Մեկին ծեծելով, մյուսին վախեցնելով՝ եկել մասնակցել, շահել գնացել են. Մարությանը խոստացավ կոտրել կոռուպցիոներների գլուխը

Երեւան քաղաքի 2019 թվականի բյուջեի հաշվին իրականացվել է ծրագրի 70 տոկոսը: Այսօր ավագանու հերթական նիստին «Երեւան քաղաքի 2019 թվականի բյուջեի կատարման հաշվետվությունը հաստատելու մասին» նախագծի քննարկման ժամանակ ավագանու ընդդիմադիր անդամները ներկայացրին չկատարված կամ թերի կատարաված աշխատանքները՝ պարզաբանումներ խնդրելով Երեւանի քաղաքապետ Հայկ Մարությանից:

Քաղաքապետն էլ իր հերթին մատնանշեց տարիներ շարունակ եղած թերություններն ու խոչընդոները, որոնք շտկվել են այս ընթացքում, եւ որոնց պատճառով աշխատանքը փոքր-ինչ տուժել է: 

Նախագծի քննարկման ժամանակ «Լույս» խմբակցության ավագանու անդամ Թեհմինա Վարդանյանը Երեւանի քաղաքապետ Հայկ Մարությանից հետաքրքրվեց՝ այս կատարողական փաստաթղթի 30 տոկոս թերակատարման հետ կապված վարչության պետերից կամ փոխքաղաքապետներից որեւէ մեկը գրավոր նկատողություն ստացե՞լ է, թե՞ ոչ:

«Այդ հարցն ավելի շատ աշխատակազմի ղեկավարինն է, ես եթե դժգոհություն կամ ինչ-որ խնդիր եմ ունենում՝ անկախ նրանից դա կատարողականին է վերաբերում, ինչ-որ հանձնարարականի սխալ կատարման, թե ինչ-որ թերացմանը, բնականաբար, թե՛ գրավոր, թե՛ բանավոր՝ նայած՝ որ դեպքում որը, ստանում են նկատողություն»,- արձագանքեց Հայկ Մարությանը:

Թեհմինա Վարդանյանը քաղաքապետի պատասխանից եզրակացրեց՝ այս հարցի հետ կապված որեւէ մեկը նկատողություն չի ստացել եւ հայտարարեց․ «Քանի որ Երեւանի ավագանու առաջին լիազորությունը քաղաքապետի աշխատանքը վերհասկելն է, պարո՛ն քաղաքապետ, ես էլ ձեզ եմ բանավոր նկատողություն տալիս՝ դեղին քարտ, որովհետև սա իսկապես խայտառակ կատարողական է»:

Ապա արտահերթ ելույթի իրավունքով հանդես եկավ Երեւանի ավագանու «Լույս» խմբակցության ղեկավար Դավիթ Խաժակյանը եւ ընդգծեց, որ 2019-ի բյուջեն, որը ծրագրվել է ամբողջությամբ այս ավագանու կողմից ու իրականացվել է ամբողջությամբ այս քաղաքային իշխանությունների կողմից՝ իր բացասական ցուցանիշով, ծախսային մասով, գերազանցել է 2018-ին, երբ մենք ամիսներ շարունակ ունեինք անցումային, նախընտրական շրջան:

«Նախադպրոցական հաստատություների՝ մանկապարտեզների հիմնանորոգման եւ վերանարոգման համար Երեւանի ավագանին նախատեսել էր 1 մլրդ 397 մլն դրամ, ես ուզում եմ հասկանալ, թե մենք ի՞նչ սրտով ենք այս կատարողականին կողմ քվեարկելու, եթե կատարվել է նախատեսված գումարից ընդամենը 125 մլն դրամը, որը կազմում է 10 տոկոսը՝ տարեկան ճշտվածի եւ 8.97 տոկոսը՝ հաստատվածի: Այսինքն՝ մենք ունենք 90 եւ ավելի տոկոս թերակատարում, ինչը նշանակում է՝ մեր հարկատուները վճարել են, որ 2019-ի համար մանկապարտեզներ վերանորոգենք, եւ մենք այդ գումարից ծախսել ենք ընդամնեը 10 տոկոսը, աշխատանքը մնացել է: Մանկապարտեզների գույքի համալրման աշխատանքի կեսից ավելին չի կատարվել, պետք է ծախսվեր 150 մլն դրամ, ձեռք բերվեր գույք, սակայն դրա կեսն է ձեռք բերվել»,- ասաց նա։

Խաժակյանը նաեւ տեղեկացրեց, որ ոռոգման ցանցի բարելավման մասով ավագանին նախատեսել էր 154 մլն դրամ, կատարվել է ընդամենը 50 մլն դրամը:

Քաղաքապետը հանդես եկավ ելույթով եւ մանրամասնեց, թե ինչու մի շարք աշխատանքներ մինչեւ հիմա արված չեն: Նա նշեց, որ վարչություններում մարդիկ տարիներ շարունակ չեն իմացել, թե ինչպես գրեն մրցույթներին մասնակցելու տեխնիկական բնութագիր, չեն իմացել, քանի որ դրա կարիքը չի եղել: «Ըկերությունը մեկին ծեծելով, մյուսին վախեցնելով՝ մենակ եկել մասնակցել, շահել գնացել է: Ինչ կատարվեց անցած տարի: Մարդիկ եկան, հասկացան, որ այլ իրավիճակ է: (Մրցույթը շահած, բայց աշխատանքը չկատարած կազմակերպություններից) մեկին տույժ-տուգանք տվեցինք, մյուսին՝ մեկ այլ բան, արդյունքում գործը տուժեց: Բայց ոչինչ. մենք կարողացանք հիմք դնել համակարգային փոփոխությունների»,- ասաց նա:

Մարությանը նաեւ նկատեց, որ եղան մարդիկ, որոնք նոր պայմաններում համարձակվեցին մասնակցել մրցույթներին, սակայն չկարողացան որակ ապահովել, եւ նրանց թույլ չտրվեց աշխատանքը շարունակել: Աշխատանքերի մեծ մասը չեն ընդունել, բայցեւ գումարները չեն կորել: «Այդ գումարը մերն է, համայնքինն է, երեւանցիներինն է»,- ասաց նա՝ հավելելով, որ համակարգային այս փոփոխությունների մեծ մասը պետք  է արված լիներ դեռ 20 տարի առաջ:

«Քանի քաղաքապետն եմ, երաշխավորում եմ՝ այդ բոլոր գործերն արվելու են եւ արվում են 100 տոկոսով ազնիվ, թափանցիկ, արդար, առանց կոռուպցիայի: Գլուխն եմ կտրելու էդ մարդու, որը որ կոռուպցիայով է զբաղվելու: Կներեք, որ այսպես կոպիտ եմ ասում. ամբողջ ժողովուրդը վստահել է մեզ՝ նոր իշխանություններին, եւ եթե մեկն իր մտքում կարող է պատկերացնել, որ կարող է դավաճանել ժողովրդին, ամենակոպիտ պատասխանն է ստանալու բոլորի կողմից, որպես քաղաքապետարանի ղեկավար՝ իմ կողմից»,- ասաց Մաությանը:

Գրանցվեց ավագանու 46 անդամ՝ 40 կողմ, 6 դեմ, 0 ձեռնպահ: Երեւան քաղաքի 2019  բյուջեի կատարման հաշվետվությունը հաստատելու մասին որոշումն ընդունվեց: