Ինչպես տեսնում եք, Կարեն Կարապետյանի տեղը զբաղեցնում է իմ ուսապարկը. Փաշինյան. թարմացված

ԱԺ պատգամավոր, #ԻմՔայլը նախաձեռնության հեղինակ Նիկոլ Փաշինյանը ՀՀ վարչապետի պաշտոնակատար Կարեն Կարապետյանին առաջարկել էր լրագրողների ներկայությամբ բանակցել: Նա նման հայտարարություն էր արել երեկ՝ ապրիլի 26-ին: Այսօր, սակայն Կարապետյանը չի եկել: Այս պահին ընթացող մամուլի ասուլիսի ժամանակ Փաշինյանը նշեց, որ ըստ իրեն՝ պատճառն այն է, որ ՀՀԿ կուսակցության ներսում խառը իրավիճակ է:

- Այսօր հանդիպումը չկայացավ: Ի՞նչ կարող եք ասել այդ առթիվ:

- Դա նշանակում է, որ ՀՀԿ-ում խառը իրավիճակ է, քանի որ երեկ կամ առաջին օրը  նրանք հայտարարել էին, որ պատրաստ են առանց նախապայմանների բանակցությունների, բայց ինչպես տեսնում եք, պարոն Կարապետյանի տեղը զբաղեցնում է իմ ուսապարկը:

- Ձեր կարծիքը մայիսի 1-ին կայանալիք վարչապետի ընտրությունների մասին:

- Մեր դիրքորոշումը պարզ է: Մենք այդ մասին արդեն խոսել ենք: Մենք կարծում ենք, որ այդ գործընթացում ժողովրդի տարած հաղթանակը պետք է հաստատվի նաեւ դե յուրե: Այսինքն՝ հարցը հետեւյալն է. արդյո՞ք Հայրապետական կուսակցությունը ցանկանում է լուծել այս ճգնաժամը: Եթե վարչապետ ընտրվի հանրապետական թեկնածուն, ապա այս ճգնաժամը չի լուծվի: Մենք կշարունակենք մեր գործողությունները, մեր խաղաղ ցույցերը եւ կփորձենք հանրապետականներին, օրինակ՝ Կարեն կարապետյանին բացատրել, ինչպես Սերժ Սարգսյանին բացատրեցինք, որ նա չի հասկանում ստեղծված քաղաքական իրավիճակը:

- Մայիսի 1-ին ի՞նչ ելք է կանխատեսում:

- Ես մայիսի 1-ին կանխատեսում եմ Հայաստանի Հանրապետության հարյուր հազարավոր քաղաքացիներ Երեւանի փողոցներում: Մենք այս պահին կոչ ենք անում Հայաստանի բոլոր քաղաքացիներին մայիսի 1-ին՝ առավոտյան՝ ժամը 8-ին, լինել Երեւանում եւ հեղեղել Երեւանի փողոցներն ու հրապարակները՝ այդ թվում Ազգային ժողովի հարակից փողոցները եւ հրապարակները:

- Իսկ Ազգային ժողովի ներսում ի՞նչպիսի իրավիճակ է՝ հաշվի առնելով ՀՅԴ-ի ու Ծառուկյան դաշինքի դիրքորոշումները:

- Իսկ ի՞նչ դիրքորոշում են նրանք արտահայտել:

- Միանում են շարժմանը:

- Դա ի՞նչ է նշանակում:

- Քվեարկության առումով ՀՅԴ-ի ներկայացուցիչների հետ հանդիպե՞լ եք: Ինչ-որ հստակեցում մտցրե՞լ են:

- Հենց դա եմ ասում՝ ես հույս ունեմ, որ ՀՅԴ-ն, Ծառուկյան դաշինքն իրենց դիրքորոշումները կհստակեցնեն եւ մինչեւ մայիսի 1-ը՝ այսօր-վաղը, կհայտարարեն՝ ինչպես են իրենք պատրաստվում քվեարկել:

- Պարո՛ն Փաշինյան, ի՞նչ խնդիր է լուծում Կարեն Կարապետյանը չգալով: Ասում է, որ Դուք պայմաններ եք առաջ քաշում, նաև ուղիղ եթերին է դեմ:

- Ես կարծում եմ, որ Կարեն Կարապետյանը, պարզապես վստահ չէ իր բանակցային ուժերի վրա: Եվ եթե մի մարդ, որն այնքան էլ վստահ չէ իր բանակցային ուժերի վրա իր հայրենիքի ներսում, ինչպե՞ս է նա պատրաստվում բանակցել Ղարաբաղի հարցի շուրջ: Ի՞նչ... Մի՞թե մենք այսպիսի՞ իրավիճակ ենք ունենալու հայ-ադրբեջանական բանակցություններում:

- Ինչպե՞ս եք գնահատում Վլադիմիր Պուտինի հետ բանակցությունները:

- Կարծում եմ՝ Ռուսաստանը, ինչպես միջազգային իրավունքը հարգող պետություն, չի խառնվում Հայաստանի ներքին գործերին: Ես այդ հարցում ուղղակի վստահ եմ:

- Իսկ մյուս երկրնե՞րը, ԵՄ-ը...

- Նրանք էլ: Սա մաքուր հայաստանյան գործ է: Արդեն բազմիցս ասել եմ, որ այս շարժումը աշխարհաքաղաքական ոչ մի համատեքստ չունի: Սա 100%-անոց ճշմարտություն է:

- Ինչո՞ւ էին, ըստ Ձեզ, իշխանության ներկայացուցիչները մեկնել Մոսկվա: Ի՞նչ են այնտեղ քննարկել:

- Չգիտեմ: Գուցե գիտեն, որ Հայաստանում ոչ մի աջակցություն չունեն եւ այդ պատճառով էլ ցանկանում են տպավորություն ստեղծել, որ իրենք աջակցություն ունեն մեկ այլ տեղ, Կարեն Կարապետյանը հնարավոր է՝ փորձում է տպավորություն ստեղծել, որ դրսից աջակցություն ունի, բայց ես չեմ կարծում, որ դա մտքերի արժանապատիվ ընթացք է: Սա մաքուր հայկական գործ է, եւ պարզապես վստահ եմ, որ Ռուսաստանը, ԵՄ-ը եւ ԱՄՆ-ն՝ որպես միջազգային իրավունքը հարգող երկրներ, կազմակերպություն, չեն խառնվի Հայաստանի գործերին:

- Որտե՞ղ եք լինելու մայիսի 1-ին: Խորհրդարանում, թե՞ դրսում: Ձեզ չեն բավականացնում մանդատները: Ի՞նչ եք անելու:

- Ես կարծում եմ՝ մենք ունենք գլխավոր մանդատը: Դա հայ ժողովրդի մանդատն է եւ ընդհանրապես ոչ միայն Հայաստանի, այլեւ սփյուռքի հայերի մանդատն է: Ռուսաստանից, ԱՄՆ-ից, Եվրոպայից.... հազարավոր հայեր գալիս եւ մասնակցում են մեր ցույցերին: Նրանք ցանկանում են, որ Հայաստանում այնպիսի փոփոխություններ լինեն, որպեսզի իրենք կարողանան վերադառնալ եւ ապրել Հայաստանում: Կարծում եմ՝ սա գլխավոր մանդատն է, եւ ուզում եմ հիշեցնել, որ խորհրդարանը պետք է հաշվի առնի ժողովրդի կամքը:

- ՀՅԴ-ն ու Ծառուկյան դաշինք ասե՞լ են՝ ինչպես են քվեարկելու:

- Ո՛չ այդպիսի հստակեցում չկա, եւ ես հույս ունեմ, որ նրանք հրապարակային այդ մասին կհայտարարեն: Ես ակնկալում եմ, որ ՀՅԴ-ն եւ Ծառուկյան դաշինքը հստակ հայտարարեն, թե ինչպես են պատրաստվում քվեարկել:

- Հնարավո՞ր է՝ առանձին պատգամավորների հետ բանակցեք:

- Ես կարծում եմ, որ իմաստ ունի, բոլոր պատգամավորների հեռախոսահամարները հրապարակվել, եւ քաղաքացիները փորձեն իրենց պատգամավորների հետ կապ հաստատել եւ ներկայացնել իրենց դիրքորոշումը: Ես հույս ունեմ, որ այսօրվա, վաղվա ընթացքում ԱԺ պատգամավորների հեռախոսահամարները, ինչո՞ւ չէ, նաեւ հասցեները, որպեսզի մարդիկ հնարավորություն ունենան իրենց պատգամավորների հետ այս թեմայով խոսակցություն ունենալու:

- Ծառուկյան դաշինքից արտահոսք կա, որ գուցե Գագիկ Ծառուկյանը լինի իրենց թեկնածուն:

- Ես կարծում եմ, որ ցանկացած քայլ կարժանանա ժողովրդի ճշգրիտ գնահատականին:

- Իսկ արտախորհրդարանական ուժերի հետ ունե՞ք համագործակցություն:

- Մենք, ընդհանուր առմամբ, բաց ենք քննարկումների համար եւ ցավոք, ինչպես տեսնում եք, ես գործնականում ամբողջ օրը ձեր տեսախցիկների ներքո եմ եւ կարծում եմ՝ համաձայն եք, որ այդքան շատ շփումներ ունենալու հնարավորություն չունեմ:

- Կարծես թե, միմյանց մեղադրելու խաղ է Ձեր և վարչապետի միջև: Նկատի ունեմ՝ դուք պետք է աշխատեք միասին ձեր երկրի ապագայի համար, բայց դուք նույնիսկ չեք կարողանում հանդիպել: Կարծես փակուղի լինի: Նաեւ ի՞նչ պլաններ ունեք առաջիկա օրերի համար:

- Մենք հայտարարել ենք, որ պատրաստ ենք բանակցությունների, և հիմա ես այստեղ եմ, իսկ պարոն Կարապետյանը չկա: Ինչ վերաբերում է մեր պլաններին, դրանք նույնն են, ինչ անցած ամսվա ընթացքում՝ քայլ առ քայլ:

- Դուք պնդում եք, որ պետք է շարունակել ցույցերը եւ օր առ օր առաջ շարժվել:

- Այո՛:

- Եթե Դուք չլինեք հաջորդ վարչապետը կամ քաղաքական փոփոխություն չլինի, ի՞նչ եք անելու:

- Դա կնշանակի, որ Հայաստանում քաղաքական ճգնաժամը չի լուծվել: Մենք պետք է աշխատենք այս ճգնաժամը լուծելու ուղղությամբ նույն եղանակով՝ ցույցերի, բանակցությունների միջոցով:

- Բացի Սերժ Սարգսյանի հեռանալուց՝ ի՞նչ է ձեզ պետք, էլ ի՞նչ պետք է լինի, որ գոհացնի:

- Մեր շարժումը միայն 1 անձի դեմ չէր: Մեր շարժումը ներկա համակարգի դեմ է: Սա կոռումպացված, անարդար եւ անօրինական իշխանություն է: Մենք չենք կարող գոհ լինել, եթե Հայաստանում իրական փոփոխությունների չհասնենք: Մեր նպատակը Հայաստանում իրական փոփոխությունների հասնելն է եւ այնպես անել, որ Հայաստանի քաղաքացիներն իրենց հաղթող զգան: Եթե Կարեն Կարապետյանը կամ այլ հանրապետական դառնա վարչապետ, ՀՀ քաղաքացիներն իրենց հաղթող չեն զգա, բայց նրանք չեն կարող կորցնել հաղթողի զգացողություն, որն առաջացավ, երբ Սերժ Սարգսյանը հրաժարական տվեց:

- ՀՀԿ կուսակցությունից ձեզ միացողներ կա՞ն առանց անուններ հրապարակելու:

- Եթե չկա հրապարակված անուններ, ապա չկա միացածներ: Ինձ համար քաղաքականությունը հրապարակային գործընթաց է: Հիմա հազար մարդ կարող է հազար բան ասել, այսպես ասած, խորհրդապահական խողովակներով, բայց քանի դեռ դա գործ չի դարձել, ես որեւէ բան չեմ կարող ասել:

- Հանրահավաքին հայտարարեցիք, ո այնուամենայնիվ, տարբեր ՀՀԿ-ականներ իրենց աջակցությունն են հայտնել ձեզ: Հույս դնո՞ւմ եք այդ հանրապետականների վրա:

- Ես հույս դնում եմ ժողովրդի դիրքորոշման վրա, որովհետեւ եթե լինի ժողովրդի զանգվածային ճնշում, այդ հանրապետականները պետք է հաշվի նստեն այդ իրողության հետ, եթե չլինի դա, իհարկե չի կարելի որեւէ հույս դնել:

- Ճնշումը ինչպե՞ս եք պատկերացնում:

- Զանգերով, ցույցերով, շրջափակումներով:

- Հանրապետականների հետ բանակցելու բոլոր փորձերը ձախողվեցին: Դուք, այնուամենայնիվ, ինչ-որ շփում ունեցե՞լ եք նրանց հետ:

- Ո՛չ, որովհետեւ կարծում եմ, որ շատ կարեւոր է թափանցիկ լինել այս գործընթացներում: Այդ պատճառով էլ մենք պնդել ենք, որ բանակցությունները տեղի ունենա լրագրողների ներկայությամբ, որպեսզի թափանցիկ լինենք մեր հանրության եւ միջազգային հանրության առաջ, որպեսզի իմանան՝ ինչ ենք մենք խոսում եւ ինչի մասին ենք խոսում եւ, օրինակ, ինչու կոնկրետ տվյալ դիրքորոշումն ունենք, այլ ոչ թե այլ դիրքորոշում: Մենք ունենք բանակցություններ քաղաքական որոշ գործիչների եւ կուսակցությունների հետ, բայց մենք պնդում ենք, որ ՀՀԿ-ի հետ պետք է բանակցենք թափանցիկ կերպով, որովհետեւ ՀՀԿ-ն եւ մենք քաղաքական այս ճգնաժամի 2 կողմերն ենք:

- Նախագահ Արմեն Սարգսյանը փաստաթղթեր է ներկայացրել, որոնք ապացուցում են, որ նա 2011 թվականից հրաժարվել է Մեծ Բրիտանիայի քաղաքացիությունից:

- Անցած անգամ, երբ մենք հանդիպեցինք Հանրապետության հրապարակում: Ես նրան ասացի, որ մեծ խոչընդոտ կա մեր հարաբերություններում, որովհետեւ Դուք խոստացել եք, որ կապացուցեք, փաստաթղթեր ցույց կտաք, որ 2011 թ. հրաժարվել եք Մեծ Բրիտանիայի քաղաքացիությունից, եւ երեկ նա փաստաթղթեր ցույց տվեց, որոնք ապացուցեցին, որ նա իրոք նա դա արել է 2011 ., հետեւաբար՝ կարծում եմ, որ հիմա մեր հարաբերություններում խնդիրներ չկան:

- Տեղեկություններ կան, որ Սերժ Սարգսյանն առաջարկել է մտածել վարչապետի թեկնածու Ռոբերտ Քոչարյանին առաջադրելու ուղղությամբ: Ի՞նչ եք կարծում, մարտի 1-ից ու այս վերջին զարգացումներից հետո ՀՀԿ-ն համարձակություն կունենա՞ նման բան մտածել: Եվ Կարեն Կարապետյանի թեկնածության հետ կապված. մասնավոր զրույցներում հանրապետականները նշում են, որ իրենց թեկնածուն Կարեն Կարապետյանն է, բայց նա վերջին 4 տարին Հայաստանում մշտական բնակություն չի ունեցել: Սա հակասահմանադրական չէ՞:

- Ռոբերտ Քոչարյանի հետ կապված համարում եմ անլուրջ խոսակցություն, Կարեն Կարապետյանի բնակության ցենզի հետ կապված որեւէ բան չեմ կարող մեկնաբանել, որովհետեւ տվյալների չեմ տիրապետում, բայց գիտեմ, որ հանրայնորեն դրա հետ կապված կան որոշակի կասկածներ, որովհետեւ հրապարակային տեղեկատվությունը նման կասկածների առիթ տալիս է: Համենայնդեպս, կարծում եմ, համապատասխան կազմակերպությունները, գուցե հասարակական կազմակերպությունները ճիշտ կանեն դրանով զբաղվեն, որպեսզի այս հարցում հստակություն մտցվի, բայց դա ընդհանուր քաղաքական գնահատականի մեջ որեւէ բան չի փոխում:

- Հանրապետականները հայտարարում են, որ վստահ են իրենց թիմակիցների վրա: Եթե նրանք առաջադրեն իրենց թեկնածուին եւ Ազգային ժողովում ընտրությունների ժամանակ անցնի իրենց թեկնածուն, այդ դեպքում ի՞նչ եք անելու:

- Հասկանանք՝ մենք ինչ խնդիր ենք լուծում: Շատերը հիմա փորձում են հարցը ներկայացնել՝ ով է լինելու վարչապետ: Հարցը դրա մասին չէ: Հարցն այն է՝ մենք քաղաքական այս ճգնաժամը լուծում ենք, թե խորացնում ենք: Շատ պարզ ընտրություն է, եթե Հանրապետականը չի ուզում լուծել ճգնաժամը, ուրեմն ճգնաժամը կխորանա: Կասկած չունեմ: Եթե որեւէ մեկը մտածում է, որ մենք որեւէ պարագայում հետ քայլ ենք անելու, նա պարզապես սխալվում է: Չի լինելու այդպիսի բան, եւ ճգնաժամը խորանալու է: Եվ ավելին ասեմ, մենք թույլ չենք տա, որ ժողովրդի հաղթանակը նրա ձեռքից որեւէ մեկը խլի:

- Ձեզ համար խորհրդարանում կայացրած որոշումը լեգիտիմ կլինի:

- Եթե այդ քվեարկությունն արտահայտի մեր ժողովրդի կամքը, դա լեգիտիմ կլինի, եթե ո՛չ, ոչ:

- Ի՞նչ նկատի ունեք ասելով ժողովրդի կամք:

- Նկատի ունի, որ պետք է լինի լուծում, որն իսկապես կվերացնի մեր ներկա քաղաքական ճգնաժամը: Եվ վստահ եմ, որ, եթե ՀՀԿ-ն կամ խորհրդարանը քվեարկի Կարեն կարապետյանի օգտին, ներկա քաղաքական ճգնաժամը կխորանա:

- Ընտրություններն են միակ ելքը...

- Ընտրությունները, բայց մեծ խնդիր կա, որովհետեւ մենք շատ ենք տեսել, որ ՀՀԿ-ն ի վիճակի չէ իսկապես ազատ եւ իսկապես ժողովրդավար ընտրություններ կազմակերպել: Մենք համաձայն ենք ընտրություններ անցկացնելուն, բայց պետք է երաշխիքներ ունենանք, որ այդ ընտրությունները կլինեն իսկապես ազատ, թափանցի եւ ժողովրդավար, որովհետեւ այլապես այդ ընտրություններն իմաստ չեն ունենա, որ կխորացնեն քաղաքական ճգնաժամը: Մենք քաղաքական ճգնաժամը լուծելու կարիք ունենք, ոչ թե այն խորացնելու: Մեր բոլոր առաջարկներն ուղված են քաղաքական ճգնաժամը լուծելուն, իսկ ՀՀԿ-ի բոլոր առաջարկներն ուղված են այդ ճգնաժամը խորացնելուն: Դա է մեր եւ նրանց դիրքորոշումների տարբերությունը:  

- Նրանք Ձեզ մեղադրում են Սահմանադրությունը չհարգելու մեջ:

- Եթե մեր գործողություններն ապօրինի են, ինչո՞ւ Սերժ Սարգսյանն ընդունեց մեր պահանջը, ինչո՞ւ Հանրապետական կուսակցության առաջնորդն ընդունեց մեր պահանջը:

- Դուք Վլադիմիր Պուտինի հետ հեռախոսազրույցից հետո հանրապետականների մոտ դիրքորոշման փոփոխություն զգո՞ւմ եք: Սա գնահատո՞ւմ եք որպես Հայաստանի ներքին գործերին միջամտելու փորձ:

- Մենք էլ ենք ասում, որ 2017 թ. ընտրություններով ձեւավորած Ազգային ժողովը պետք է ժողովրդի թեկնածուին ընտրի վարչապետ: Մենք չենք ասում, որ 2012 թ. խորհրդարանը պետք է ժողովրդի թեկնածուին ընտրի վարչապետ:

- Սա Հայաստանի ներքին գործերին միջամտելու փորձ չե՞ք համարում:

- Ես կարծում եմ, որ Ռուսաստանը հարգում է միջազգային իրավունքը եւ չի միջամտում Հայաստանի ներքին գործերին:

- Եթե շարունակաբար տապալվեն վարչապետի քվեարկությունները եւ արտահերթ ընտրությունների մասին խոսք գնա, Ձեր դիրքորոշումը չի՞ փոխվել, չե՞ք մասնակցելու ընտրություններին:

- Մեծ հավանականությամբ՝ մենք կբոյկոտենք:

- Ի՞նչի տեսքով դա կլինի:

- Բոյկոտի:

- Էլի քաղաքացիների կողմից փողոցները փակվելը եւ այլն կշարունակվե՞ն:

- Չի բացառվում, որ շարունակվեն: Այդ ժամանակ շրջափակելու ավելի կոնկրետ հասցեներ կլինեն 2 հազար ընտրական տեղամասերում:

- Հանրահավաքին հայտարարեցիք, որ կա՛մ վարչապետ ես կլինեմ, կա՛մ ոչ ոք չի լինի: Ինչպե՞ս կմեկնաբանեք:

- Ես նկատի ունեի այն, ինչ այսօր ասացի: Նկատի ունեի կա՛մ քաղաքական ճգնաժամը կլուծվի, կա՛մ կխորանա: Էլի եմ ասում, թեման այն չէ, թե ով կլինի վարչապետ: Ժողովրդի լեզվով ասած, պաշտոնակռվի մասին չէ խոսքը, խոսքը ճգնաժամը լուծելու մասին է: Ուզում եմ ասել՝ ինչու ենք նման դիրքորոշում արտահայտում, որովհետև համոզված ենք, որ այսօր ՀՀ քաղաքացին զարթոնք է ապրում, և ընդհանրապես սա ազգային զարթոնքի շարժում է, եւ մենք դավաճանած կլինենք այդ շարժմանը, եթե այդ զարթոնքը դե յուրե արձանագրելու համար բոլոր հնարավոր ջանքերը չգործադրենք: Եվ մենք չենք կարող անել այնպիսի գործողություն, որը կնսեմացնի քաղաքացու հաղթանակի զգացողությունը:  

- Գնում եք Գյումրի: Ինչո՞ւ: Ինչո՞ւ են շատերը սա գնահատում որպես նախընտրական արշավ:

- Այս ակցիան սկսվել է Գյումրուց, երբ ես առաջին քայլն արեցի Վարդանանց հրապարակից դեպի Երեւան, եւ մենք քայլեցինք 215 կմ: Այդ պատճառով սա խորհրդանշական քայլ է՝ նորից գնալ Գյումրի՝ նույն վայրը, արդեն այլ քաղաքական իրավիճակում:

- Հետո գնալո՞ւ եք այլ քաղաքներ:

- Հաջորդ օրը՝ Վանաձոր: Գյումրին Հայաստանի մեծությամբ 2-րդ քաղաքն է, Վանաձորը՝ 3-րդ: Սա խորհրդանշական քայլ է, որովհետև այս ողջ ընթացքում այս քաղաքները շատ ակտիվ են եղել, և մենք ուղղակի ուզում ենք հանդիպել այդ քաղաքի բնակիչների հետ:

- Մայրաքաղաքում ակցիաները դադարո՞ւմ են:

- 2 օրով: Ընդհանրապես, բոլոր ակցիաները դադարում են 2 օրով, որպեսզի մարդիկ մի փոքր հանգստանան, որպեսզի ապրիլի 29-ին նոր ուժով սկսենք:   

- Վերջին օրերին բավականին ակտիվ տեղեկատվական պայքար է, արդեն հայտնվել են կասկածելի կայքերի սեւ ցուցակներ եւ այլն: Ինչպե՞ս եք գնահատում իրավիճակը:

- Ես տեղյակ եմ, որ իմ մասին ինչ-որ լուրեր են տարածվում, բայց, ճիշտն ասած, չգիտեմ, թե ինչ են:

- Որ բանակում չեք ծառայել, որ դիպլոմ չունեք...

- Բայց դրանք հայտնի փաստեր են, դրանց վերաբերյալ տասնյակ անգամ պարզաբանումներ են հնչում:

- Նաեւ Ձեր կողմնակիցների կողմից կոչեր կան, որ արգելափակեն նրանց, ովքեր չեն պաշտպանում հեղափոխությունը:

- Ի՞նչ իմաստով արգելափակել:

- Ֆեյսբուքում:

- Ես կարծում եմ՝ ընդհանուր առմամբ, անհանդուրժողականության որեւէ դրսեւորում չլինի: Եթե որեւէ մեկը չի ցանկանում ինչ-որ մեկի գրառումը տեսնել, չենք կարող ստիպել, որ տեսնի, բայց ընդհանուր առմամբ՝ անհանդուրժողական որեւէ դրսեւորում չպետք է լինի: Մեր պատկերացումը Հայաստանի մասին այնպիսի է, որ յուրաքանչյուր ոք պետք է ազատորեն իր կարծիքը արտահայտելու եւ տարածելու, տեղեկատվություն փնտրելու, ստանալու եւ տարածելու հնարավորություն ունենա: Կարծում եմ, որ հատկապես մեր շարժման մասնակիցները պետք է էմոցիոնալ պոռթկումներ չունենան, որովհետեւ մեր շարժումը կշռադատված, հանդուրժողականության եւ սիրո շարժում է:

- Եթե Դուք դառնաք վարչապետ, եւ ԵԼՔ-ը դառնա իշխանություն, դուք աշխատելո՞ւ եք հանրապետականների հետ:

- Ես արդեն ասել եմ, որ իշխանությունը լինելու է ժողովուրդը:

- Նախարարներ, փոխնախարարներ, կադրեր, ուժային կառույցների ղեկավարներ փոխվելո՞ւ են, թե՞ մնալու են նույնը:

- Մենք չենք պատրաստվում կադրային ջարդ անել: Կլինեն եւ նոր նշանակումներ, կլինեն դեպքեր, երբ գործող մարդիկ կաշխատեն:

- «Սասնա ծռերին», քաղբանտարկյալներին ազատելու մասին:

- Բոլոր քաղբանտարկյալները պետք է ազատ արձակվեն միանշանակ, իսկ թե ովքեր են քաղբանտարկյալ, այդ հարցի լուծումը կարծում եմ պետք է վերապահել մասնագիտացված հասարակական կազմակերպություններին, որոնք քննարկումների արդյունքում կգան ընդհանուր եզրակացության: Իսկ ընդհանուր առմամբ, կարծում եմ պետք է անել բոլոր քայլերը հանրային համերաշխությունը վերականգնելու ուղղությամբ:

Տպել
7454 դիտում

System of a Down-ը նոր երգերի միջոցով մեկ միլիոն դոլար է հավաքել Արցախին աջակցելու համար

Ռուստամ Մուրադովն անձամբ այցելել է Ադրբեջան, հանդիպել հայ ռազմագերիների հետ, մեզ տրամադրել նրանց անունները. ԱՀ նախագահ

Արցախում ստուգվել է խմելու ջրի որակը. հերքվել են բնակչության մտահոգությունները

Հայազգի համաշխարհային աստղերը կոչ են անում գերությունից ազատել հայ ռազմագերիներին. Fox 11 Los Angeles

Վարչապետը կրկին հանդիպում է ունեցել գերեվարված և անհետ կորած անձանց ընտանիքների անդամների հետ

Ընդդիմությունը վարչապետին հեռանալու համար մինչեւ երեքշաբթի օրը ժամանակ տվեց, այլապես կդիմեն անհնազանդությունների

Հանրահավաքի մասնակիցները երթով շարժվում են դեպի կառավարական ամառանոցներ

Վազգեն Մանուկյանը ներկայացրեց առաջարկվող ժամանակավոր կառավարության առաջնահերթությունները

Արսեն Թորոսյանը հանդիպել է վիրավոր զինծառայողների

Օրենքի խախտմամբ հավաքներ անցկացնելու համար ընդհանուր առմամբ մեղադրվում է 35 անձ

Լևոն Տեր-Պետրոսյանն իր մտահոգությունն է արտահայտել ներքաղաքական թեժացող գործընթացների առնչությամբ

Գագիկ Ծառուկյանն ԱԱԾ-ում է. հրապարակում նրա անունից խոսք կարդաց Իվետա Տոնոյանը

Խնածախ համայնքի տարածքում տեղի կունենա հայտնաբերված զենք-զինամթերքի վնասազերծում

Սյունիքի մարզի քաղաքային համայնքների ղեկավարները պահանջում են Նիկոլ Փաշինյանի հրաժարականը

Նիկոլ Փաշինյանի հրաժարականի պահանջով հանրահավաք Ազատության հրապարակում. մարդկանց խմբեր տանելու ահազանգեր են հնչում

Ստեփանակերտի Վերածննդի հրապարակում կայացել է նոր ռեանոմոբիլների նվիրատվության արարողությունը

Երեւանի Սարալանջի խճուղում բախվել են 4 մեքենաներ. կա զոհ եւ տուժածներ

Ավարտվել են Կապան քաղաքի «Սյունիք» օդանավակայանի վերականգնման աշխատանքները

Վրաերթի ենթարկված 57-ամյա կինը հիվանդանոցում մահացել է

Ապարան եւ Չարենցավան քաղաքներում ձյուն է տեղում, «Չայնիի ոլորաններ»-ում մառախուղ է