Ծեծկռտուք Երևանում. Ռոման Բաղդասարյանը հայտնում է քաղաքական հայացքների համար բռնության ենթարկվելու մասին

Այսօր երեկոյան Երևանում միջադեպ է տեղի ունեցել. քաղաքացի Գրիգոր Հարությունյանը սպառնացել և հարվածել է քաղաքացի Ռոման Բաղդասարյանին, որը հայտնի է որպես բլոգեր, որից հետո սկսվել է ծեծկռտուք:

Միջադեպի վերաբերյալ նախ Կենտրոնի ոստիկանության բաժանմունքի դիմացից ուղիղ եթերով հայտնել են ԲՀԿ-կան նախկին պատգամավոր Արագած Ախոյանը, КВН-ի նախկին անդամ Արմեն Գրիգորյանը և դերասան Հրանտ Թոխատյանը:

Արմեն Գրիգորյանը ուղիղ եթերի ժամանակ պատմել է, որ Գրիգոր Հարությունյանը պատահաբար փողոցում տեսել է Ռոման Բաղդասրյանին: Գրիգորյանը վերջինիս բնութագրել է հայհոյախառն բառապաշարով՝ շարունակելով. «Գրիգը, որ իրան տեսել ա, ինչ ա արել, տոիստ նորմալ հայ տղեն ինչ ա անում, իջել ա բերնին, ոստիկաններն էլ բռնել բերել են: Ավաղ, մինչև հիմա չենք կարում հասկանանք՝ ընենց լավ կպե՞լ ա բերնին, թե՞ ընենց թեթև ա, էլի»:

Ուղիղ եթերի ժամանակ Գրիգորյանին շարունակել է Արագած Ախոյանը՝ ասելով. «Արմեն ջան, նոր ասեցի՝ մենք կսպասենք՝ եթե լավ չի կպել, իսկապես կպցնենք, որ...»:

Այնուհետև Ախոյանին կրկին շարունակել է Գրիգորյանը՝ ասելով. «Արագածը ասեց, որ եթե լավ չի կպել, մենք ստեղ ենք, մենք կարանք ավելացնենք, ընենց որ լավ կպնի, էլի, էդ տղու արածը հենց նենց ջուրը չընկնի: Մենք հեսա սպասում ենք, լիքը մարդ ա գալիս տղերքից, իրավաբան Ռուբեն Մելիքյանը կգա: Դե պարզ ա, մենք մեր Գրիգորի կողն ենք, ըտեղ ոչ մի հարց չկա»:

Արագած Ախոյանը տեղի ունեցածը որակել է որպես արված հանճարեղ գործ՝ ասելով. «Նման տիպի կենդանիները պատժվելու են, փողոցով, քացով, ոնց պատահի, պադեզդում, իրանց հայաթում, որովհետև այլ ելք չկա, սրանց դեմ ուրիշ պայքարի ձև չկա»: Ախոյանը վիրավորական արտահայտություններով և սպառնալիքներով նաև հայտարարել է, որ իրենց հայհոյողները բոլորը պատժվելու են, անուն առ անուն, «ակտիվիստները մինչև փողոցում չափալախ չուտեն, չեն հասկանա»: Ուղիղ եթերի ժամանակ վերջիններիս է միացել բլոգեր Միկա Բադալյանը, որին ՀՀ քննչական կոմիտեն օրեր առաջ մեղադրանք է առաջադրել՝ ՀՀ քրեական օրենսգրքի 259-րդ հոդվածով (Ահաբեկչության մասին սուտ հաղորդում տալը):

Իրավաբան Ռուբեն Մելիքյանն էլ «Ֆեյսբուք» սոցիալական ցանցի իր էջում անդրադառնալով միջադեպին՝ բռնություն հրահրած քաղաքացուն անվանել է արժանապատիվ քաղաքացի:

Բլոգեր Ռոման Բաղդասարյանն էլ Կենտրոնի ոստիկանության բաժանմունքի դիմացից ուղիղ եթերի միջոցով պարզաբանել է, թե ինչ է տեղի ունեցել՝ նշելով՝ ինչպես բոլոր դեպքերում, այնպես էլ այս անգամ նախկին իշխանության համախոհները 99 տոկոսով ստում են:

«Մենք Երևանի կենտրոնով քայլում էինք: Դուք բոլորդ էլ գիտեք, որ ո՛չ Մոսկվայում, ո՛չ Թբիլիսիում, ո՛չ Երևանում, որտեղ ուզում է լինի, ես քայլում եմ հանգիստ, գլուխս բարձր, և գիտեք՝ ինչի՞ համար, որովհետև ես նրանից ոչ մեկից չեմ վախենում: Որովհետև ես ասել եմ, որ Քոչարյանի բոլոր կողմնակիցները իմ ոտքի տակի կեղտը չարժեն: Այն, որ դուք գրում եք սոցցանցերում, թե ինձ հետ ինչ-որ վատ բան է պատահել, ահա ես, ինձ հետ ամեն բան կարգին է»,- նշել է Բաղդասարյանը՝ հավելելով. «Ես իմ ընկերոջ՝ Դիանա Բուլղադարյանի հետ հանգիստ քայլում էի Երևանի կենտրոնում, և մեր դիմաց դուրս է գալիս Քոչարյանի տելեգրամ ալիքներից մեկի համակարգողը և ինչպես շուն, սկսում է հաչել ինձ վրա, թե՝ ինչո՞ւ ես փնովում ղարաբաղյան գեներալներին: Ես պատասխանում եմ, որ ճիշտ եմ անում և դեռ ավելին եմ անելու: Նա մտածում էր, թե ես կվախենամ, խելագարի պես գոռում էր և որոշեց ինձ հարվածել: Հարվածեց ձեռքիս, դա ուժեղ հարված չէր: Ի պատասխան՝ ես նրան այնպես հարվածեցի, որ նա չէր սպասում: Հետո նա փորձեց ինձ կրկին հարվածել, ես դիմադրեցի և նրան այնպես հարվածեցի, որ հագուստը պատռվեց: Հետո ես ընկա, և եկավ ոստիկանությունը: Ահա այն ամենը, ինչ կատարվել է»,- պատմել է Ռոման Բաղդասարյանը:

Նա նաև նշել է, որ շարունակելու է բարձրաձայնել ճշմարտությունը այսուհետև ավելի լայն թափով:

«Ես ուզում եմ՝ բոլորդ իմանաք, որ մենք 10 անգամ ավելին ենք խոսելու ճշմարտության մասին, 10 անգամ ավելին ենք խոսելու նախկին իշխանությունների հանցագործությունների մասին, մենք 10 անգամ ավելին ենք սատարելու ՀՀ վարչապետին: Ես կարծում եմ, որ ոստիկանությունը պետք է օրինականություն հաստատի, քանի որ Քոչարյանի թմրամոլ, հանցագործ համակիրները շրջում են Երևանում»,- ասել է նա:

Այնուհետև Բաղդասարյանը դիմել է Սերժ Սարգսյանի և Ռոբերտ Քոչարյանի համակիրներին և կոչ արել ի վերջո հասկանալ՝ նրանք այլևս իշխանության չեն գալու. «Մենք այլևս չունենք տղաներ, որ պետք է մեռնեն Բակո Սահակյանի, Քոչարյանի, Սերժ Սարգսյանի համար: Քոչարյանն ու Սերժը անգամ Փաշինյանի ոտքի տակի կեղտը չարժեն»:

Նշենք, որ և՛ Գրիգոր Հարությունյանը, և՛ Ռոման Բաղդասարյանը ազատ են արձակվել: