Ադրբեջանն այս անգամ կհարձակվի Արցախից հյուսիս եւ հարավ ընկած ուղղություններով. փորձագետ

Ադրբեջանի կողմից հաջորդ հարձակումը տեղի կունենա Հայաստանում ԱԺ ընտրություններից հետո: Եթե լինի ընտրություններից առաջ, ապա մեծ նվեր կլինի ՀՀԿ-ին: Իսկ եթե հետո՝ թեստ կլինի նոր ընտրված խորհրդարանի համար: Ընդ որում, Ադրբեջանի հաջորդ հարձակումը կլինի ոչ թե Ղարաբաղի դեմ, այլ՝ Արցախից հյուսիս եւ հարավ ընկած ուղղություններով: Այսօր կազմակերպված քննարկման ժամանակ նման տեսակետ հայտնեց քաղաքագետ Ռիչարդ Կիրակոսյանը:

«Ընդհնանուր առմամբ՝ Ադրբեջանի հարձակումները չեն համապատասխանում ռազմական տրամաբանությանը: Դրանք պայմանավորված են ներքաղաքական վիճակով, փորձ են՝ լուծելու ներսում առկա տնտեսական խնդիրները: Իրականում Ադրբեջանի համար կարեւորը ոչ թե հաղթանակն է, այլ զուտ հարձակումը: Սրանով հանդերձ՝ միայն այդ երկիրն է հանդիսանում տարածաշրջանային անվտանգության առաջին սպառնալիքը: Ինչ վերաբերում է Հայաստանին, ապա մեզ համար ներքին կայունության համար կոռուպցիան ամենամեծ սպառնալիքն է հանդիսանում: Ապրիլյան պատերազմից հետո սա առավել պարզ դարձավ»,- նկատեց բանախոսը:

Ռիչարդ Կիարկոսյանը համոզմունք հայտնեց, որ ԵԱՀԿ Մինսկի խմբի միջնորդները շատ քիչ լծակներ ունեն ազդելու Ադրբեջանի վրա: Նրա խոսքով, ոչ ոք եւ ոչինչ չի կանգնեցնում Ադրբեջանին՝ հերթական հարձակումը նախաձեռնել: Ավելին, այդ երկրի նկատմամբ ճնշումների բացակայությունն ավելի ու ավելի է սրում իրավիճակը:

«Միակ երկիրը, որ կարող է կասեցնել էսկալացիան, Ռուսաստանն է: Մենք պետք է ակնկալենք նրա ջանքերը՝ լարվածությունը մեղմելու տեսանկյունից: Ամեն դեպքում, Մոսկվայի համար հերթական էսկալացիան ձեռնտու չէ: Մոսկվան գիտի, որ սպառնալիքը գալիս է Բաքվից, բայց, ցավոք, օգնում է Բաքվին: Ադրբեջանը նավթ է վաճառում, իսկ Ռուսաստանը՝ զինամթերք: Ստացվում է, որ մեր միակ ներուժը մնում է ինքնապաշտպանությունը»,- փաստեց քաղաքագետը:

Կրկին անդրադառնալով ապրիլյան պատերազմին՝ Ռիչարդ Կիրակոսյանն ընդգծեց, որ Հայաստանը չփորձեց ամբողջությամբ ներգրավվել ռազմական գործողություններին: Չկիրառվեցին «Իսկանդերները», մինչդեռ ապրիլյան պատերազմը Ադրբեջանի վերջին տարիների միակ հաջողությունն էր: Այդ երկրի ռազմական ներուժն այս անգամ հստակ նպատակներ ուներ: Մինչեւ ապրիլ նրանք հարձակվում էին հարձակվելու համար, իսկ ապրիլին նպատակ ունեին հարձակվել եւ որոշակի տարածքներ գրավել: Վերջին հարձակումը թեստ էր, նրանք փորձում էին մեզ, նախապատրաստվում հերթական հարձակման: Այս փորձը Հայաստանը հաջող անցավ»,- ամփոփեց բանախոսը: