ՀՀ ֆուտբոլի հավաքականի խաղում ձեռագիր չկա. ՖԱՖ-ի հիմնադիր անդամ Սերգեյ Ջանջոյան

Հայաստանի ֆուտբոլի ազգային հավաքականի գլխավոր Մարզիչ Արթուր Պետրոսյանին երկրպագուները սկսում են չվստահել: Նրանք սպասում էին ինչ-որ լուրջ փոփոխություն տեսնել, հույս ունեին, որ ինչ-որ բան կերևա թիմի վերջին 2 ընկերական հանդիպումներում, սակայն Էստոնիայի դեմ խաղում գրանցվեց ոչ-ոքի (0:0), իսկ Լիտվայի դեմ խաղում՝ պարտություն (0:1): «Հայկական ժամանակ»-ի հետ զրույցում «Առաջին հայկական ճակատ» (ՖԱՖ) հիմնադիր-անդամ Սերգեյ Ջանջոյանը նշեց, որ երկրպագուները հիասթափված են:

«Հավաքականի խաղը չի գոհացնում ու մտորելու մեծ տեղիք է տալիս: Մարզիչի նշանակումից այսքան ժամանակ անց խաղային ձեռագիր չենք տեսնում: Թիմը ցույց է տալիս անատամ ֆուտբոլ: Իմ կարծքով՝ մարզչի դերը այստեղ արդեն ակնառու է: Եթե չեմ սխալվում, 9 խաղ է հավաքականի ղեկին է, ու որեւէ օղակում հստակություն չկա, ով որ դիրքում պետք է խաղա եւ այլն: Նա ասում է՝ փորձարկումների խաղ է, բայց ֆուտբոլիստին պետք չէ փորձարկել, ֆուտբոլիստի ունակությունները կարելի է տեսնել նրա թիմում: Պետք է տակտիկա փորձարկել, բայց ես, օրինակ, վստահ չեմ, որ մեր մարզիչն ունի տակտիկաների ու սխեմաների մասին այն գիտելիքները, որով կարող է հաղթել լուրջ մարզչի: Մեզ համար ամենացավալին է, որ ֆուտբոլիստների կողմից էլ չէր երեւում, որ ուզում են, որ ձգտում են հաղթանակի: Ի՞նչ անեն դաշտում, այստեղ էլի մարզչի հարցն է»,- ասաց նա:

Երբ Արթուր Պետրոսյանը գլխավոր մարզչի պաշտոնում նոր էր փոխարինել Վարուժան Սուքիասյանին, ֆուտբոլային շրջանակներում խոսում էին, որ ֆուտբոլիստները երջանիկ են նրա գլխավորությամբ աշխատելու համար: Ոգեւորությունը կար նաեւ ֆուտբոլասերների շրջանում, եւ այն ավելի մեծացավ հատկապես աշխարհի 2018 թ. առաջնության ընտրական փուլի Մոնտենեգրոյի դեմ հանդիպումից հետո: Արթուր Պետրոսյանի գլխավորությամբ հենց առաջին խաղում ՀՀ ընտրանին տանը կամային հաղթանակ տարավ (3:2):

«Նա սիրված էր որպես ֆուտբոլիստ: Նրա նշանակման ժամանակահատվածում էլ ասել եմ, որ նրան համարում եմ լեգենդար, ամենասիրված ֆուտբոլիստներից մեկը անկախությունից հետո, բայց որպես մարզիչ, նշել եմ նաեւ այն ժամանակ, որ թերահավատորեն եմ մոտենում: Այո՛, նրա գլխավորությամբ ունեցել ենք հաղթանակներ, բայց դրանք, երեւի, չի կարելի ասել, որ եղել են նրա՝ շատ ուժեղ մարտավարական քայլերի արդյունքում: Եղել են էմոցիոնալ ֆոնի վրա խաղեր, որոնք նույնիսկ սկանդալի են վերածվել, հիշենք Բելառուսի նկատմամբ ընկերական հաղթանակը (խմբ. խոսակցություններ կային, որ խաղը պայմանավորված էր): Որպես մարզիչ չեմ հիշում, որ երկրպագուների շրջանում նա գովեստի խոսքերի արժանացած լինի»,- ասաց նա:

Սերգեյ Ջանջոյանը նկատում է, որ թիմում ակնհատ են նաև կադրային հարցերը: Ըստ նրա, խնդիրներ կան բոլոր դիրքերում: Երեկ՝ մարտի 27-ին, Վազգեն Սարգսյանի անվան «Հանրապետական» մազադաշտում կայացած Լիտվայի հետ ընկերական հանդիպումից հետո, որում մեր թիմը պարտվեց (0:1), լրագրողները Արթուր Պետրոսյանին հարցրել էին՝ արդյոք հարձակվող Յուրա Մովսիսյանը կարո՞ղ է վերադառնալ: Նա ասել էր, որ այդ հարցին կարող է պատասխանել միայն ՀՖՖ նախագահ Ռուբեն Հայրապետյանը, որը եւ ֆուտբոլիստին արգելել է կրել ընտրանու մարզաշապիկը: Ջանջոյանը կարծում է, որ եթե այս հարցը վերանայվի, Մովսիսյանին հրավիրելով գոնե հարձակման գծի խնդիրը հնարավոր կլինի լուծել:

«Բնականաբար, խնդիրներ կան դարպասապահի օղակից սկսած մինչեւ հարձակում: Ես հուսով եմ, որ Յուրա Մովսիսյանի հարցը, որի մասին երեկ խոսվեց, փակված չէ: Առջեւի գծում Յուրայի նման ֆուտբոլիստները մեզ պակասում են: Եթե նա վերագտնի իր մարզավիճակը, նրան հրավիրելը այլընտրանք չունի: Ամեն դեպքում ահռելի մեծ աշխատանք կա իրականացնելու: Բոլորը հասկանում են, որ այս վիճակով անելիք չունենք նունիսկ Ազգերի լիգայում»,- ասաց նա:

Նախատեսվում է, որ Հայաստանի ֆուտբոլի ազգային հավաքականը եւս 2 ընկերական հանդիպում անցկացնի մայիս-հունիս ամիսներին: Դրանից հետո թիմը սկսելու է պայքարը եվրոպական նոր մրցաշարում՝ Ազգերի լիգայում: Խմբային փուլի հանդիպումները մեկնարկելու են այս տարվա սեպտեմբերին: D լիգայի 4-րդ խմբում Հայաստանի մրցակիցներն են լինելու Մակեդոնիան, Լիխտենշտեյնը եւ Ջիբրալթարը: