Ձեռնարկատերերն այլեւս չունեն այն եկամտի աղբյուրը, որի հաշվին կարող են վճարել հավելյալ հարկեր. Բարսեղյան

Հունվարի 3-ին Ռեստորանների հայկական միությունը հայտարարություն էր տարածել, որ մեկ օրով այցելուների առջեւ փակելու են բոլոր ռեստորանների դռները՝ բողոքելով շրջանառության հարկը 2 տոկոսով բարձրացնելու դեմ։

«Ձեռնարկատերերը այլեւս չունեն այն եկամտի աղբյուրը, որի հաշվին կարող են վճարել հավելյալ հարկեր, այստեղ ագահության խնդիր չկա, զիջելու խնդիր չկա»,- այս մասին ՀԺ-ի հետ զրույցում ասաց «Հայկական ռեստորանների միություն» խմբի համակարգող Աշոտ Բարսեղյանը:

- Պարոն Բարսեղյան, ինչի՞ց են կոնկրետ դժգոհում ռեստորանների միության մեջ ներառված ռեստորանատերերը:

- Մեր խնդիրը նրանում է, որ այս քայլերը, որոնք տեղի են ունենում, ոլորտին վնաս են տալու: Ոլորտ, որը տարածաշրջանում ամենակայացածն է, այսօր այդ ոլորտի վրա, իմ կարծիքով, մի քիչ դաժան փորձեր են կատարվում: Մեր կարծիքով՝ հետեւանքները տնտեսության մակարդակով կարող է այդքան էլ ցանկալի չլինեն:

Մեր պարտքն ենք համարում հուշել կառավարությանը, որ եթե մի քիչ էլ ավելի սկսեն ոլորտին ճնշել, դա արդեն կբերի նեգատիվ հետեւանքների: Հիմա մենք խոսում ենք կառավարության հետ՝ հասկանալու համար, թե շրջանառության հարկի ավելացումը տնտեսության վրա ի՞նչ էֆեկտ է ունենալու՝ հաշվի առնելով, որ այլեւս մենք չենք կարողանալու պահել գների այս մակարդակը եւ ստիպված ենք լինելու բարձրացնել ռեստորանների եւ հանրային սննդի բոլոր օբյեկտների գները: Համապատասխանաբար այդ բարձրացումներն էլ ունենալու են իրենց հետեւանքները:

Այդ հետեւանքներն են՝ ներքին սպառման նվազումը եւ երկրի տուրիստական գրավչության նվազումը: Այսինքն, նույն Վրաստանի հետ համեմատած՝ մենք ունենալու ենք ավելի բարձր գներ, ավելի բարդ ձեւավորված ինֆրաստրուկտուրա եւ համապատասխանաբար արդեն տուրիստական գրավչության նվազում: Դա չի կարող բացասական չանդրադառնալ գյուղատնտեսության զարգացման վրա:

- Քանի՞ ռեստորան է ներառված միության մեջ:

- Միության մեջ կա առնվազն 150 ռեստորան եւ ամեն օր հայտերն ավելանում են:

- Կառավարությունից կապ հաստատե՞լ են ձեզ հետ, որպեսզի խնդրի լուծման համար տարբերակներ գտնեք:

- Արդեն մեկուկես տարի է՝ մենք բանակցությունների մեջ ենք: Վերջին կոնտակտը, որը եղել է տնտեսական զարգացման նախարարության հետ, մենք այդտեղ մեր առաջարկություններն ենք բարձրացրել, պաշտոնական պատասխան չունենք, սակայն ոչ պաշտոնական գիտենք, որ մեր առաջարկները չեն լսվել ու ակնկալում ենք, որ գոնե կունենանք պաշտոնական պատասխան:

- Արդյո՞ք ռեստորանատերերը գերշահույթ չունեն:

- Գերշահույթ տերմինը մտցրել է ֆինանսների նախարարությունը, որը մենք իրենց հետ քննարկելու ընթացքում ճշտեցինք, որ այդ ոլորտում ոչ մի գերշահույթ այլեւս չի գոյանում: Ի՞նչն ենք համարում գերշահույթ: Այս բնագավառում 25 տոկոս շահութաբերությունը նորմա է, որովհետեւ սա անկայուն բիզնես է, ռեստորանային բիզնեսի կյանքը կարճ է, սա արտադրություն չէ: Մենք այդ նորմային նույնիսկ մոտիկ չենք, ռեստորաններ կան, որ 7 տոկոս շահութաբերությամբ են աշխատում, որն անընդունելի է: 10 տարի առաջ եղել է նման մեծ շահութաբերություն, բայց 10 տարվա մեջ տարբեր փոփոխություններ են եղել, կոմունալ վճարումներ, աշխատավարձեր եւ գնաճ: Այսինքն, գին է աճել, բայց ռեստորանները իրենց եկամտի հաշվին գինը չեն բարձրացրել:

- Արդեն որոշե՞լ եք, թե որ օրը պետք է ռեստորանները չաշխատեն:

- Օրը կախված է կառավարության կազմի ձեւավորումից: Այն օրը, երբ կազմը ձեւավորվի եւ այդ հարցը հասցեատեր կունենա, մենք դրանից 2 օր անց կհայտարարենք դրա մասին:

- Սա ո՞ւմ է ավելի շատ վնասելու՝ պետական եկամուտների կոմիտեի՞ն, թե ռեստորանատերերի՞ն՝ հաշվի առնելով, որ դա ռեստորանատերերի շահույթի աղբյուրն է:

- Դա մեզ է վնասում: Բայց մենք այլ ճար չունենք: Չի կարելի միանգամից մի քանի անգամ բարձրացնել հարկերը, տուգանքներն ու տույժերը:

- Տեսնում ենք, որ այս ամենին զուգահեռ նաեւ հնարավորություն է տրվում սկսնակ բիզնեսմեններին, մինչեւ 24 մլն դրամ տարեկան շրջանառություն ունեցողներն ազատվում են հարկերից: Դրան զուգահեռ նկատում ենք նաեւ, որ թոշակների բարձրացում է լինում: Արդյո՞ք համեմատաբար խոշոր բիզնեսները այս դեպքում չեն ուզում մի քիչ զիջումների գնալ:

- Խոշոր բիզնես ասածը չի վերաբերում այս ոլորտին, այստեղ խոշորներ չկան: Այստեղ մեծ մասամբ միջին բիզնես է: Չի կարելի ասել, թե չենք ուզում տալ այդ հարկերը, մենք այլեւս տեղ չունենք հավելյալ հարկ տալու: Հիմնական խնդիրը այստեղ է: Մենք այլեւս մեր շահույթի մեջ չենք տեղավորվում: Շահույթը բիզնեսի այն արդյունքն է, որը թույլ է տալիս ներդրողին՝ մնալ տվյալ բիզնեսի շրջանակներում: Զիջումների մասին խոսք այլեւս չկա: Ոլորտը պետք է զարգանա, աշխատատեղեր բացի: Պատկերացրեք՝ եթե շրջանառությունից է հարկվում, մեր ֆիքսված ծախսերը չեն նվազում, չեն փոփոխվում: Ձեռնարկատերերը այլեւս չունեն այն եկամտի աղբյուրը, որի հաշվին կարող են վճարել հավելյալ հարկեր, այստեղ ագահության խնդիր չկա, զիջելու խնդիր չկա: