Հայոց լեզվի կենտրոնացված քննությունից անբավարար է ստացել 1 686 աշակերտ, 19-20 միավոր՝ 152-ը

Գնահատման եւ թեստավորման կենտրոնը հունիսի 2-ին հրապարակել է 9-րդ դասարանի հայոց լեզու առարկայի կենտրոնացված քննության գնահատականները, իսկ այսօր բողոքարկման փուլն է: Վերջնական արդյունքները հայտնի կլինեն հունիսի 10-ին:

Առայժմ, սակայն, նախնական տվյալները հուշում են, որ համեմատաբար մեծ է դրական միավորի շեմը չհաղթահարած աշակերտների թիվը եւ, ընդհակառակը, փոքր է ամենաբարձր՝ 19-20 միավոր ստացողների քանակը: Հայոց լեզվի քննություն հանձնել է 31 021 սովորող: Նրանցից 1 686-ը կամ 5.4 %-ը ստացել է անբավարար գնահատական: 19-20 միավոր ստացել է 152 աշակերտ կամ քննություն հանձնածների 0.5 %-ը: Միջին միավորը կազմել է 12.16:

2018 թվականին նույն դասարանում հայոց լեզվի քննության արդյունքները եղել են այսպիսին. 29 186 սովորողից դրական միավորի շեմը չի հաղթահարել 331-ը կամ 1.1 %-ը: 19-20 միավոր ստացել է 1 612 աշակերտ կամ 5.5 %-ը: Միջին գնահատականը եղել է 12.69:

2017 թվականին քննություն է հանձնել 29 084 աշակերտ: Անբավարար է ստացել 352-ը կամ 1.2 %-ը: 1 649 սովորող կամ քննություն հանձնածների 5.7%-ը ստացել է 19-20 միավոր: Միջին գնահատականը կազմել է 12.81:

Գնահատման եւ թեստավորման կենտրոնի լրատվական ծառայությունից, սակայն, փոխանցում են, որ այս քննությունը նախորդների հետ համեմատելը ճիշտ չէ: «9-րդ դասարանի ավարտական քննության արդյունքները նախորդ տարիների հետ համեմատելը տեղին չէ, քանի որ փոխվել են ինչպես քննության ձեւը, այնպես էլ քննական թեստի բովանդակությունը: Այս տարի քննությունն անցկացվել է կենտրոնացված ձեւով, իսկ թեստերը ներառել են ե՛ւ սովորական թեստային առաջադրանքներ, ե՛ւ ազատ շարադրանք: Նախորդ երկու տարիներին աշակերտները գրել են  փոխադրություն»,- հիմնավորվում է գրավոր պատասխանում:  

Այս տարի ամենաբարձր միջին միավորը գրանցվել է 3 մարզում ու Երեւանում: Սյունիքում՝ 12.52, Շիրակում՝ 12.19, Երեւանում՝ 12.9, Կոտայքում՝ 12.07: Ամենացածրը Արագածոտնում է՝ 11.6 միավոր:

Երեխաներն ու ծնողները հիմնականում դժգոհություն չունեն

Ի սկզբանե, երբ Կրթության եւ գիտության նախարար Արայիկ Հարությունյանը հայտարարեց 9-րդ դասարանում հայոց լեզվի քննությունը կենտրոնացված կարգով անցկացնելու որոշման մասին, հանրության շրջանում առաջ եկան որոշակի խուճապային տրամադրություններ: Շատերը համոզված էին, որ դա նշանակում է անբավարար գնահատականների շքերթ: Բայց թեպետ դրանց թիվը էապես մեծ է նախորդ տարիների արդյունքների համեմատությամբ, սպասելիքները շատ ավելի հոռետեսական էին: Մեզ հետ զրուցած աշակերտներն ու ծնողները բովանդակային առումով դժգոհություն չունեին: Նրանք նույնպես այն կարծիքին էին, որ բոլոր մտավախություններն անտեղի էին:

«Ինձ թվում է՝ բոլորի մոտ էլ կար վախը, որ քննությունը կենտրոնացված է, չեն օգնի, բայց դե դպրոցը սովորեցրել է մեզ այդքանը, լավ հանձնեցինք: Ես 16 եմ ստացել եւ գոհ եմ իմ գնահատականից: Պարապել էինք, պատրաստվել էինք թեստերով: Շարադրությունն էր մի քիչ դժվար, բայց հաղթահարեցիք: Պետք է 50-70 բառ գրեինք, բայց ասենք կարող է 49 լիներ: Ամեն ինչ լավ էր, կազմակերպված էին ուսուցիչները: Ծանոթ ուսուցիչ չի եղել, ինչպես միասնականի ժամանակ: Մենակ չլարվեն աշակերտները, լարվածությունը մեջներից հանեն, ամեն ինչ լավ կլինի»,- ասաց Երեւանի Եղիշե Չարենցի անվան դպրոցի 9-րդ դասարանն ավարտող Ռուբեն Սարգսյանը:

Նույն դպրոցի աշակերտուհիներից մեկի ծնողը, որն անունը հրապարակել չցանկացավ, նույնպես դրական գնահատեց կենտրոնացված կարգով քննությունների անցկացումը, թեպետ առավել կնախընտրեր, եթե այդ փոփոխությունները կյանքի կոչվեին ոչ հապշտապ: Նա որոշակի խնդիր էր տեսնում՝ կապված գնահատման սկզբունքի հետ: Աղջիկը 17 միավոր է ստացել: Իր հաշվարկով՝ պետք է լիներ 18:

«Կա անհամաձայնություն՝ գնահատման սանդղակի վերաբերյալ, որը պարզ չէ: Սովորաբար հավաքած միավորը բաժանվում է հնարավոր առավելագույն միավորի, այսինքն՝ 40-ի, բազմապատկվում առավելագույն գնահատականով, այսինքն՝ 20-ով: Իմ աղջիկը 36 միավոր է ստացել, որի դեպքում գնահատականը պետք է լիներ 18: Իրենց մոտ 17 է: Սանդղակը սխալ է հաշվարկած: Անտրամաբանական է: Ընդամենը սա է: Թե չէ քննությունները լավ են կազմակերպված եղել, ստուգումները նորմալ են անցել, իսկապես արդար քննություններ են եղել, դեմ չենք: Ուղղակի թող պարզաբանեն, միգուցե ես սխալ եմ հասկանում իրենց գնահատման չափորոշիչը»,- ասաց նա՝ ընդգծելով, որ ամեն դեպքում գնահատականը չեն բողոքարկելու, որովհետեւ 9-րդ դասարանի ավարտական քննությունների արդյունքներն այնքան էլ չեն կարեւորում: «Ազատ շարադրանքից իմ երեխային մեկ բալ իջեցրել են: Իրենք «հունից դուրս գալով»-ը համարել են միջադաս դերբայական դարձված եւ դրել են երկու կողմից ստորակետ: Դրանց բացակայությունը համարել են սխալ, բայց «հունից դուրս գալ»-ը չի կարող լինել դերբայական դարձված, որովհետեւ հարադրավոր բայ է, կետադրություն չի պահանջում»,- իմիջիայլոց, նաեւ նկատեց ծնողը: 

ԳԹԿ տնօրենի պաշտոնակատարի մայիսի 20-ի հրամանով հաստատվել է, որ օրինակ, 32-33-34 միավորի դեպքում գնահատականը կազմում է 16, 35-36 միավորի դեպքում՝ 17, 37-38-ի դեպքում՝ գնահատականը 18 է, 39 միավորի դեպքում՝ 19, իսկ 40-ի դեպքում՝ 20:

Հ.Գ. Հիշեցնենք, որ կենտրոնացված քննություն հանձնած աշակերտները նույնպես երկու անգամ վերահանձնելու հնարավորություն կստանան: Այս անգամ արդեն յուրաքանչյուրը իր դպրոցում:  

Տպել
46197 դիտում

Թուրքիայում ահաբեկիչների վնասազերծման ժամանակ նրանցից մեկը պայթեցրել է իրեն (տեսանյութ)

Մեղադրանքներ, բոյկոտ ու վիրավորանք. Ֆրանս-թուրքական հեռակա հակամարտությունը

Սկզբում 5.000, հետո 40․000. Վանաձորում երեխաները էջանշաններ ու օրացույցեր են վաճառում, գումարը փոխանցում հիմնադրամին

Ադրբեջանի սպառնալիքներից չենք վախենում․ Հովհաննիսյանը՝ թուրքական F-16-երը կիրառելու Ալիևի հայտարարության մասին

Հաղթելու ենք նաեւ կրթությամբ ու գիտությամբ․ մեդալակիր հայ երիտասարդները մտադիր են իրենց գիտելիքով հզորացնել հայրենիքը

Հումանիտար ուղեբեռն առաջնահերթության կարգով ուղարկվում է Արցախ. ԱԻ փոխնախարար

Սյունիքի դարպասները հյուսիսից հարավ ամուր փակ են. դուխներդ տեղը, գլուխներդ բարձր. Արայիկ Հարությունյան

Թշնամական երկու ԱԹՍ քիչ առաջ ցած ընկավ. Վահրամ Պողոսյան

Ադրբեջանի կողմից հայկական էջերին ուղարկվող պատերազմական դաժանություններով տեսանյութերը կուղարկվեն միջազգային մարմիններին

Դարբնիկ գյուղում այրվել է մոտ 800 քմ խոտածածկույթ, փայտե շինություն, վառելափայտ և կենցաղային իրեր. ԱԻՆ

Հակառակորդը, այո, մոտեցել է Սյունիքի դարպասներին, բայց իրավիճակը ծայրահեղ չէ․ Արծրուն Հովհաննիսյան

Հայ գեներալի ու ժամկետայինի հակագրոհից փախուստի դիմեցին աշխարհի հզորներից համարվող հատուկջոկատայինները. Հովհաննիսյան

Երեկ երեկոյան հակառակորդին հաջողվեց գրավել Կուբաթլուն և որոշ ուղղություններով առաջանալ․ Արծրուն Հովհաննիսյան

Տեսանյութ է տարածվել, որտեղ ոստիկանության ծառայողը դժգոհում է կացության պայմաններից ու կենցաղային վիճակից. պարզաբանում

Առ այսօր հայտնի է գերեվարված 15 հայ զինծառայողի, 1 բնակչի մասին․ Կառավարությունն ու փաստաբանները դիմել են ՄԻԵԴ

Ամեն տղամարդ պետք է հենց հիմա ոտքի կանգնի ու գնա իր զինկոմիսարիատ, սա իմ հրամանն է. վարչապետ (տեսանյութ)

Աներկբա խոստովանեմ, որ մեր հայրենիքի պաշտպանները մարդու իրավունքների գլխավոր պաշտպաններն են մեզ համար. Արցախի ՄԻՊ

Արցախն ու պատերազմական օրերի պատկերը Դիլաքյան եղբայրների վրձնած նկարներում ու գույներով (լուսանկարներ)

Շարունակվում են հակահամավարակային անվտանգության կանոնների վերահսկման բոլոր գործառույթները. ոստիկանություն

Տիգրան Բարսեղյանը դուբլի հեղինակ դարձավ