Հարկի իջեցման պարագայում երկու տոկոսը կարելի է ուղղորդել առողջության ապահովության ստեղծմանը. Բաբլոյան

ԱԺ սոցիալական եւ ֆինանսական եւ բյուջետային հարցերի մշտական հանձնաժողովների համատեղ նիստում «2019թ-ի պետական բյուջեի» քննարկմանը ԱԺ նախագահ Արա Բաբլոյանն առաջարկեց վարչապետի հայտարարած եկամտահարկի դրույքաչափերի 5%-ով իջեցումից մի մասը ուղղել առողջապահական ապահովագրության ստեղծմանը: «Չեք կարծում, որ հարկի իջեցման պարագայում երկու տոկոսը կարելի է ուղղորդել առողջության ապահովության ստեղծմանը: Այսինքն, ում որ ուզում ենք աշխատավարձ բարձրացնենք հինգ տոկոսով, դրանից երկու տոկոսն ուղղորդենք բազային առումով նրանց առողջության պահպանմանը»,-ասաց նա:

Ֆինանսների նախարարի պաշտոնակատար Ատոմ Ջանջուղազյանը նշեց, որ նախեւառաջ պետք է որոշակիացնեն նպատակները, հետո գտնեն լավագունս դրանց հասնելու ճանապարհը: «Եթե աշխատավարձը միջոցներից մեկն է, այդ ճանապարհով գնանք, մենք դրանով ռիսկ ենք առաջացնում, որ մարդիկ կարող է կրճատվեն, մենք ենթադրում ենք, որ եթե արդյունավետության մասին է խոսքը, պետք է առաջնորդվենք նպատակին լավագունս հասնելու մոտեցմամբ, ոչ թե սոցիալական խնդիր լուծելով»,-ասաց նա:

Ըստ Ջանջուղազյանի, քննարկման հարց է՝ եկամտահարկի դրույքաչափի իջեցումը կապել նրա հետ, որ աշխատող խմբին պետք է առողջապահական ծառայություններ մատուցվեն: «Որոշելու հարց է, թե այլ հավասար պայմանների դեպքում մենք այդ միջոցները արդյոք կուղղեի՞նք հենց այդ խմբի համար անվճար առողջապահական ծառայություններ մատուցելուն: Մեզ թվում է՝ չունենք այնպիսի վիճակ, որպեսզի համարենք, որ մնացած սոցիալական խմբերի համար արդեն բավարար չափով լուծված են հարցերը եւ մեզ համար որպես թիրախ պետք է վերցնենք վարձու աշխատողներին»,-ասաց նա:

Ֆինանսների նախարարի պաշտոնակատարը նշեց, որ իրենց համար խնդիր է՝ հավաքել առավելագույն հարկերը եւ որոշել՝ եթե հենց այդ խումբն է, որ պետք է թիրախ լինի այս ծառայությունների տեսակետից, ապա ծրագիր բերել նրանց համար: «Այլ ոչ թե բերել այն ճանապարհով, որ իրենք իրենց եկամտահարկը ավելի պակաս վճարեն, կամ վճարած հարկից մի մաս գնա առողջապահության համակարգի ծառայություններին: Որոշելու հարցը նաեւ պահի ճիշտ ընտրությունն է, թե երբ պետք է անել, այս պահին, կարծում ենք առավելագույնս հարկերը հավաքվեն պետբյուջե եւ որոշումները կայացվեն առաջնահերթություններից ելնելով, թե ում համար ինչպիսի առողջապահական ծրագրեր իրակացվեն»,-ասաց նա:

ԱԺ նախագահ Արա Բաբլոյանը նշեց, որ թեեւ չի ցանկանում զուգահեռներ մտցնել հեղափոխության, փոփոխությունների մասին իրենց հայտարարությունների մեջ, բայց շեշտեց, թե որոշ հարցեր ի վերջո պետք է կարգավորվեն: «Մի քանի տասնյակ տարի աշխատում եմ համատեղ, որ այս հարցերի կարգավորումը տանք, անցել է գրեթե 28 տարի եւ մենք չենք կարողացել կարգավորենք, կանցնի եւս 28 տարի, եթե այսօր սա չկարգավորենք, սա եզակի հնարավորություն է, որպեսզի աշխատողը, որը ստեղծում է այն բարիքները, որից օգտվում են մնացած բոլոր չաշխատողները, գոնե ինքը կարողանա ինչ-որ չափով իր համար երաշխիք ունենա առողջության պահպանման համար: Այսօր աշխատողը, որը հարկ է վճարում, իրակացնում ենք այն առողջապահական ծրագրերը, որոնք տալիս ենք անվճար չաշխատողներին, մենք այսօր ունենք բացառիկ հնարավորություն՝ անել առողջապահական ապահովագրություն՝ օգտագործելով այն ռեսուրսը, որն առաջանում է հարկերի իջեցումից, այսինքն՝ անձը իր վրա է ծախսելու այն գումարը, որն իրենն է»,-ասաց նա եւ նշեց, որ հարկերի նվազման այս շրջանոմ եթե չգնան այս քայլին, ստիպված կլինեն եւս 28 տարի սպասել:

Ատոմ Ջանջուղազյանը համաձայն է, որ այդ վարքագծով կխրախուսեն աշխատանքը, որ իրենց ուշադրության կենտրոնում ոչ միայն սոցիալական աջակցության կարիք ունեցողներն են: «Բայց ինչ վերաբերում է, որ աշխատողի նկատմամբ ավելի շատ մտահոգված լինենք, քանի որ տնտեսությունը հենվում է նրանց վրա, որ առողջությունը պահպանեն, մենք ուղղակի ասում ենք՝ գնանք այն ճանապարհով, որ ոչ թե դրույքաչափի իջեցման մեջ հնարավորությունը տեսնենք, այլ հնարավորությունների շրջանում նաեւ իրենց նույնպես ներառենք»,-ասաց նա: