10 հազար դոլար՝ գործը վերաբացելու համա՞ր. Մհեր Ենոքյանի ներման շուրջ խմորումները շարունակվում են

Ցմահ ազատազրկման դատապարտված Մհեր Ենոքյանի՝ առաջիկայում հնարավոր ազատ արձակման մասին խմորումները շարունակվում են: Թեման արդեն մի քանի օր է, ինչ բուռն քննարկումների թիրախ է դարձել ֆեյսբուքյան տիրույթում ու լրատվական կայքերում:

Ժամանակին ՀՀ նախկին ոստիկանապետի խորհրդականի պաշտոնը զբաղեցնող Նարեկ Մալյանը ֆեյսբուքի իր էջում հերթական գրառումն է կատարել թեմայի հետ կապված՝ լրագրող Զարուհի Մեջլումյանին մեղադրելով  «Սորոս»-ի հիմնադրամից գումար ստանալու մեջ՝ ցմահ դատապարտյալ Մհեր Ենոքյանի գործը վերաբացելու համար։

«Էս էլ բոլոր էն միամիտների համար, ովքեր մինչև հիմա հավատում էին, որ Զարուհի Մեջլումյանը անվճար է մարդասպանին հերոսացրել։

Հ.Գ. Աղաջանովի երեխու դիակի փողից 10000$ մարդասպան մհեր ենոքյանինն էր, 10000$՝ մարդասպան արամ հարությունյանինը, և 10000$՝ լրագրող Զարուհի Մեժլումյանին։ Իտավո ստացվեց 30000$ հավասար ախպերափայ»,- գրել է Նարեկ Մալյանը և հրապարակել համապատասխան սքրին։

Մալյանի խոսքերին ի պատասխան լրագրող, այժմ ՀՀ պետական վերահսկողության ծառայության լրատվության և հասարակայնության հետ կապերի վարչության պետ Զարուհի Մեջլումյանը ֆեյսբուքի իր էջում արձագանքել է.

«Իմ անձնական կյանք ներխուժելու, հազարավոր սպառնալիքներ տեղալու, ատելության խոսքի տարածման, կարգավիճակով պայմանավորված խտրական վերաբերմունքի, կազմակերպված հոգեբանական տեռոր, գրոհ կատարելու համար նախատեսված է քրեական պատասխանատվություն։ Ես իրավական այդ ճանապարհով եմ գնում»։

Թեմային անդրադարձել է նաեւ «Ինֆորմացիայի ազատության կենտրոն» ՀԿ-ի հիմնադիր անդամ Լիանա Դոյդոյանը՝ առաջ քաշելով վարկած, որը դեռեւս չէր քննարկվել: Ըստ Դոյդոյանի՝ հնարավոր է Զարուհի Մեջլումյանի ու Մհեր Ենոքյանի ամուսնությունն իրականում ֆիկտիվ բնույթ է կրել եւ արվել է պարզապես ցմահ ազատազրկվածի մոտ մուտքի թույլտվություն ունենալու եւ լրատվական հրապարակումների համար:

«Չէ, դե հերիք եղավ հիմա էլ մարդասպանի հետ կապեք անմնացորդ սերը, սիրեցյալ.... Չի կարելի, սերը ուժեղ է, այն չի հանդուրժում սուտը, սույրսայր դանակով նույնչափ ուժգին կխորտակի իր հետ խաղացողին։ Իսկ չե՞ք մտածում, որ սեր չկար ու չէր կարող լինել։ Զարուհի, չես համոզում, որքան էլ իբր փաստերով ես ուզում խոսել, հիմա էլ՝ թե անձնական կյանք են ներխուժում։ Չէ, Զարուհի, դու ազնիվ լինեիր. որպես լրագրող չէիր կարող հաճախակի կամ ընդհանրապես օրինական այցելել մահապարտին, միայն մեկ տարբերակ կար՝ զագսավորված կինը լինել, և պարբերաբար, օրինական այցելել բանտ, ոչ միայն այդ մի դեպքով, այլ՝ մյուս դեպքերի համար ևս մանրամասներ ունենալ։ Իսկ Հետք-ի խմբագիրը, թույլ տվեք ինձ ասել հաստատապես, հնարավոր չէ՝ չիմանար ձեր զագսավորման մասին, բայց չի ասվել, ու շարունակել եք Մհերի վերաբերյալ հոդվածները տպագրել հետքում։ Ինչպե՞ս, չէ որ հետք էթիկայի և բարձր լրագրության իբրև թե չափանիշն է։

Հետքի խմբագիրն այսօր պետք է, որ ասելիք ունենա (ասում եմ ցավով, որպես հետաքննող լրագրողների ընկերակցության ՀԿ-ի հիմնադիր անդամներից մեկը, հետքի նախկին լրագրող, և լուրջ ակնկալիքով, որ Էդիկը կխոսի առնվազն 2013 թվականից հետո Զառայի հեղինակած Մհերի մասին նյութերի հրապակման վերաբերյալ)։ Կարո՞ղ է լինել նաև այս տարբերակը՝ որ հենց Հետքն է որոշել ֆիկտիվ զագսավորման տանել Զարուհուն՝ ապահովելու թեմայի հետքաննությունը և գրանտային ծրագրերի պաբերականությունը։ Լռել են, իբրև թե մասնագիտական մեթոդներ չեն բացահայտում, շատ դեպքերում են Հետքի լրագրողները կերպարանափոխության մեթոդով նյութեր գրել, հիմա էլ սա է եղել մեթոդը, ու այստեղ գալիս է՝ նպատակը արդարացնում է մեթոդները. մոտեցումը։ Զառա, հիմա էլ ազնիվ չես, թեկուզ հանուն մարդասիրական մղումների՝ մարդասպանին ազատության մեջ տեսնելու, պետական պաշտոնդ պիտի թողնես՝ հանուն արդարության, այո պիտի ինքդ նախ լիովին ազնիվ լինես, այո. հանրության հետաքրքրություն և կրքեր շարժող թեմայում պիտի անձնականդ էլ պատրաստ լինես բացել՝ հանուն արդարության։ Թե չէ, չես համոզում։ Սերը սույրսայր դանակ է, կխորտակի իր հետ խաղացողին»,– գրել  է նա։

Հիշեցնենք, որ ընկերոջը դաժանորեն սպանելու համար ցմահ ազատազրման դատապարտված Մհեր Ենոքյանին հավանական ներում շնորհելու եւ հնարավոր ազատ արձակման մասին տեղեկատվությունն ու աղմուկը չի լռում արդեն քանի օր: Թեմային անդրադարձել է նաեւ սպանված Իոսիֆ Աղաջանովի ընտանիքը, հայրը՝ Միխայիլ Աղաջանովը, ով էլ բացահայտել էր, որ Զարուհի Մեջլումյանն ու Մհեր Ենոքյանը օրինական ամուսիններ են 2013 թվականից սկսած եւ Մեջլումյանն ընդամենը պայքարում է ամուսնու ազատ արձակման համար:

Նա նաեւ նամակով դիմել էր ՀՀ վարչապետին ու նախագահին՝ հարցը կրկին վերանայելու համար: