Կնախաձեռնվի՞ քաղաքապետին անվստահություն հայտնելու գործընթաց. ՔՊ-ում դժգոհ են Հայկ Մարությանից

Երեւանի քաղաքապետ Հայկ Մարությանի եւ գործադիր իշխանության հարաբերությունները այնքան էլ հարթ չեն: Ամիսներ շարունակ կուլիսներում այս մասին առկա խոսակցությունները երեկ ըստ էության հաստատել է ՀՀ վարչապետի գլխավոր խորհրդական Արայիկ Հարությունյանը:

«Ազատություն» ռադիոկայանի եթերում պատասխանելով հարցին, թե կուսակցությունում կարծիք կա՞ Հայկ Մարությանի աշխատանքի մասին, ասում են, որ դժգոհ եք նրա աշխատանքից, Հարությունյանը հայտարարել է. «Ես շատ ցավում եմ, որ պարոն Մարությանն այդպիսի կեցվածք ունեցավ ընտրություններից առաջ եւ որպես «Քաղաքացիական պայմանագրի» եւ «Իմ քայլի» կողմից կողմից առաջադրված քաղաքապետ` նախընտրական փուլում ակներեւ եւ հրապարակային աջակցություն չհայտնեց «Քաղաքացիական պայմանագրին»: Ցավում եմ դրա համար, որովհետեւ այն քվեն, որով պարոն Մարությանը դարձել էր Երեւանի քաղաքապետ, մեծամասամբ այն ուժինն է, որը ներկայում արդեն երկրորդ անգամ ձեւավորելու է կառավարություն»:

Հարցին՝ այսինքն հստակ վերաբերմո՞ւնք է ձեւավորվել, վարչապետի խորհրդականը հավելել է. «Էս պահին քաղաքապետի հետ կապված որեւէ քննարկում մեզանում չկա։ Սա հստակ կարող եմ ասել։ Մենք պետք է հասկանանք, թե այս իրավիճակում ինչպես ենք անում, որ եւ քաղաքական ուժի ներսում տվյալ հարցի հետ կապված ունենանք որոշումներ, բայց դրանից նաեւ չտուժի քաղաքը եւ քաղաքային իշխանությունը»:

«Քաղաքապետը չի պատրաստվում հրաժարական տալ, շարունակում է կատարել իր աշխատանքը՝ անկախ որեւէ այդ կարգի խոսակցությունից»,- մեր զրույցում տեղեկացրեց Հայկ Մարությանի մամուլի խոսնակ Հակոբ Կարապետյանը:

Հարցին՝ Հարությունյանի խոսքերն արդյոք պարոն Մարությանի կողմից ընկալվե՞լ են որպես իր թիմի կողմից իր աշխատանքի վերաբերյալ գնահատական՝ Կարապետյանն ասաց, որ չի ցանկանում պարոն Հարությունյանի հայտարարության ընկալումների վերաբերյալ կարծիք հայտնել: «Աշխատանքի գնահատականը տալիս են այն մարդիկ, որոնք տվել են մանդատը: Ես կարծում եմ՝ քաղաքապետի եւ նրա թիմի աշխատանքի արդյունավետության գնահատականը պետք է տա իրեն մանդատ տվող հանրությունը»,- շարունակեց նա:

Մեր մյուս հարցին՝ Հայկ Մարությանը շարունակո՞ւմ է լինել «Քաղաքացիական պայմանագիր» կուսակցության անդամ, Կարապետյանը խնդրեց պատասխանը ճշտել կուսակցությունից:

ՔՊ մամուլի խոսնակ Վահագն Ալեքսանյանը չցանկացավ թեմայի վերաբերյալ որեւէ մեկնաբանություն տալ:

Երեւանի ավագանու «Իմ քայլը» խմբակցության անդամ, քաղաքաշինության եւ հողօգտագործման հարցերի մշտական հանձնաժողովի նախագահ Նուարդ Վարդանյանից հետաքրքրվեցինք՝ հնարավո՞ր է Հարությունյանի հայտարարությունն ընկալվել է որպես ազդակ, որ պետք է քայլեր ձեռնարկվեն Մարությանի հետագա պաշտոնավարման հետ կապված.

«Այն, որ կա խնդիր, դա միանշանակ, ես չեմ ուզում հակառակը պնդել: Այո՛, կա խնդիր, այդ խնդիրը մեր ներթիմային տարբեր հարթակներում քննարկվում է: Թե ինչ որոշում կկայացվի թիմի կողմից...միայն կարող եմ ասել, որ hօգուտ, ի շահ Երեւանի ու երեւանցիների կլինի»,- ասաց Վարդանյանը՝ չցանկանալով պարզաբանել, թե որն է խնդիրը եւ երբ է այն առաջացել:

Հարցին՝ «Իմ քայլը» խմբակցությունում բոլո՞րն են համաձայն, որ խնդիր կա՝ Վարդանյանը պատասխանեց. «Չեմ կարող ասել, ավագանու ներսում այդ  հարցը չի քննարկվել»:

Զրուցեցինք նաեւ խմբակցության մեկ այլ անդամի՝ Աշոտ Մնացականյանի հետ.

- Պարոն Մնացականյան, որպես ավագանու անդամ կիսո՞ւմ եք այն կարծիքը, որ Հայկ Մարությանը, լինելով ՔՊ անդամ, թիմին չի աջակցել խորհրդարանական ընտրություններում: Եթե այո, ապա ինչ-որ քայլեր ձեռնարկվո՞ւմ են խմբակցության կողմից:

- Այո, համամիտ եմ, եւ ոչ միայն համամիտ եմ, այլ վստահ եմ, որ չի աջակցել ու ընտրություններից առաջ էլ գիտեի, որ չի աջակցելու: Արայիկ Հարությունյանի կարծիքը կիսում եմ միանշանակ եւ կիսողները ավագանիում շատ-շատ են: Քայլեր ձեռնարկելու մասով  այս պահին թույլ տվեք մեկնաբանություն չանեմ:

- Ի՞նչն է պատճառը, որ չի աջակցել, փորձե՞լ եք ճշտել, խոսե՞լ եք նրա հետ:

- Անկեղծ ասած ժամանակ չի եղել ճշտելու, բայց ինձ թվում է՝ կճշտենք մոտ ապագայում:

- Խմբակցության կողմից Հարությունյանի հայտարարությունն ինչպե՞ս է ընկալվել. կարծում եք պետք է որեւէ քա՞յլ ձեռնարկվի Մարությանի պաշտոնավարման դեմ:

- Որպես էդպիսին կոնկրետ բան չկա, բայց ինձ թվում է՝ հնարավոր է, ինքս անձամբ կողմնակից եմ, որ նման պրոցես սկսվի: Չեմ ուզում թերագնահատել մինչ այս Մարությանի կատարած աշխատանքը, ամեն դեպքում աշխատանք կատարվել է եւ դա չի կարող չգնահատվել, բայց կա հարցի այլ կողմ. եթե դու թիմի անդամ ես, այդ թիմի շնորհիվ դառնում ես քաղաքապետ, աշխատում ես, ինչ-որ մի ճակատագրական փուլում (որովհետեւ մենք ընտրությունները գնահատում էինք որպես պետականության հարց) չեզոքություն պահպանելը իմ կարծիքով անթույլատրելի է: Ես առնվազն չեզոքություն եմ ասում, մյուս մասով չեմ ուզում մեղադրանքներ հնչեցնել: Դա իմ համար անընդունելի է, եթե նույնիսկ նրա տեղը լիներ հարազատ եղբայրս: Նկատի ունեմ՝ ինչքան էլ որ գնահատելի է նրա աշխատանքը, բայց երբ որ ամենածանր պահին չի կանգնում այն թիմի մեջքին, որն իրեն բերել է, դա անընդունելի է իմ համար ու ինձ թվում է շատ-շատերի համար:

- Պարոն Մնացականյան, ի վերջո ի՞նչ պետք է աներ քաղաքապետը, որ չի արել: Ի՞նչ կարող էր անել:

- Քարոզարշավին մանակցեր կամ հանրային խոսքով աջակցեր քաղաքական թիմին: Պարտադիր չէ բակերում մեզ հետ ման գար, մեկն ասեր «ապագա կա», ինքն էլ գոռար՝ «կա ապագա»: Բայց կարող էր հանրային աջակցություն ցուցաբերել:

Քաղաքապետի շուրջ այս զարգացումների վերաբերյալ կարծիք հարցրինք նաեւ Երեւանի ավագանու երկրորդ ամենախոշոր՝ ԲՀԿ խմբակցության անդամ Արմեն Ներսիսյանից:

Վերջինս ասաց, որ նախ պետք է քաղաքապետից հարցնել, թե ինչու չի աջակցել իր կուսակցությանը խորհրդարանական ընտրություններում:

«Ես անձամբ նիստի ժամանակ լսել եմ՝ ոնց է քաղաքապետն ասում, որ իրեն  ընտրությունները չեն հետաքրքրում: Բայց ինչ վերաբերում է խոսակցություններին՝ թող իրար հետ նստեն, հասկանան: Նույն թիմի անդամ են, մենք չենք ուզում մտնել մատի ու մատանու արանքը»,- ասաց Ներսիսյանը՝ հավելելով, որ ինքը մշտապես քննադատում է քաղաքապետի ու նրա թիմի աշխատանքը, որովհետեւ սիրում է Երեւանը ու չի սիրում, որ մարդիկ պարապ մնալով փող են ստանում:

Հարցին, եթե նախաձեռնվի անվստահության հարց՝ «Բարգավաճ Հայաստան» խմբակցությունը ի՞նչ դիրքորոշում կհայտնի, Ներսիսյանն ասաց, որ խմբակցության ղեկավարի հետ այդ հարցը չեն քննարկել:

Հիշեցնենք, քաղաքապետին անվստահությունը նրա լիազորությունների դադարեցման հիմքերից մեկն է: Տեղական ինքնակառավարման մասին օրենքի համաձայն՝ «համայնքի ղեկավարին անվստահություն հայտնելու որոշման նախագիծ կարող է ներկայացնել ավագանու անդամների ընդհանուր թվի առնվազն մեկ երրորդը»:

Ընդ որում համայնքի ավագանին համայնքի ղեկավարին պաշտոնանկ անելու առաջարկությունը կարող է քննարկել համայնքի ղեկավարի լիազորություններն ստանձնելուց ոչ շուտ, քան մեկ տարի հետո:

Երեւանի ավագանու ընտրությունները տեղի են ունեցել 2018-ի սեպտեմբերին, իսկ սա նշանակում է, որ հերթական ընտրությունները նախատեսված են 2023 թվականին:

Մամուլում վերջին շրջանում տեղեկություններ կային, որ Երեւանի ավագանին ցրելու մեկ այլ տարբերակ եւս քննարկվում է. խոսքը նույն Տեղական ինքնակառավարման մասին օրենքով նախատեսված հետեւյալ դեպքի մասին է. «Հայաստանի Հանրապետության կառավարությունը համայնքի ղեկավարի լիազորությունները վաղաժամկետ դադարեցնում է, եթե տվյալ համայնքը, օրենքով սահմանված կարգով, վերակազմակերպվում է որպես այլ վարչատարածքային միավոր»:

Ըստ նույն հրապարակումների՝ Կառավարությունը նախատեսում է Երեւանին շատ մոտ 1-2 համայնք միացնել մայրաքաղաքին: Այս տեղեկությունները, սակայն, պաշտնապես որեւէ հաստատում չեն ստացել:

Հավելենք, որ ինքը Հայկ Մարությանը եւս վերջերս չէր թաքցրել, որ գործադիր իշխանության հետ խնդիր ունի: Ավագանու վերջին նիստում նա քննադատեց Կառավարությանը՝ ապօրինի շինությունների վերաբերյալ ինչ-որ նախագիծ չհաստատելու համար:

«Սա հստակ նախագիծ էր, որը կանգնեցնելու էր ապօրինի շինարարությունը ամբողջ Հայաստանում: Այդպես էլ այդ որոշումը չի ընդունվել: Ես չգիտեմ պատճառները»,- ասել էր Մարությանը՝ ի պատասխան իմքայլական ավագանու անդամ Գայանե Համբարձումյանի քննադատական ելույթի, որ կանաչ տարածքներում ապօրինի կրպակներ են տեղադրվում եւ քաղաքապետարանը 3 տարի ոչինչ չի անում՝ դա հիմնավորելով օրենքի բացով: