Զախարովայի հայտարարությունները սպառնալիք են՝ վատ կլինի ձեզ համար, եթե շարունակեք աշխատել Արևմուտքի հետ. քաղաքագետ

Քաղաքագետ Ստեփան Գրիգորյանի կարծիքով՝ ՌԴ ԱԳՆ պաշտոնական ներկայացուցիչ Մարիա Զախարովայի հայտարարությունները, ըստ որոնց՝ Հայաստանին Արևմուտքն աննախադեպ արտաքին ճնշման է ենթարկում, իրականությանը չեն համապատասխանում, այլ կերպ ասած՝ ճիշտ չեն:

Գրիգորյանը նկատում է՝ հակառակը՝ Ռուսաստանն է Հայաստանից զիջումներ պահանջում, նրանք են Ադրբեջանի հետ համատեղ «Զանգեզուրի միջանցք»-ի հարց բարձրացնում:

«Ռուսաստանը միանշանակ աջակցում է Ադրբեջանին, նրանց կատարած ագրեսիան էլ ագրեսիա չի համարվում, այլ մինչսահմանային բախում: 44-օրյա պատերազմից հետո 2 տարի է անցել, ի՞նչ է արել Ռուսաստանը մեզ համար: Ոչ թե Արևմուտքն է շահարկում Հայաստանի հետ կապված հարցերը, այլ հենց Ռուսաստանն է Ադրբեջանի հետ Հայաստանի դեմ քայլեր կատարում: ՌԴ-ը ռազմական դաշնակցի իր պարտականությունները չի կատարում: Արևմուտքն է սկսել ակտիվ աշխատել Հարավային Կովկասի երկրների հետ, իսկ Ռուսաստանը «խանդով» է նայում այս ակտիվ միջամտությանը»,- կարծում է նա:

Հարցին՝ Մարիա Զախարովան ասել է, թե Արևմուտքն ակնհայտորեն փորձում է տեղափոխել Ուկրաինայում մշակված սխեմաները, կարելի՞ է ենթադրել, որ Ռուսաստանը Հայաստանին սպառնում է ուկրաինական սցենարո՞վ, Գրիգորյանն ասում է՝ ՌԴ-ը, հնարավոր է, Ադրբեջանի միջոցով լարվածությունն ակտիվացնի ՀՀ-ում:

«Այո, սա մասամբ սպառնալիք է, ակնարկ, որ վատ կլինի ձեզ համար, եթե շարունակեք ակտիվ աշխատել Արևմուտքի հետ: Սակայն մենք պետք է մեր շահերով առաջնորդվենք: Ընդդիմությունն էլ ասում է՝ դուք փչացնում եք հարաբերությունները Ռուսաստանի հետ. հարց է առաջանում՝ ի՞նչ է արել ՌԴ-ը մեզ համար, կանգնեցրե՞լ է Ադրբեջանի ագրեսիան. ոչինչ չի՛ արել, մի բան էլ համագործակցում է նրանց հետ: Նիկոլ Փաշինյանը փորձեց ՌԴ-ի հետ պահպանել հարաբերությունները, համբերատար սպասում էր Ռուսաստանի կողմից քայլերի, իսկ երբ տեսավ, որ ՌԴ-ն աջակցում է Ադրբեջանին, ստիպված եղավ դիմել միջազգային հանրությանը, ՄԱԿ-ի անվտանգության խորհրդին, Եվրամիությանը և այլն»,- ընդգծում է քաղաքագետը:

Վերջինս կարծում է՝ ՀՀ իշխանությունն ավելի վաղ պետք է արձագանքեր սպառնալիքներին և դիմեր միջազգային հանրությանը. «Որքա՞ն պետք է Հայաստանն սպասեր Ռուսաստանի աջակցությանը, այնքան, մինչև Հայաստանը մասնատեի՞ն, մինչև «Զանգեզուրի միջանցք» ասվածն իրականություն դարձնեի՞ն: Միայն իշխանությունը չէ պատասխանատու Հայաստանի համար, ընդդիմությունն էլ է պատասխանատու»:

Անդրադառնալով ՌԴ ԱԳՆ խոսնակի այն հայտարարությանը, թե Հայաստանում առաքելություն իրականացնող ԵՄ և ԵԱՀԿ խմբերի ներգրավելու որոշումը կայացվել է հապճեպ և լի է վտանգներով՝ զրուցակիցն ասում է՝ սա իրականում լրջագույն իրադարձություն է:

«Դիտորդական առաքելություն ուղարկելը Հայաստան ստրատեգիկ փոփոխություն է մեր տարածաշրջանի համար: ՌԴ խաղաղապահներն են Լեռնային Ղարաբաղում, նրանց զորքն է Հայաստանում: Իսկ հիմա ԵՄ և ԵԱՀԿ դիտորդական առաքելությունները եկել են Հայաստան, և Ռուսաստանի մոնոպոլիան քանդվեց: Սա է պատճառը, որ ՌԴ-ն իր դժգոհություններն է հայտնում: Դիտորդները լրացուցիչ «աչքեր են», որոնք կհետևեն ու կարձանագրեն, թե ով է խախտում հրադադարը: Մինչ այս ՌԴ-ն կարող էր մանիպուլացնել՝ ասելով, թե սադրանքը Հայաստանի տարածքի նկատմամբ չէ, դա վիճելի տարածք է: Հիմա նրանք զրկվում են մանիպուլյացիոն հայտարարություններ անելուց»,- նկատում է նա:

Խոսելով ՌԴ ԱՊՀ գործերի, եվրասիական ինտեգրման և հայրենակիցների հետ կապերի հանձնաժողովի նախագահ Կոնստանտին Զատուլինի մուտքը Հայաստանի Հանրապետություն արգելելու մասին՝ Գրիգորյանը նշում է՝ ուրախ է, որ ՀՀ իշխանությունն սկսել է օգտագործել «պերսոնա նոն գրատա» ինստիտուտը:

«Երբ որոշ դիվանագետներ դաժան ու սուբյեկտիվ կարծիք են հայտնում հայ ժողովրդի մասին, աղավաղում են մեր պատմությունը, Ղարաբաղի հարցի էությունը, պարզ է, որ պետք է օգտագործվի այդ ինստիտուտը, և ուրախ եմ, որ այն օգտագործվել է: Զատուլինը սխալ թույլ տվեց, երբ սկսեց խառնվել մեր ներքին գործերին, երբ խոսում էր, թե իշխանությունները պետք է հեռանան: Ես ուրախ եմ, որ ՀՀ իշխանությունները սկսել են օգտագործել «պերսոնա նոն գրատա» ինստիտուտը, նրանք ճիշտ ճանապարհի վրա են»: