Մարած պարտատոմս՝ օր ծերությա՞ն. Վազգեն Մանուկյանի «կայծակնային ապստամության» գործը Քննչական կոմիտեում է

Իրավապահ մարմինները արձագանքում են ապստամբության վերաբերյալ «Հայրենիքի փրկության շարժման» վարչապետի թեկնածու Վազգեն Մանուկյանի հայտարարություններին:

ՀՀ ոստիկանությունում քրեական գործ է հարուցվել շաբաթ օրը Ազատության հրապարակում տեղի ունեցած հանրահավաքի ընթացքում Մանուկյանի հետեւյալ հայտարարության առնչությամբ.

«Պետք է պատրաստ լինել կայծակնային արագությամբ՝ ապստամբելով, վերցնել իշխանությունը»:

«Հայկական ժամանակի» հարցմանն ի պատասխան ՀՀ գլխավոր դատախազի խորհրդական Գոռ Աբրահամյանը հայտնեց, որ գործը հարուցվել է ՀՀ քրեական օրենսգրքի 301 հոդվածի (իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչերը) հատկանիշներով:

Աբրահամյանը հավելեց, որ Ոստիկանությունից գործն ուղարկվել է Քննչական կոմիտե՝ վարույթ ընդունելու եւ նախաքննություն իրականացնելու նպատակով:

ՀՀ քննչական կոմիտեի Տեղեկատվության եւ հասարակայնության հետ կապերի բաժնի պետի ժամանակավոր պաշտոնակատար Ռիմա Եգանյանն էլ տեղեկացրեց, որ գործը վարույթ է ընդունվել ՔԿ Հատկապես կարեւոր գործերի քննության գլխավոր վարչությունում:

Իսկ ինչպիսի՞ն են Մանուկյանի հայտարարությունների քաղաքական արձագանքները:

«Իմ քայլը» խմբակցությունում կարծում են, որ Մանուկյանի այս հայտարարությունները նորություն չեն:

Արուսյակ Ջուլհակյանը հիշեցնում է, որ դեռ 1996-ին Մանուկյանն աչքի է ընկել Ազգային ժողովի գրոհով, ժողովրդին արկածախնդրության տանելու իր վարքագծով, 1999-ին ըստ էության հանդես է եկել Հոկտեմբերի 27-ի ահաբեկիչների արդարացմամբ, երբ նրանց անվանել է «մի խումբ ռոմանտիկներ»:

Ավելին, ըստ պատգամավորի, Մանուկյանը արդարացրել է անգամ 2008-ի Մարտի 1-ը, 2020-ի պատերազմի օրերին, ինչպես իր ելույթներից մեկում է խոստովանել, հանդես է եկել զինվորականությանն ուղղված կոչերով, որոնք ռազմական հեղաշրջում կարելի էր որակել:

Ջուլհակյանի համար, սակայն, շատ անհասկանալի է Վազգեն Մանուկյանին սատարող ՀՀԿ-ի պահվածքը, որը 2016-ին, երբ իշխանության էր, «Սասնա ծռերի» կողմից ՊՊԾ գունդը գրավելու ժամանակ հայտարարում էր, թե ապստամբության բնական իրավունք չկա:

«Ես պետք է ասեմ, որ համաձայն եմ իրենց հետ, որ չկա ապստամբության բնական իրավունք: Եվ այստեղ կոգնիտիվ դիսոնանս է առաջանում, թե ինչպես կարող է մի քաղաքական ուժ (ՀՀԿ-ն-խմբ.) առնվազն քննադատել եւ իրավական գործընթացներ հարուցել մարդկանց նկատմամբ, որոնք իրենց արարաքը որակում են որպես ապստամբություն, բայց հետագայում համախմբվել մի անձի շուրջ, որը նման կոչերով է հանդես գալիս»,- ընդգծում է պատգամավորը:

Հարցին, թե Մանուկյանի հայտարարությունները կարո՞ղ են լուրջ հետեւանքներ ունենալ՝ Ջուլհակյանը նկատում է. «Սրանք շատ վտանգավոր կոչեր են եւ պիտի խեղդվեն բնում, որովհետեւ իրավական պետությունում բոլոր գործընթացները պետք է իրականացվեն բացառապես սահմանադրական եղանակով, եւ նման կոչեր անողների նկատմամբ իրավապահ մարմինները պետք է ուշադիր լինեն»: 

Խոսելով իրավապահ մարմինների աշխատանքի մասին՝ պատգամավորը նշեց, որ քանի որ տեղյակ չէ՝ ինչ է արվում Մանուկյանի հայտարարությունների մասով՝ դրանց բավարար կամ անբավարար լինելու մասին գնահատական տալ չի կարող:

«Ես իրավական գնահատական տալու լիազորություն չունեմ, բայց իմ քաղաքական գնահատականը այն է, որ նման խոսույթը պետք է մերժվի, պետք է կանխվի: Այստեղ անելիք ունի հանրությունը, հանրությունը պետք է մերժի նման խոսույթը, բռնությունը առհասարակ մեր ներքաղաքական պայքարում պետք է տեղ չունենա: Իմ կարծիքով մեր հանրությունը բավական ողջամիտ է եւ արկածախնդիրների հետեւից երբեւէ չի գնացել»,- նկատեց Ջուլհակյանը:

Վերջինս նշեց, որ անընդհատ փորձում է հարգել Վազգեն Մանուկյանի անցյալը՝ որպես «Ղարաբաղ» կոմիտեի անդամ, որպես երրորդ հանրապետության ակունքներում կանգնած անձ, բայց նա ամեն ինչ անում է, որ այդ ջանքերը հօդս ցնդեն. «Ցավով պետք է նշեմ, որ պարոն Մանուկյանը վեր է ածվել քաղաքական մարած պարտատոմսի, բայց չգիտես ինչու փորձ է անում այդուհանդերձ նման անհասկանալի գործողություններով զբաղվել օր ծերության»:

Մանուկյանի գլխավորությամբ քաղաքական գործողությունները անհեռանկար է համարում «Իմ քայլի» պատգամավորներից նաեւ Վիկտոր Ենգիբարյանը:

Պատգամավորի հետ մեր զրույցը՝ ստորեւ.

- Պարոն Ենգիբարյան, Վազգեն Մանուկյանը շաբաթ օրվա հանրահավաքում ներկայացրեց իրենց հետագա գործողությունների 2 պլան, որոնցից երկրորդով հորդորեց իր համակիրներին ամեն պահի պատրաստ լինել ապստամբելով վերցնել իշխանությունը: Ինչպե՞ս եք վերաբերում այս հայտարարությանը:

- Խիստ դատապարտում եմ նրա այդ հայտարարությունները, դրանք ողողված են բռնության կոչերով: Ոչ միայն այդ հայտարարությունները, այլ ընդհանրապես Վազգեն Մանուկյանի հանրային խոսքը իր մեջ պարունակում է բռնության նոտաներ, կոչեր, որը խիստ դատապարտելի է: Մենք առաջարկել էինք քննարկել արտահերթ ընտրություններ անցկացնելու հարցը: Ըստ երեւույթին հասկանալով, որ տվյալ ուժերը որեւէ հնարավորություն չունեն ստանալու մեր հանրության վստահությունը, մերժեցին այդ գաղափարը ու հիմա էլ ապստամբության կոչեր են անում: Այսինքն ո՞ւմ դեմ ապստամբություն. մենք զավթե՞լ ենք իշխանությունը, մեզ չե՞ն ընտրել կամ կաշառքո՞վ ենք ընտրվել, որ ուզում են մեր դեմ ապստամբել:

- Ինչի՞ կարող է բերել ապստամբության մասին նրա հայտարարությունը: Հայաստանում նման գործողությունների հնարավորություն տեսնո՞ւմ եք:

- Ճիշտն ասած՝ ոչ, չեմ տեսնում: Այսինքն ո՞ւմ դեմ, ինչի՞ դեմ ապստամբել:

- Նիկոլ Փաշինյանից իշխանությունը վերցնելու համար՝ այն հիմնավորմամբ, որ ինչպես իրենք են ներկայացնում, նա պատերազմը պարտված ղեկավար է:

- Իշխանությունը վերցնելու մեկ տարբերակ կա՝ ընտրությունների միջոցով հաղթել եւ դառնալ իշխանություն: Իսկ պատերազմը Նիկոլ Փաշինյանը չի պարտվել, պատերազմը մեկ հոգով չեն հաղթում կամ պարտվում, նույնիսկ եթե այդ մեկ հոգին ամենակարեւոր դերակատարն է:

- Այսինքն՝ հրաժարականի անհրաժեշտություն չկա, հետեւաբար ապստամբելու կարիք էլ չկա:

- Մենք բազմիցս խոսել ենք այդ մասին. Իշխանություն ստանալու մի տարբերակ կա, մենք առաջարկեցինք այդ մասին մտածել՝ իրենք մերժեցին, ուրեմն այդ մասին կխոսենք 2023 թվականին:

- Պարոն Ենգիբարյան, ՀԿ-ներից մեկը հաշվարկել էր, որ «Հայրենիքի փրկության շարժման» հանրահավաքին 12 հազար մարդ է մասնակցել: Որպես իշխող խմբակցություն ձեզ չի՞ անհանգստացնում այս թիվը:

- Բայց ինչո՞ւ պետք է անհանգստացնի, ես չգիտեմ մի ժողովրդավարական երկիր, որտեղ ցույցեր չեն անում: Շատ նորմալ գործընթաց է, ես նույնիսկ ողջունում եմ, որ մարդիկ իրենց կարծիքը արտահայտում են, բայց վախենամ, որ մասնակիցների մեծ մասը ուղղակի աշխատանքը չկորցնելու շահագրգռվածությամբ էր այնտեղ: Ես կարծում եմ, որ այնտեղ գաղափարական ընդդիմադիր մասը ուղղակի մատերի վրա կարելի է հաշվել թե քանի հոգի են կամ քանի տոկոս են, մնացածը աշխատանքը կորցնելու վախից կամ ստիպողաբար էին այնտեղ: Սա չեմ համարում քաղաքական լուրջ գործընթաց:

- Ունե՞ք տեղեկություններ, որ սպառնացել են աշխատանքից ազատել:

- Ձեր շնորհիվ, ես նկատի ունեմ ԶԼՄ-ների շնորհիվ, մենք ամեն ինչի մասին տեղեկանում ենք:

- Ի՞նչ քայլեր պետք է արվեն՝ կանխելու այդ ամենը:

- Այն քաղաքացիները, ովքեր ունեն նման տեղեկատվություն, պետք է դիմեն կամ իրենց ընտրած ԱԺ պատգամավորին կամ ոստիկանություն, եւ համապատասխան գործընթացներ տեղի կունենան դրանից հետո: Համենայնդեպս քաղաքացիները պետք է իմանան, որ ոչ ոք իրենց չի կարող տանել հանրահավաքի, նույնիսկ գործատուն:

- Իսկ ի՞նչ եք կարծում, ի՞նչ արդյունք կարող են ունենալ անհնազանդության գործողությունները:

- Չգիտեմ, կապրենք՝ կտեսնենք: Անհնազանդության գործողությունները կարող են առաջնորդել քաղաքական ուժերը, բայց վերջում դրանք պետք է դառնան քաղաքացիական գործողություններ, իսկ նման պոտենցյալ ես չեմ տեսնում: Իհարկե խցանումներ կարող են տեղի ունենալ, բայց լուրջ քաղաքական փոփոխություններ խցանումների միջոցով հնարավոր չէ: Հիմա դուք կասեք 2018 թվական. 2018 թվականին, այո՛, կային լիդերներ, որոնք այդ գործընթացները կազմակերպում էին, բայց գործի 90 տոկոսը անում էին քաղաքացիները:

- Այսինքն հաջողություն չի ունենա:

- Չէ, ոչ մի դեպքում: