Ձեր ցավերը իմ սրտում են, ձեր կարիքները իմ մտքում են, ձեր երազանքները իմ հոգում են. Փաշինյանն՝ աղետի գոտում

ՀՀ վարչապետի պաշտոնակատար Նիկոլ Փաշինյանը Գյումրիում կայացած կառավարության արտագնա նիստից հետո կառավարության անդամների եւ այլ պաշտոնատար անձանց ուղեկցությամբ շարժվեց դեպի երկրաշարժի անմեղ զոհերի հիշատակը հավերժացնող հուշակոթող`Գյումրու Ամենափրկիչ եկեղեցու տարածք։

Ժամը 11:41-ին`1988-ի դեկտեմբերի 7-ի ավերիչ երկրաշարժի նույն ժամին հնչեցին եկեղեցու զանգերը: Շիրակի թեմի առաջնորդ Գերաշնորհ Տ. Միքայել եպիսկոպոս Աջապահյանի կողմից մատուցվեց հոգեհանգստի կարգ, որից հետո ՀՀ վարչապետի պաշտոնակատար Նիկոլ Փաշինյանը հանդես եկավ ելույթով:

«Երկրաշարժի զոհերի մասշտաբն ուղղակի հարված էր մեր ժողովրդի ներուժին, աղետն ուղղակի հարված էր մեր երկրի տնտեսությանը. եւ՛ հոգեբանական, եւ՛ բարոյական հսկայական հարված էր մեր ժողովրդի համար: Բայց, այնուամենայնիվ, այս աղետը նաեւ ազգային միասնության մի յուրօրինակ անկյունաքար դարձավ եւ աշխարհի հարյուր հազարավոր հայեր, միլիոնավոր հայեր իրենց ուշադրությունը սեւեռեցին պատմական հայրենիքի վրա»,- ասաց Նիկոլ Փաշինյանը եւ դրա ամենավառ օրինակը համարեց աշխարհահռչակ շանսոնյե Շառլ Ազնավուրի հայտնի նախաձեռնությունը, ով անմիջապես արձագանքեց եւ երկրաշարժից հետո այցելեց աղետի գոտի:

Վարչապետը նշեց, որ այս երկրաշարժը նաեւ մի յուրօրինակ հումանիտար համաշխարհային համախմբման պատճառ դարձավ եւ խորհրդային միության, աշխարհի բարեկամ ժողովուրդներ իրենց օգնության ձեռքը մեկնեցին հայ ժողովրդին` համամարդկային համախմբման մի բացառիկ օրինակ ցույց տալու:

Նա նկատեց, որ, այնուամենայնիվ, երկրաշարժից 30 տարի անց աղետի գոտի հասկացությունը վերացված չէ եւ բացի այն, որ աղետի գոտի ասելով՝ հասկանում են բնակարանային կարիքները, դպրոցների շինարարությունը, պետք է արձանագրենք, որ երկրաշարժի արդյունքում ավերվեց Հայաստանի արդյունաբերության համար առանցքային նշանակություն ունեցող մի հսկայական տնտեսական սեգմենտ:

Նիկոլ Փաշինյանն ասաց, որ երբ ասում են աղետի գոտու վերականգնում, պետք է հասկանանք նաեւ վերականգնումը այն ողջ տնտեսական պոտենցիալի, որը եղել է աղետու գոտու ամբողջ տարածքում: «Բայց աղետի պատճառած ամենամեծ վնասը մարդկանց հոգիներում տեղի ունեցած ավերածություններն են, երկրաշարժից շատ չանցած սկսեցին աղետու գոտու վերականգնման աշխատանքները, բայց միշտ չէ, որ շենքերին զուգընթաց վերականգնում էին մարդկանց հույսը, վստահությունը եւ լավատեսությունը եւ երբ ասում ենք՝ աղետի գոտի, առաջին հերթին հենց սա պետք է նկատի ունենանք, թե ինչքանով է վերականգնված մարդկանց վստահությունը սեփական ուժերի նկատմամբ, լավատեսությունը` վաղվա օրվա նկատմամբ, հույսը, որ զոհվածների կիսատ թողած գործերը եւ երազանքները կդառնան իրականություն»,- ասաց նա եւ նշեց, որ հենց աղետի գոտու վերականգնման այսպիսի հայեցակարգ է անհրաժեշտ:

Նիկոլ Փաշինյանը համոզմունք հայտնեց, որ Հայաստանում տեղի ունեցող գործընթացներն առաջին հերթին պետք է ծառայեն հենց այս նպատակին: Ըստ նրա`թեւակոխել ենք մի փուլ, որտեղ ամեն օր, ամեն ժամ, ամեն շաբաթ պետք է լրջորեն վերականգնենք մարդկանց հավատը եւ վստահությունը իրենց, երեխաների ապագայի նկատմամբ: Նա նշեց, որ սա է կառավարության ամենակարեւոր առաքելությունը:

«Երկրաշարժից հետո մի մեծ աղետի գոտու Հայաստանը վերածվեց եւ մեր մեծագույն խնդիրն է այդ քաղաքացիական աղետը հաղթահարելը, եւ ես համոզված եմ, որ մենք ազգովի այսօր վստահ ենք քայլում այդ ճանապարհով: Հիմա այստեղ այս սրբազան օրը, այս վայրից դիմելով ՀՀ բոլոր քաղաքացիներին եւ առավելեւս 1988 թվականի դեկտեմբերի 7-ի աղետալի երկրաշարժից տուժած հայրենակիցներին, ուզում եմ ասել՝ սիրելի հայրենակիցներ, ձեր ցավերը իմ սրտում եմ, ձեր կարիքները իմ մտքում են, ձեր երազանքները իմ հոգում են եւ վստահություն են ներշնչում ասելու, որ ամեն ինչ իսկապես շատ լավ է լինելու:

Եվ ուրեմն՝ կեցցե Գյումրիի, Վանաձորի, Սպիտակի հերոսական ժողովուրդը եւ ընդհանրապես հայ ժողովուրդը, որ մահվան դեմ հազարամյա պայքարով հաղթող է դուրս եկել կյանքի, ապրելու, արարելու իր առաքելության մեջ»,- ասաց նա եւ մեկ րոպե լռությամբ կրկին հարգեցին երկրաշարժի զոհերի հիշատակը: