Ես եւ Գագիկ Ծառուկյանը հակառակ բեւեռներում ենք. Պետոյանը՝ իր եւ Ծառուկյանի պարտքի մասին

Մի քանի օր առաջ Արթիկ քաղաքից armtimes.com-ին տեղեկություն էին փոխանցել, որ կտրուկ լարվել են ԲՀԿ առաջնորդ Գագիկ Ծառուկյանի եւ նախկին ԲՀԿ-ական Մուշեղ Պետոյանի հարաբերությունները: Աղբյուրի փոխանցմամբ՝ պատճառը եղել է այն, որ Ծառուկյանը Պետոյանին 2 մլն դոլար է տվել, որպեսզի նա Արթիկում որոշ ծրագրեր կյանքի կոչի, հետագայում՝ ընտրությունների ժամանակ ԲՀԿ-ին ձայներ բերելու հարցում օգտագործելու նպատակով: Սակայն, 2015-ի հայտնի դեպքերից հետո, երբ աջ ու ձախ ԲՀԿ-ն լքում էին, այդ մարդկանց թվում հայտնվեց նաեւ  Պետոյանը:

Գագիկ Ծառուկյանը նրանից ետ է պահանջել իր փողերը, իսկ Պետոյանը լքել էր երկիրը: Armtimes.com-ը օրեր շարունակ փորձում էր պարզաբանում ստանալ Պետոյանից, սակայն նրա հեռախոսահամարը միշտ անհասանելի էր: Այսօր Պետոյանը մեզ հետ զրույցում փորձեց հերքել իր եւ Ծառուկյանի լարված հարաբերությունների մասին պտտվող սկանդալային խոսակցությունները:

- Պարոն Պետոյան, տեղեկություն էինք ստացել, որ Դուք Արթիկից հեռացել եք եւ արտերկրում եք: Ճի՞շտ է: Դուք հիմա արտերկրու՞մ եք:

- Դե որ արտերկրում լինեի էս հեռախոսազանգը չէի ստանա, էլի:

- Հիմա գոյություն ունի ռոումինգ ծառայություն, որը թույլ է տալիս ցանկացած վայրում հեռախոսազանգ ստանալ…

- Էդ ռոումինգով, որ զանգում եք՝ տարբերվում է զանգերի ձենը, գիտեմ, որ ռոումինգ կա: Ես Հայաստանում եմ, որեւէ տեղ չեմ գնացել, որեւէ մեկից չեմ փախչում, չեմ էլ պատրաստվում փախչել:

- Գագիկ Ծառուկյանը ձեզ 2 մլն դոլա՞ր է տվել:

- Ես Ծառուկյանին պարտք չեմ, նրա հետ ջերմ հարաբերությունների մեջ եմ:

- Գումարային տարաձայնությունները հարթվե՞լ են, պարտքը վերադարձրե՞լ եք:

- Ես երբեք գումարի խնդիր չեմ ունեցել պարոն Ծառուկյանի հետ:

- Եթե ջերմ եք, ինչու՞ ԱԺ ընտրություններին ՀՀԿ-ի ցուցակով առաջադրվեցիք եւ ոչ «Ծառուկյան» դաշինքով:

- Մերը ջերմ մարդկային, նորմալ հարաբերություն է, բայց ոչ՝ քաղաքական: Քաղաքական դաշտում հակառակ բեւեռներում ենք:  

- Ակտիվ քարոզարշավ էիք իրականացնում 2016-ի ՏԻՄ եւ 2017-ի ԱԺ ընտրությունների ժամանակ: ՀՀԿ-ն էր ֆինանսավորու՞մ:

-Ես իմ թիմով, մեր ընտանեկան բյուջեից ֆինանսավորել եմ իմ քարոզարշավը:

- Այսինքն՝ բիզնեսնե՞ր ունեք:

- Ես ՍՊԸ-ներում փայաբաժին ունեմ, բայց ես չեմ կառավարում:

- Ի՞նչ ՍՊԸ-ներ են:

- «Մուշ Գոլդ»  եւ «Թուրինջ»:

- Ի՞նչ գործունեություն են ծավալում: Եկամտաբե՞ր են:

- Բազմապրոֆիլ գործունեություն՝ գազալցակայան է, բենզալցակայան է, հյուրանոց է, ռեստորան է, քարի արտադրություն է:

- Արթիկում դեռ պահպանվու՞մ է լարված քաղաքական իրավիճակը: Ասում են քաղաքապետի եւ Ձեր սկանդալային հարաբերությունների պատճառով՝ Ձեր ազգականներին ազատում են աշխատանքից: Ճի՞շտ է:

- Ես մեկ ազգական ունեմ, որը  համայնքային մանկապարտեզում տնօրեն է աշխատում: Մյուսները իմ թիմակիցներն են: Կան այնպիսի դեպքեր. իմ թիմակիցը լինելու պատճառով երկու մանկապարտեզի վարիչը աշխատանքից ազատվել է, ինչպես նաեւ մշակույթի ոլորտից են ազատվել:

- Քայլեր չե՞ք ձեռնարկում:

-Չէ, ի՞նչ քայլերի ձեռնարկեմ, ինքն է ու իր ենթակայության տակ գտնվող կառույցները: Իր թիմն է ձեւավորում:

- Բայց Դուք նախկին ԱԺ պատգամավոր եք, օրենքներից պետք է տեղյակ լինեիք, որ քաղաքական հայացքների պատճառով աշխատանքից հեռացնելը մարդու իրավունքների կոպիտ խախտում է:

- Չէ, ի՞նչ կարամ անեմ: Հիմնավո՞ր է ազատել, թե՞ անհիմն, բան չեմ կարող անել: Դրա համար համապատասխան մարմիններ կան, օրգաններ կան, որ պիտի մի բան անեն:

Հիշեցնենք, որ 2016 թվականի ՏԻՄ ընտրությունների ժամանակ Պետոյանը եւ Արթիկի ներկայի քաղաքապետ Մխիթար Վարագյանը մրցակիցներ էին: Վարագյանն ընտրվելուց հետո, ըստ Արթիկում տարածված տեղեկությունների՝ համայնքային ենթակայության տակ գտնվող կառույցներում զբաղեցրած պաշտոններից ազատում է այն աշխատակիցներին, ովքեր Պետոյանի թիմակիցներն են: 

Armtimes.com-ն արդեն անդրադարձել է թիվ 4 մանկապարտեզի տնօրենի աշխատանքից հեռացնելու դեպքին: Այս նույն կառույցում մի քանի ամիս առաջ մեկ այլ սկանդալային դեպք էր տեղի ունեցել՝ տնօրենի աշխատասենյակից գաղտնալսող սարք էր հայտնաբերվել: