Ուսանողները պահանջում են բուհի կառավարման խորհրդում չնվազեցնել իրենց տեղերը. ծրագրում են բողոքի գործողություններ

Երեւանի պետական համալսարանի Հոգաբարձուների խորհրդի անդամ ուսանողները դժգոհ են. «Բարձրագույն կրթության եւ գիտության մասին» ՀՀ օրենքի նախագծով կառավարման խորհրդի կազմում ուսանողների թիվը կրճատվում է, մինչդեռ կառավարության եւ լիազոր մարմնի ներկայացուցիչներինը՝ ավելանում:

Ուսանողները նաեւ կարծում են, որ այսօր բուհի Հոգաբարձուների խորհրդի՝ ՀՀ կառավարության կողմից ներկայացված անդամներն իմիջիայլոց վերաբերմունք ունեն եւ նիստերից շատ են բացակայում, սակայն հարցը չի բարձրաձայնվում:

Այս մասին մեզ հետ զրույցում նշեց ԵՊՀ ուսանողական խորհրդի նախագահ, Հոգաբարձուների խորհրդի անդամ Դավիթ Ափոյանը՝ շեշտելով, որ նոր օրենքի ընդունման դեպքում պատկերը կարող է ավելի վատանալ. ստացվի մի իրավիճակ, որ այն ուսանողները, որոնք նիստերին ներկա են, հետաքրքրված են համալսարանի առօրյայով  ու ապագայով, զրկվեն բուհի կառավարմանն արդյունավետ մասնակցելու հնարավորությունից, մինչդեռ այն մարդիկ, որ չեն ներկայանում նիստերին, կունենան վճռական ձայնի իրավունք։

Հիշեցնենք, որ ԵՊՀ հոգաբարձուների խորհրդի օրերս հրավիրած նիստում ուսանողները, նկատելով, որ Կառավարության կողմից ներկայացված 16 անդամներից 8-ը չեն եկել, նրանք եւս չմասնակցեցին՝ բոյկոտելով նիստը: Արդյունքում այն չկայացավ։

Ափոյանի խոսքով՝ իրավիճակը ոչ թե միայն նախորդ անգամ էր այդպիսին, այլ կրկնվում է հաճախ, եւ բոյկոտելով՝ իրենք ցանկանում էին ընդգծել ուսանող անդամների քանակն ավելացնելու անհրաժեշտությունը, ինչպես նաեւ ցույց տալ, թե ինչպես խորհրդում 50 % ներգրավածություն ունեցող ներկայացուցիչները չեն մասնակցում քննարկումներին:

ՈւԽ նախագահը նշեց, որ ներկայումս ուսանողները բուհի կառավարմանը մասնակցում են 21%-ով, նրանք կազմում են խորհրդի 32 անդամներից 8-ը:

Նոր օրենքի նախագծով, սակայն, չի հստակեցվում, թե նրանք քանի տոկոս մասնակցություն պետք է ունենան բուհի կառավարմանը, միայն նշվում է, որ կառավարման խորհուրդը պետք է կազմված լինի 12 անդամից՝ 1 ուսանող, 6 կառավարության ներկայացուցիչ, 4 դասախոս եւ 1 գործատու:

«Մեր պահանջն է գործատուի կամ արտաքին ներկայացուցիչներից որեւէ մեկի հաշվին բարձրացնել ուսանողների թիվը եւ օրենքի նախագծում հստակ ամրագրել բուհի կոլեգիալ  կառավարման մարմիններում ուսանողների մասնակցության չափը, թե ինչ համամասանությամբ են մասնակցելու»,-նշեց Դավիթ Ափոյանը՝ հավելելով, որ բուհի կոլեգիալ կառավարման մարմինները չեն ավարտվում միայն հոգաբարձուների խորհրդով, այլ կա Գիտական խորհուրդ եւ այլն:

Ուսանողները պետք է կարողանան ներկայացնել իրենց առաջարակությունները, դժգոհությունները, փորձեն պաշտպանել իրավունքներն ու պարտականությունները: Նրանց բողոքները բարձրաձայնելու համար՝ հազար ու մի ճանապարհ կա, սակայն, Ափոյանի խոսքով՝ իրենք ցանկանում են ամեն բան կատարել ինստիտուցիոնալ տարբերակով, այսինքն՝ պետք է լինի մասնակցության հստակ չափաբաժին:

Մեկ այլ հարց է նախագծի այն դրույթը, ըստ որի՝ գիտական խորհուրդներում ուսանողների մասնակցությունը թողնվում է բուհի հայեցությանը: Ափոյանը սա էլ ճիշտ չի համարում: Նրա խոսքով՝ գիտական խորհուրդներում ուսանողներն ընդհանրապես ընդդիմադիր կեցվածք ունեն, ներկայացնում են պահանջներ, դժգոհություններ ու ճիշտ չի, որ իշխանությունը, տվյալ դեպքում՝ բուհի ղեկավարությունը որոշի՝ ինչքան պետք է լինեն ընդդիմության ներկայացուցիչները: «Ցանկացած մարմին, կցանկանա, որ իր դեմ բողոքողները քիչ լինեն»,- համոզմունք հայտնեց Ափոյանը:

Այն հարցին՝ ինչ է նախատեսվում առաջիկայում եւ արդյոք կբոյկոտվի նաեւ հոգաբարձուների խորհրդի հաջորդ նիստը, պատասխանեց, որ պատրաստվում են դրան մասնակցել, քանի որ նպատակ չունեն բուհի գործունեւությանը վնասել. «Սա նախազգուշացնող բնույթ ուներ»:

Բայց բողոքի այլ գործողություններ, սակայն, ամեն դեպքում նախատեսում են: Ուսանողներն այս ընթացքում կիրականցնեն քննարկում եւ ավելի ուշ տեղյակ կպահեն իրենց հետագա գործողությունների մասին: