Ապացուցելու եմ, թե ում գարաժից է «Իգլան» և ում է պատկանում. ցուցմունք տվեց Սամվել Բաբայանը

«Ես որեւիցե դեպքում չեմ կարող ինձ մեղավոր ճանաչել, եթե մի գործում հանցանք չկա»:

Այսօր այսպես սկսեց իր ցուցմունքը ԼՂՀ ՊԲ նախկին հրամանատար, Արցախի հերոս Սամվել Բաբայանը: Եվ չնայած վատառողջ լինելուն, Բաբայանն այսօր պատրաստակամություն հայտնեց ցուցմունք տալու: Բաբայանն իր ցուցմունքը բաժանեց երկու դրվագի: Նախ խոսեց «Իգլա» զենիթահրթիռային համակարգի մասին:

Նշենք, որ այդ դրվագով Բաբային մեղադրանք է առաջադրվել ՀՀ քրեական օրենսգրքի 235 հոդվածի 2-րդ մասով (ապօրինի կերպով զենք ձեռք բերելը, կրելը կամ փոխադրելը):

Սամվել Բաբայանը պատմեց, որ սույն թվականի մարտի 18-ին իր մոտ է գնացել գործով ամբաստանյալ Սանասար Գաբրիելյանը, ցույց տվել պլանշետում առկա «Իգլայի» խողովակի լուսանկարը եւ հարցրել՝ ինչ վիճակում է այն: Նայելով լուսանկարը Սամվել Բաբայանն իր մարտական ընկերոջը հայտնել է, որ այն ամբողջական չէ, կարեւոր մասնիկը բացակայում է: Դա այն մասնիկն է, որն աշխատացնում է ամբողջ համակարգը հնարավոր է, որ  պետք գա բանակին։ Սամվել Բաբայանը նշել է, որ դա ամբողջական չէ, ընդամենը «տրուբա» է, կարեւոր մասնիկը բացակայում է։

«Ինքը լուսանկարը ցույց է տվել ինձ, որովհետեւ գիտի, որ ես հասկանում եմ։ Իրեն ասել եմ, որ լիարժեք չէ, ընդամենը մեկ հատն է երեք հատից, բացակայում է կարեւոր մասնիկը։ Հարցրեց՝ հնարավո՞ր է՝ բանակին պետք գա, ես էլ ասել եմ՝ կարող ա։ Բայց զգուշացրել եմ, որ, եթե դա իր մոտ տեսնեն, հնարավոր է՝ քրեական գործ հարուցեն, թող ինչ-որ «թեւավոր»-ի  այսինքն՝ սպայի տա, նա էլ փոխանցի բանակին։ Բացի դա, էդ մի խողովակը չէր կարող լինել 40 հազար, եթե ամբողջ համալիրը կարելի է ձեռքբերել 15 հազարով։ Ես դրդել եմ, որ այդ գործարքը չինի, ոչ թե՝ դրդել եմ ձեռքբերելուն»,-ասաց նա։ Շարունակելով իր ցուցմունքը Բաբայանն ասաց, որ հանդիպումից մի քանի օր անց տեղեկացել է, որ Սանասար Գաբրիելյանին ձերբակալել են: Ձերբակալությունից հետո Սամբել Բաբայանի մոտ է գնացել նրա վարորդ-ընկերը, որին Բաբայանն ասել է, որ գա եւ պլանշետից ջնջի զենքի լուսանկարները:

«Ես ուզում եմ հասկանալ ուրիշ ի՞նչ փաստարակ կա, որ ես մեղավոր եմ»,- դիմելով դատավորին՝ ասաց Բաբայանը: Նա կոչ արեց դատարանում խոսել ոչ թե ենթադրություններով, այլ՝ փաստերով: Ենթադրություններ ասելով, Բաբայանն ըստ էության ակնարկում էր մեղադրող դատախազ Արամ Արամյանին, քանի որ պարբերաբար վերջինիս խորհուրդ է տալիս ոչ թե ենթադրություններ անել, այլ՝ խոսել կոնկրետ փաստերով: Այս դրվագով ցուցմունքն ավարտելուց հետո Սամվել Բաբայանը պատրաստակամություն հայտնեց պատասխանել կողմերի հարցերին: Մեղադրող դատախազ Արամ Արամյանը նախ հետաքրքրվեց, թե Սանասար Գաբրիելյանի հետ պարտքուպահանջ ունեցե՞լ են, թե՞ ՝ ոչ: Բաբայանը բացասական պատասխան տվեց, ապա հավելեց, որ Սանասար Գաբրիելյանը պետք է Վրաստանից տախտակներ բերեր իր համար, դա է միայն եղել: Մեղարդողի հարցին՝ արդյո՞ք իմացել է, որ «Իգլան» Հայաստան է բերվել Թբիլիսիից, Սամվել Բաբայանը պատասխանեց. «Ես չեմ գտնում, որ էդ հրթիռը Թբիլիսիից են բերել, ես ձեզ ապացուցելու եմ, թե ում գարաժից է դա եւ ում է պատկանում»։ Մյուս հարցին, թե ինչո՞ւ է Սանասար Գաբրիելյանը հենց իրեն ցույց տվել «Իգլայի» լուսանկարը, Բաբայանն ասաց. «Նա իմ մտերիմն է, որին գիտեմ 1992թ-ից, նա ծառայել է ինձ մոտ: Էլ ո՞ւմ ցույց տար, եթե ոչ ինձ: Եթե ձեր մոտ բերեր, կիմանայի՞ք ինչ է: Ես, լավ հասկանալով, որ դա ռազմամթերք է, որի պատճառով նրա դեմ կարող էր գործ հարուցվեր, նման խորհուրդ եմ տվել»:

Մեղադրողի դիտարկմանը, որ ամբաստանյալը պարբերաբար դատաքննության ընթացքում հայտարարել էր, որ «Իգլայի» խողովակն անպիտան է, այնինչ հիմա նշեց, որ ըստ էության պիտանի է, սա ինչպե՞ս կպարզաբանի, Բաբայանն ասաց. «Եթե գլխավոր մասնիկը լինի պիտանի կլինի, այդ մասը չկա, եթե սա զինամթերք են համարում, մի մասիկը գոյություն չունի, չկա այն մասնիկը, որը ամբողջ համակարգը աշխատացնում է»,-ասաց ԼՂՀ ՊԲ նախկին հրամանատարը

Սամվել Բաբայանին հարց ուղղեց նաեւ դատավոր Արշակ Վարդանյանը, մասնավորապես, թե Սամվել Բաբայանը որտեղից գիտեր, որ «Իգլան» կոմպելքս է եւ բաղկացած է երեք մասից: Այս հարցը ծիծաղ առաջացրեց դահլիճում ներկա գտնվողների մոտ: Վարդանյանը հարցը կրկնեց, ինչին ի պատասխան Բաբայանը հիշեցրեց, որ 9 տարի ԼՂՀ ՊԲ հրամանատար է եղել, բացի դա ունի «Իգլա» գործածելու փորձ: