«Բոմբ պեն»՝ արցախցի երեխաների համար․ կազմակերպվում են տարբեր դասընթացներ ու այցեր

Պատերազմական շրջանում Հայաստանում գտնվող արցախցի երեխաների օրը հետաքրքիր ու օգտակար դարձնելու համար մի շարք միջոցառումներ են կազմակերպվում։ Նման ծրագրեր է իրականացնում նաեւ «Կրթություն հանուն հաղթանակի» նախաձեռնությունը, որը երեխաների համար կազմակերպում է տարբեր դասընթացներ, այցեր մշակութային, ուսուցողական վայրեր եւ այլն։

Նման դասընթաց իրականացվեց նաեւ այսօր։

«Բոմբ պեն էր»

«Ա խոխա», «Ես գտալըմ», «Ես պրծալըմ»․  դեռ մուտքի մոտ արցախցի երեխաների զրնգուն ձայնն էր լսվում։  Ներսում՝ սեղանի առաջ ամեն մեկը մի թերթիկ ու մի գրիչ էր վերցրել, փորձում էր խնդիր լուծել։ Ավարտելուց հետո էլ թերթիկը ձեռքին շտապում էր ուսուցչուհուն ցույց տալ։ Այսօր երեխաները մաթեմատիկայի դասին էին մասնակցում։

Ինչպես մեզ պատմեց 11-ամյա Լիդիան, դասերը շատ լավ ու հետաքրքիր են անցնում։ Բացի խնդիրները լուծելուց, տրամաբանական խաղեր են խաղում։ Ինքը դեռեւս 2 դասի է մասնակցել՝ անգլերենի եւ մաթեմատիկայի։

«Դասը շատ լավ է անց կացել, մաթեմատիկա ենք պարապել, խնդիրներ ենք լուծել, մեր ուսուցչուհին շատ լավն է, շատ գեղեցիկ է, լավ բացատրել է»,- սա արդեն 10-ամյա Դինան պատմեց, որը Երեւանը շատ է հավանել, ասում է՝ շատ գեղեցիկ է։ Դինան Հայաստանում միայն նման դասերի է մասնակցում, այստեղ դպրոց չի հաճախում։

Երեխաներից Իրինան էլ մեր հարցերը լսելով՝ դժգոհեց՝ ձեր «Արմենիայի» բարբառը չեմ հասկանում, հլը նորմալ ասա։  Իր բարբառն ամեն դեպքում հասկացանք։ Հատկապես անգլերենի պարապմունքն է հավանել․ «Բոմբ պեն էր»։ Դաս տվողները, իր կարծիքով, լավն են, արցախցի ընկերոջն էլ է խորհուրդ տվել, որ մասնակցի դասերին։

Օգտակար ժամանց ու արժեքավոր գիտելիքներ

Մաթեմատիկայի դասը «Կրթություն հանուն հաղթանակի» նախաձեռնության տարբեր ծրագրերից մեկն է։ Սկզբում մի քանի հոգով մտածել են՝ ինչպես աջակցել արցախից եկած ընտանիքներին։ Ֆեյսբուքյան էջ են ստեղծել, աջակցելու առաջարկով գրառումներ արել, որից հետո իրենց են միացել կամավորներ։ Մեկը պատրաստ էր դասավանդել, մյուսը տրանսպորտ կամ տարածք էր ցանկանում տրամադրել։ Կամավոր-կազմակերպիչներից Աշոտ Պետրոսյանի խոսքով՝ 2 օրվա մեջ 100-ից ավելի արձագանքներ են եղել։

«Քանի որ այն մարդիկ, որոնք միացել են, կրթության ոլորտի հետ երկար ժամանակ առնչվող մարդիկ են, որոշեցինք մեր ունեցած գիտելիքները, հնարավորությունները, կապերը ծառայեցնել այդ նպատակին։ Փորձել մի կողմից ապահովել երեխաների համար օգտակար ժամանց, մյուս կողմից էլ իրենց փոխանցել արժեքավոր գիտելիքներ, ընդհուպ՝ այնպիսի գիտելիքներ, որոնց համար այլ պայմաններում իրենք պետք է վճարեին»,- նշեց Պետրոսյանը։ Ի դեպ նման դասընթացների մեջ են մտնում նաեւ ծրագրավորման, Photoshop ծրագրի դասերը եւ այլն։

Սկզբում նախատեսել են իրականացնել կենտրոնացված դասընթացներ՝ կոնկրետ վայրում՝ դասացուցակով, սակայն կորոնավիրուսով վարակվածների թվի աճի պատճառով հետաձգել են։ Այժմ 2 փուլով են իրականացնում նախաձեռնությունը։ Կամավորներն այցելում եւ դասընթացը կազմակերպում են երեխաների բնակության վայրերում կամ կազմակերպում են այցեր տարբեր տեղեր, օրինակ, թանգարաններ։ Երբ թանգարաններից կամավորներին հայտնում են, որ պատրաստ են աջակցել ու երեխաներին ընդունել, նրանք կազմակերպում են այցերը։

Արդեն այցելել են Ալեքսանդր Սպենդիարյանի տուն-թանգարան, Հայաստանի ազգային պատկերասրահ, Էջմիածնի Մայր տաճարի գանձարան- թանգարան եւ այլն։ Երեխաներից ոմանք այստեղ նաեւ մարզասրահ են հաճախում։ Փորձում են բացօթյա միջոցառումներ նույնպես իրականացնել։

«Վաղն ունենք հոգեբանի հետ հանդիպում, այգում պետք է երեխաների հետ հոգեբանն աշխատի»,-ընդգծեց Աշոտ Պետրոսյանը։

Կամավորներից այսօրվա մաթեմատիկայի դասի ուսուցչուհին՝ Օլյա Գրիգորյանը եւս ֆեյսբուքյան էջում է կարդացել հայտարարությունն ու միացել աշխատանքներին։

«Որոշեցի միանալ պուճուրներին, իրենց հետ ե՛ւ մի փոքր խաղամ, ե՛ւ մի քիչ ցրվեմ, որովհետեւ այս օրերին բոլորս էլ լարված ենք։ Փորձեմ իրենց տրամադրությունը փոխել, եթե հնարավոր է»,- նշեց Օլյան, որ մեզ հետ զրուցելուն զուգահեռ պատասխանում էր փոքրերի հարցերին ու խոստանում 10 նշանակել։

Մեր այն դիտակմանն էլ, թե երեխաները շատ ժիր են, արդյո՞ք դժվար չէ կամավորությունը, ընդգծեց՝ շատ-շատ ակտիվ են՝ իրենից ավելի։

«Ես ահավոր էներգիայով լի եմ, բայց իրենք ինձ տվել, անցել են»,- կատակեց կամավորը՝ հավելելով, դժվար չէ երեխաների հետ, սիրում է, երբ ակտիվ են, շարունակ շարժվում են, աշխատում, ոչ թե պարապ նստում։

Արցախից Հայաստան տեղափոխված այն ծնողները, որոնք ցանկանում են, որ իրենց երեխան մասնակցի նման միջոցառումների, պետք է գրեն «Կրթություն հանուն հաղթանակի» նախաձեռնության ֆեյսբուքյան էջին կամ զանգահարեն 033-29-81-81 հեռախոսահամարով։

Կամավորներն ընթացքում հանդիպում են ծնողների, երեխաների հետ, հասկանում՝ ինչի կարիք ունեն ու ըստ այդմ կազմակերպում միջոցառումները։

Տպել
472 դիտում

Ձեզնից յուրաքանչյուրն ամեն օր պետք է զգա, որ Կառավարությունը ձեր կողքին է, ձեր ցավով ապրողն է. վարչապետ (տեսանյութ)

Վերադարձող փախստականները, պահպանվող դիրքերն ու հանձնված բնակավայրերը. միջազգային անդրադարձը՝ Ղարաբաղի ներկային

Կորոնավիրուսի ծանր դեպքերի վարման համար Միացյալ Թագավորության շտապ բուժօգնության թիմի չորս անդամ գործուղվել է Հայաստան

Գերության մեջ հայտնված անձանց համար զանգահարեք 010 297415 հեռախոսահամարով.ԿԽՄԿ

Հռոմի Ս․Նիկողայոս եկեղեցում մատուցվել է պատարագ` նվիրված արցախյան պատերազմում նահատակված հերոսների հիշատակին

Երևան-Արտաշատ ավտոճանապարհին մեքենա է շրջվել. կան տուժածներ

Չեմպիոնը հաղթեց գավաթակրին. «Արարատ-Արմենիան» բարձրացավ 5-րդ հորիզոնական

Ֆրանսիան ներդնում է Լեռնային Ղարաբաղի հակամարտությունից տուժած հայ բնակչության աջակցության կառուցվածքային համակարգ

Երեւանում ծառերի էտումից առաջացած փայտանյութը անվճար կարող է տրամադրվել անապահով ընտանիքներին․ նախագիծ

Մեր հասարակությունը պետք է վերանայի կրթության նկատմամբ իր վերաբերմունքը. ԿԳՄՍՆ փորձագետ

Լավրովը Հորդանանի ԱԳ նախարարին է ներկայացրել ԼՂՀ-ում հրադադարի հաստատմանն ուղղված Ռուսաստանի միջնորդական ջանքերը

ԱԺ «Իմ քայլը» խմբակցության պատգամավորները հանդիպել են Հելեն Ֆեյզիի եւ Ժոնաթան Լաքոտի հետ

Covid-անվտանգության կանոնները վերանայվել են գեղեցկության սրահների և վարսավիրանոցների համար. ԱԱՏՄ

Տավուշի մարզի սահմանապահ գյուղերում կառուցվել է 4 ռմբապաստարան

Արցախում ճշգրտվում են սահմանները. ՊԲ հրամանատարությունը հորդորում է լինել համբերատար

ՀՀ վարչապետ Նիկոլ Փաշինյանը հանդիպում է անհետ կորածների հարազատների հետ

Արցախում ականի պայթյունից վիրավորված փրկարարների ու ՊԲ զինծառայողի կյանքին վտանգ չի սպառնում

Մեկնարկել է ՀՀ նախագահ Արմեն Սարգսյանի աշխատանքային այցը Հորդանանի Հաշիմյան Թագավորություն (տեսանյութ, լուսանկարներ)

Վարչապետն այցելել է ռազմարդյունաբերական ընկերություններ և հանձնարարել շարունակել արտադրական հզորությունների զարգացումը

Վարչապետ Փաշինյանը շնորհավորել է Արարատ Միրզոյանին ծննդյան տարեդարձի կապակցությամբ