ կամ երբ փորձում օգտագործել իմ ձայնալարերը այնպես, ինչպես սովոր եմ»,- կիսվել է երգչուհին սոցիալական ցանցում, որին կա բաժանորդագրված 5,2 միլիոն մարդ: 

BBC-ն գրում է, որ, ըստ ԱՄՆ-ի Ջոնս Հոփքինսի համալսարանի ուսումնասիրության, մկանային կծկման համախտանիշը լինում է միլիոն մարդուց 1-2-ի մոտ: Իսկ այն դեպքերում, երբ հիվանդի մոտ սա ախտորոշվում է, նա և նրա ընտանիքը ավելի շատ հարցեր են ունենում, քան պատասխաններ, ասվում է համալսարանի կայքում:

Սելին Դիոնը բացատրել է, որ երկար ժամանակ տառապում էր ուժեղ ցավերից, և միայն վերջերս բժիշկները կարողացան հասկանալ, թե ինչից են դրանք առաջանում:

«Ես երկար ժամանակ պայքարում էի առողջական խնդիրների հետ: Եվ ինձ համար շատ դժվար էր դիմակայել այս փորձություններին և խոսել այս ամենի մասին»,- ասել է Դիոնը՝ հազիվ զսպելով իր արցունքները:

Փորձելով չարտասվել՝ երգչուհին բացատրել է, որ որոշել է խոսել հենց հիմա, քանի որ բժիշկները հասկացել են, որ նրա բոլոր սպազմերը պայմանավորված են հենց մկանային կծկման համախտանիշով։

«Ես ունեմ բժիշկների հիանալի թիմ, որն օգնում է ինձ ավելի լավ զգալ, և թանկագին երեխաներ, որոնք աջակցում են ինձ և հույս տալիս»,- ասել է Դիոնը։

Երգչուհու խոսքով՝ ինքն ամեն օր աշխատում է սպորտային թերապևտի հետ, որպեսզի վերականգնի իր ուժերը և կրկին ելույթ ունենալու հնարավորությունը։ «Բայց պետք է խոստովանեմ, որ սա շատ բարդ գործընթաց է»,- շեշտել է նա։

Երգչուհու եվրոպական շրջագայությունը պետք է սկսվեր 2023 թվականի փետրվարին, սակայն նա որոշել է չեղարկել այն, որպեսզի կենտրոնանա իր առողջության վրա։

Ներկա պահին գիտնականները չգիտեն, թե կոնկրետ ի՞նչն է առաջացնում մկանների կծկման սինդրոմը, բայց նրանք դա կապում են ուղեղի և ողնաշարի մարմնի ինչ-որ սխալ աուտոիմուն արձագանքի հետ:

Այս հիվանդության ախտորոշումը դժվար է, այն հաճախ շփոթում են այլ հիվանդությունների հետ, ինչպիսիք են՝ Պարկինսոնի հիվանդությունը կամ բազմակի սկլերոզը:

Հիվանդությունը կարող է ախտորոշվել արյան անալիզով, այն համարվում է անբուժելի, սակայն դրա զարգացումը դանդաղեցնելու և կյանքի որակը բարելավելու համար բժիշկները նշանակում են մի շարք դեղամիջոցներ և տարբեր թերապիաներ։

Սելին Դիոնն իր կարիերան սկսել է 1988 թվականին՝ հաղթելով «Եվրատեսիլ» երգի մրցույթում, որտեղ նա ներկայացնում էր Շվեյցարիան։ Այդ ժամանակից ի վեր վերջինս վաճառել է ավելի քան 220 միլիոն ալբոմ ամբողջ աշխարհում՝ դառնալով բոլոր ժամանակների առևտրային առումով ամենահաջողակ արտիստներից մեկը: Նրա «My Heart Will Go On» երգը «Տիտանիկ» ֆիլմից դարձավ համաշխարհային հիթ։

2016 թվականին Դիոնը ժամանակավորապես ընդհատեց համերգային գործունեությունն այն բանից հետո, երբ նրա ամուսին և մենեջեր Ռենե Անջելիլը մահացավ կոկորդի քաղցկեղից, իսկ երկու օր անց քաղցկեղից մահացավ նաև երգչուհու ավագ եղբայրը՝ Դանիելը։

Կյանքի դժվար շրջանից հետո Դիոնը բեմ վերադարձավ 3 տարի անց՝ 2019 թվականին։