Պոնչոյի արկածներն Անգլիայում. թե ինչպես կարելի է շարքային հանդիպումը դարձնել արտասովոր

Անգլիայի 5-րդ դիվիզիոնում հանդես եկող կիսասիրողական «Սաթոն Յունայթեդ» ֆուտբոլային ակումբի պահեստային դարպասապահ Ուեյն Շոուն վերջին օրերին մասսայականությամբ չի զիջում համաշխարհային ամենավառ աստղերին: Ամեն ինչ սկսվեց Անգլիայի գավաթի 1/8 եզրափակիչի վիճակահանությունից. աշխարհի ամենահայտնի ակումբներից մեկի՝ Լոնդոնի «Արսենալի» մրցակիցը դարձավ Լոնդոնի Սաթոն արվարձանը ներկայացնող համեստ, կիսասիրողական «Սաթոն Յունայթեդը», որի համար «Արսենալի» հետ հանդիպումն անգամ երազանք էր:

Կարծես ոչ մի ինտրիգ, հետաքրքրություն չէր կարող լինել այս խաղում. մրցակիցները անհամեմատելի էին, «Արսենալի» հաղթանակը կասկած չէր հարուցում: Բայց պատահական չէ, որ ֆուտբոլը ստեղծել են հենց անգլիացիները եւ այս դեպքում էլ նրանք կարողացան «լուծումներ» գտնել. ընդամենը 750 նստատեղ ունեցող փոքրիկ ստադիոնում կայացած, առաջին հայացքից ոչ մի հետաքրքրություն չներկայացնող «Սաթոն» - «Արսենալ» հանդիպումը ցուցադրվեց ավելի քան 100 երկրներում, այն դիտեցին մոտ 250 միլիոն մարդ: Իսկ որպես խայծ օգտագործվեց «Սաթոնի» պահեստային դարպասապահ Ուեյն Շոուն՝ 46-ամյա, 125 կգ քաշ ունեցող, բարի դեմքով հսկան, որին հայերեն հնչողությամբ՝ «Պոնչո» (փքաբլիթ) են անվանում:

«Սա մեր թիմի գրեթե բոլոր ֆուտբոլիստների կարիերայի գագաթնակետն է: Հասել ենք 1/8 եզրափակիչ: Վիճակահանությանը հետեւում էինք հանդերձարանում, իսկ երբ մեզ բաժին հասավ «Արսենալը», ուրախությունից այնպես վեր թռանք, որ տանիքը վնասվեց: Ես հասկանում եմ, որ իմ նկատմամբ հետաքրքրությունը քաշիս պատճառով է: Տարիներ առաջ ինձ «Պոնչո» անվանեցին եւ այն դարձավ մականուն: Չեմ նեղանում: Բայց ես համարյա չեմ խաղում: Ես թիմի աշխատակից եմ, պատասխանատու են խաղադաշտի մաքրության, խոտածածկի համար: Հարկ եղած դեպքում, իհարկե, պատրաստ եմ օգնել իմ թիմին՝ կանգնել դարպասում: Ունենք նաեւ աճի, կոորդինացիայի խնդիրներով երեխաների դպրոց. ես այնտեղ էլ եմ աշխատում»,- անգլիական ԶԼՄ-ներին տված հարցազրույցում հայտարարել է Շոուն: «Պոնչոյի» մասին ակնարկներով էին սկսվում եւ ավարտվում «Սաթոն» - «Արսենալ» հանդիպմանը նվիրված բոլոր տեսանյութերը, մամուլը, հեռուստաընկերությունները իրարից առաջ ընկնելով՝ հրապարակում էին այդ բարի հսկայի հետ հարցազրույցներ, լուսանկարներ:

Բայց երբ հանդիպումը մեկնարկեց՝ «Պոնչոն» մոռացվեց: Գրեթե մինչեւ խաղավերջ նա չհայտնվեց էկրաններին: Այդ ընթացքում խաղը դադարեցվեց անգամ. խաղադաշտում հայտնվեց կիսամերկ մի մարդ, որը մոտ 1 րոպե հանգիստ ման եկավ, ռեպլիկներ բաց թողեց ֆուտբոլիստների հասցեին, հետո էլ իր կամքով դուրս եկավ խաղադաշտից: Հետաքրքիր է, որ միայն խաղադաշտի սահմանները լքելուց հետո այդ մարդուն մոտեցան անվտանգության աշխատակիցները ու նույն հանգստությամբ ուղղակի ուղեկցեցին դեպի ելք: Այդ պահին հայ ֆուտբոլասերները հաստատապես հիշեցին Հայաստան - Պորտուգալիա հանդիպումը՝ երբ խաղադաշտ մտած ֆուտբոլասերի ետեւից մի ամբողջ ոստիկանական վաշտ էր վազում...

Վերադառնանք Անգլիա. «Սաթոն» - «Արսենալ» հանդիպման վերջին րոպեներն էին, «Արսենալը» վստահ հաղթանակ էր տանում 2-0 հաշվով եւ հանկարծ էկրաններին հայտնվեց դարպասապահ «Պոնչոն», որը պահեստայինների նստարանին մեծ ախորժակով համբուրգեր էր խժռում: Այդ մի քանի վայրկյանները դարձել են վերջին օրերի մարզական բոլոր նորությունների հիմնական թեման, «Սաթոնի» պահեստային դարպասապահ Ուեյն Շոուն էլ՝ «Պոնչոն», դարձել է համաշխարհային աստղ:

Բայց մասսայականությունը խեղճ «Պոնչոյի» հետ չար կատակ է խաղացել: Անգլիայի ֆուտբոլային ասոցիացիայի համապատասխան բաժինը հետաքննություն է սկսել, եւ արդեն պարզվել է, որ Սաթոնում գործող «Sun Bets» բուքմեյքերական ընկերությունը 8/1 հարաբերությամբ խաղադրույք է սահմանել խաղի ընթացքում «Պոնչոյի» ուտելու վրա եւ փաստորեն այն աշխատել է: Մեծ աղմուկ է բարձրացել: «Պոնչոն» հյուրընկալվել է մեծ հեղինակություն ու մասսայականություն վայելող «Բարի լույս Անգլիա» հաղորդմանը, որի ժամանակ թխվածք է կերել եւ խոստովանել, որ տեղյակ է եղել նման խաղադրույքի մասին, բայց ինքը խաղադրույք չի կատարել: «Ես ամբողջ օրը խաղադաշտում եմ եղել, մաքրել եմ այն, հանդերձարաններն եմ կարգի բերել եւ ժամանակ չեմ ունեցել սնվելու: Սոված էի, ընկերներս էլ պատմել էին այդ խաղադրույքի մասին: Ընդմիջմանը վազեցի մոտակա բարերից մեկը եւ համբուրգեր գնեցի: Հետո այն կերա՝ ուղղակի կատակի, զվարճանալու համար», - բացատրել է «Պոնչոն»:

Ամեն դեպքում «Աաթոնը» արդեն հրաժարվել է իր պահեստային դարպասապահի ծառայություններից եւ հեռացրել է նրան: «Ուեյնը իմ լավ ընկերն է, բայց ակումբի հեղինակությունը ավելի բարձր է: Ֆուտբոլիստները գիտեն, որ պետք է խաղադրույքներից հեռու մնան, բայց Ուեյնը հատուկ կերել է այդ թխվածքը: Թեեւ կատակի համար, բայց դա արգելված է: Այլ տարբերակ չունենք՝ Շոուն հեռացված է: Առավոտյան ես զանգեցի նրան. անչափ հիասթափված էր, հազիվ էր զսպում լացը»,- հայտարարել է «Սաթոնի» գլխավոր մարզիչ Պոթլ Դոսուելը:

Ահա այսպես մի քանի օրում հսկայական մասսայականություն ձեռք բերած 46 -ամյա Ուեյն Շոուն՝ «Պոնչոն», հասարակ կատակի հետեւանքով կորցրեց իր սիրելի աշխատանքը: Գործազուրկ Պոնչոն կարծես չի մնա. Անգլիայի խոշորագույն սուպերմարկետներից մեկը՝ «Morrisons»-ը, նրան թխվածքների բաժնի ներկայացուցչի պաշտոն է առաջարկել: «Այդ հանդիպումից հետո Ուեյնը դարձել է թխվածքների՝ Անգլիայի ամենահայտնի գիտակը: Մեզ հիացրել է ուտելիքի նկատմամբ նրա սերը»,- հայտարարել է  սուպերմարկետի տնօրենը:

Հ.Գ. Ի դեպ, «Արսենալը» խոստացել է 50 հազար ֆունտ տրամադրել «Սաթոնին» վնասված հանդերձարանները վերանորոգելու համար: