Ամիրյան, Մակունց, Ղարիբյան, Միրզախանյան՝ մի կաստա են, որը դուրս կգա. Գալստյանը հացադուլ է անում

Պարալլելս Ֆիլմպրոդաքշն կինոընկերության հիմնադիր, ռեժիսոր Հովհաննես Գալստյանը դեկտեմբերի 3-ից հացադուլ է սկսել: Ռեժիսորը վրան է տեղադրել Մատենադարանի շենքի դիմաց, որի պատճառը ազգային կինոկենտրոնի կողմից «Տատիկիս վարսերը» հայ-բուլղարա-գերմանական կինոնախագծի արգելափակումն է:2018 թվականին ավարտվում է Պարալլելս Ֆիլմպրոդաքշն կինոընկերության «Տատիկիս Վարսերը» միջազգային կինոնախագծի հանդեպ Հայաստանի ազգային կինոկենտրոնի ստանձնած պարտավորության կատարման ժամկետը, սակայն նոր կանոնակարգ է կիրառվել, ըստ որի՝ նախկինում հաստատված եւ արդեն պետական գումարներ ստացած ֆիլմի ֆինասավորումը կասեցվել է:Հացադուլի մեջ գտնվող ռեժիսոր Գալստյանը ՀԺ-ի հետ զրույցում հայտնեց, որ պետությունն իրենց ընկերությանը պետք է տրամադրեր 88 միլիոն դրամ, որից միայն 18 միլիոնն է տրմադրվել:

Հատկացրել են 23 միլիոն դրամ, ապա 5 միլիոնը հետ վերցրել: 2017 թվականի ապրիլին մշակույթի նախարար Արմեն Ամիրյանի հրահանգով ֆիլմի համար նախատեսված գումարի 5 միլիոնը ժամանակավորապես փոխանցվել է Հայաստանի ֆիլմ հանձնակատարին՝ նախարարության հրատապ այլ ծախսերի համար, հուլիսին վերադարձնելու պայմանով։ Գումարը չի վերադարձվել, ինչի արդյունքում ֆիլմի արտադրության պլանը խափանվել է, արտադրող ընկերությունը կուտակել է պարտքեր։

Մշակույթի փոխնախարար Նազենի Ղարիբյանի խոսքով՝ Հովհաննես Գալստյանի կինոնախագիծը դեռեւս 2017 թվականին պետք է ավարտված լիներ, սակայն չի ավարտվել: Ըստ փոխնախարարի՝ Գալստյանը ոչ մի ներդրում չի կատարել եւ սպասում է, որպեսզի պետությունն իրեն ֆինանասավորի, սակայն վերջինիս խոսքով՝ լիամետրաժ ֆիլմերի դեպքում նման երեւույթը բացառված է. «Պետությունն ի վիճակի չէ ամբողջ ֆինանասական բեռն իր վրա կրել»:

Հովհաննես Գալստյանին խիստ բարկացրեց փոխնախարարի այս հայտարարությունը: Վերջինս ցույց տվեց բոլոր այն փաստաթղթերը, որոնց համաձայն՝ տարբեր կազմակերպություններ ֆինանասավորել են կինոնախագիծը՝ գերմանական ընկերության կողմից  80 հազար եվրո, Բուլղարիայի կողմից՝ 140 հազար եվրո եւ Շարմ ընկերությունը՝ 25 միլիոն դրամ:

«Ինչի՞ Նազենի Ղարիբյանը սրանք չունի, որովհետեւ նա չի հարցնում ինձ, այլ հարցնում է կինոկենտրոնին»,-պարզաբանում է Գալստյանը: Վերջինիս խոսքով՝ ֆիլմի վերջնաժամկետն է եղել 2018 թվականի դեկտեմբերի 3-ը, ժամկետը երկարաձգել են, իսկ ֆինանսավորումը՝ ո՛չ:

«Եթե դու քո երկրում ֆինանսավորում չունես, եվրոպան երբեք քո հետ գործարքի մեջ չի մտնի ու քեզ չի ֆինանսավորի: Ինձ ֆինանսավորող երկրները գործարքից դուրս են գալիս, սակայն դա Հայաստանի համար շատ վատ նախաբան է ստանում»,-ասաց նա:

Գալստյանը, պարզաբանելով հացադուլ սկսելու ժամկետը, նշեց, որ եթե մինչեւ 2018 թվականի ավարտը կինոկենտրոնը չտա երաշխիքներ, որ շարունակելու է ֆինանսավորումը, ապա Բուլղարիան եւ Գերմանիան դատի կտան Հայաստանին:

«Նրանք ասում են, մեր գործընկերն արել է իր պարտականությունները, իսկ կինոկենտրոնն իրեն չի տալիս ֆինանասավորում: Շուշանիկ Միրզախանյանի եւ Նազենի Ղարիբյանի հույսը այն էր, որ իմ գործընկերներն ինձ հետ պրոբլեմ կունենային, դուրս կգային պրոյեկտից: Նրանց դավադրությունը չիրականացավ, իմ կինոընկերությունը չի փակվելու, իսկ Շուշանիկ Միրզախանյանին հանելու եմ տնօրենի պաշտոնից», -ասաց Գալստյանը:

Անդրադառնալով Նազենի Ղարիբյանի այն հայտարարությանը, թե կինոկենտրոնն առաջնորդվել է կանոնակարգի օրենքների համաձայն, Գալստյանը նշեց, որ օրենքի հետադարձ ուժով է չեղարկվել նախագիծը: «Դատավորը ծիծաղելու է իրենց վրա, որովհետեւ 2018 թվականի նոր կանոնակարգը կարող է վերաբերվել միայն 2018 թվականից սկսած նախագծերին, ոչ թե տարիներ առաջ եղած նախագծին»,-վստահություն հայտնեց Գալստյանը:

Վերջինիս խոսքով՝  Հայաստանում կինոյի զարգացման միակ եւ հիմնական խոչընդոտը կինոյի պետական կառավարման մոդելն է: «Արմեն Ամիրյանը, Լիլիթ Մակունցը, Նազենի Ղարիբյանն ու Շուշանիկ Միրզախանյանը մի կաստա են, որոնց թիվ մեկ խնդիրը մեզ լռեցնելն է, բայց այդ կաստան դուրս կգա»,-ասաց ռեժիսորը:Հ.Գ. Հայաստանի ազգային կինոկենտրոնից խոստացել են «Հայկական ժամանակ»-ին տրամադրվել Հովհաննես Գալստյանի կինոնախագծին տրված գումարի չափն ու վերջինիս ֆինանասավորումը սառեցնելու պատճառների մանրամասները: