Նախկինում մարդիկ ընտրում էին թաղային հեղինակության ցուցումով կամ կաշառքով, հիմա դա գրեթե վերացել է. Ապարանի ՔՊ թեկնածու

Սույն թվականի դեկտեմբերի 5-ին Արագածոտնի մարզի Ապարան խոշորացված համայնքում նույնպես սպասվում են ՏԻՄ ընտրություններ: «Քաղաքացիական պայմանագիր» կուսակցությունն այս համայնքում առաջադրել է Էդգար Փարվանյանի թեկնածությունը:

Փարվանյանի հետ «Հայկական ժամանակի» զրույցը՝ ստորեւ.

- Պարոն Փարվանյան, ինչո՞ւ «Քաղաքացիական պայմանագիր» կուսակցությունը ՏԻՄ ընտրություններում առաջադրեց հենց Ձեր թեկնածությունը, և ինչպե՞ս եք գնահատում Ձեր շանսերը:

- Ինձ են առաջադրել, որովհետեւ մեր գաղափարները համըկնում են, եւ կարող ենք հետագայում համագործակցել: Իսկ ինչ վերաբերում է շանսերին, ապա երբեք չես կարող ընտրությունների ելքը նախապես կանխորոշել: Սակայն վերջին ժամանակներում մեր ուժն ստանում է ավելի շատ քվե, քան սպասում ենք: Մարդկանց առաջվա պես էլ չեն կարողանում ուղղորդել: Ամեն մի անհատ գիտի, որ ինքն է որոշողը: Եթե նախկինում այդ մարդիկ առաջնորդվում էին թաղային հեղինակություն ունեցող մեկի կարծիքով կամ կաշառքով, հիմա դա գրեթե վերացել է: Իհարկե, մասսաներ կան, որոնք ուղղորդվում են, բայց գերակշիռ մասն իր քվեի տերն է: 

- Ի՞նչ ծրագրով եք ներկայացել հանրությանը:

- Եթե տեղյակ եք, Կառավարության ծրագրում շատ հստակ ներկայացված է, թե ինչ է հարկավոր մեր երկրին: Այդ ծրագրերը մի քիչ տեղայնացնելու խնդիր ունեն, որը մենք փորձելու ենք անել մեր համայնքում: Մեծ ուշադրություն ենք դարձնելու կրթությանը, որովհետեւ իսկապես մեր երկրում բարձր որակի կրթության անհրաժեշտություն կա, մանավանդ՝ գյուղերում: Խոսքս դպրոցների մասին չէ. մանկավարժները պատշաճ կատարում են իրենց գործը, սակայն դա շատ քիչ է: Ապարանում մենք տասը տարի առաջ ունեինք ֆիզմաթ թեքումով դպրոց, որը փակեցին: Ապարանի պատմության մեջ մեր սերունդը չի ունեցել այնքան գիտնականներ, որքան ունեցել ենք այդ դպրոցի շրջանավարտների շրջանակում: Այդ փորձն առկա է, կարող ենք համարել արդյունք եւ, ըստ դրա, առաջնորդվել: Այսինքն՝ վերաբացել նման մի կենտրոն եւ մասնագիտացված կրթություն տալ մեր հասարակությանը: 

- Կրթությունից բացի, ուրիշ ո՞ր ոլորտներն եք զարգացնելու:

- Նախ մենք մեր ընտրվելու դեպքում շատ արագ պիտի գույքագրենք այն խնդիրները, որոնք ծառացած են այսօր մեր համայնքի առաջ: Առհասարակ, 2018 թվականից սկսած՝ մեր երկրում չկա համայնք, որը գոնե մի փոքր առաջընթաց ու զարգացում գրանցած չլինի: 

- Ավագանու համամասնական ցուցակն ի՞նչ սկզբունքով եք ձեւավորվել, ինչո՞վ եք առաջնորդվել ընտրություն կատարելիս: 

- Առաջնորդվել ենք ոլորտային ուղղություններով՝ ե՛ւ մանկավարժներ կան, ե՛ւ բժիշկներ, զինվորական կոչումով անձինք: Կան մարդիկ, որոնք բավականին փորձառու են, կան նաեւ երիտասարդ կադրեր: Այն կազմը, որը պիտի աշխատի համայնքի համար, բոլորն էլ կայացած մարդիկ են: Բայց մեզ մոտ նաեւ բյուջեի հավասար բաշխումն է խախտված: Մենք արդեն մոտ 20 գյուղում շրջայցեր ենք արել, եւ պիտի ցավով փաստեմ, որ շատ չնչին աշխատանքներ են կատարվել: Սուբվենցիան եւ համայնքային բյուջեն միասին՝ տարեկան երեւի 100 միլիոն դրամ էլ չի դրվել վարչական շրջանների վրա, դա ենթադրում է 21 գյուղ:

- Պարոն Փարվանյան, համամասնական ընտրակարգով բացարձակ մեծամասնություն չլինելու դեպքում համայնքապետն ընտրվելու է կոալիցիոն տարբերակով: Նման արդյունքի պարագայում կդիմե՞ք համագործակցության Ձեզ մրցակից քաղաքական ուժերի հետ:

- Դեռ բացառում եմ: Այստեղ երկու ուժ է, մեզ մրցակից ուժի՝ գործող համայնքապետի հետ ենք պայքարում, բայց նրա հետ աշխատելը բացառում եմ:

- Ինչո՞ւ պետք է քաղաքացիներն իրենց քվեն վստահեն Ձեզ:

- Մեր համայնքը պիտի մի շատ պարզ բան արձանագրի. այս տարիների ընթացքում ինչ արվել է, արվել է Կառավարության ջանքերով: Ժամանակին ընդհանրապես բան չի արվել: Ներկայիս համայնքապետը չի ներկայացրել իշխանության աշխատանքներն իբր իշխանության, չի ասել ժողովրդին, որ դա նրանց վճարած հարկերի կամ աշխատանքի արդյունքում տրված գումարների շնորհիվ է: Ընդհակառակը, ամբողջը ներկայացրել է որպես իր միջոցներով արված գործ: Սա անձերի ընտրություն չէ, սա թիմի, ծրագրերի, վաղվա օրվա ընտրություն է: Եթե մեր թիմը գա իշխանության, վստահեցնում եմ՝ կատարված աշխատանքները բազմապատկվելու եւ եռապատկվելու են: Եվ դա չի ներկայացվելու մեկ անձի կողմից արված աշխատանք ու առավել եւս անձի պաշտամունք չի ձեւավորելու մարդկանց մոտ: