ՈւԵՖԱ-ի «Ազգերի լիգան» հրաշալի շանս է Հայաստանի ազգային հավաքականի համար

Ֆուտբոլի եվրոպական գլխավոր կառույցը՝ ՈՒԵՖԱ-ն, հրապարակել է ազգային հավաքականների մակարդակով անցկացվելիք նոր մրցաշարի՝ «Ազգերի լիգայի» խաղարկության կանոնակարգը եւ ժամանակացույցը, որը որոշակի թյուրըմբռնումների տեղիք է տվել Հայաստանում: ՈՒԵՖԱ-ն նախօրեին հրապարակել է «Ազգերի լիգայի» դիվիզիոնների միջանկյալ կազմը եւ Հայաստանը հայտնվել է ամենաթույլ՝ 4-րդ դիվիզիոնում: Կարծիքներ կան, թե ՈՒԵՖԱ-ի նախկին նախագահ Միշել Պլատինիի հոգեզավակ «Ազգերի լիգայի» խաղարկությունը սահմանափակում է ոչ ուժեղ թիմերի, մասնավորապես Հայաստանի ազգային հավաքականի հնարավորությունները: Հայտնվելով վերջին խմբում, մեր թիմը գրեթե կորցնում է մոտ ապագայում մեծ մրցաշարերում՝ Եվրոպայի կամ Աշխարհի առաջնությունում հանդես գալու նվազագույն հույսերը: Իրականում կոնկրետ Հայաստանի համար ներկա պահին «Ազգերի լիգայի» 4-րդ դիվիզիոնում հայտնվելը անգամ շատ ավելի մեծացնում է այդ հնարավորությունները, եւ այս իրավիճակը հասկանալու համար նախ ներկայացնեմ «Ազգերի լիգայի» կառուցվածքը եւ նպատակը:

«Ազգերի լիգայի» կանոնակարգի համաձայն՝ եվրոպական 55 երկրների հավաքականները, համաձայն իրենց վարկանիշի, բաժանվելու են 4 դիվիզիոնի: Առաջին երկուսում լինելու է 12-ական, 3-րդում՝ 15, 4-րդում՝ 16 թիմ: Դիվիզիոնների վերջնական կազմերը պարզ կլինի Աշխարհի 2018 թվականի առաջնության ընտրական մրցաշարի ավարտից հետո՝ այս տարվա նոյեմբերի 15-ին: Նույն  դիվիզիոնում ընդգրկված թիմերը բաժանվելու են 4 խմբերի եւ 1-ին տեղեր գրաված թիմերը դուրս են գալու կիսաեզրափակիչ, հաղթողները՝ եզրափակիչ, իսկ այստեղ հաղթած թիմերը նվաճելու են «Եվրո 2020» եզրափակիչ առաջնության ուղեգրեր: Խմբային փուլը կայանալու է 2018 թ. սեպտեմբեր - նոյեմբեր ամիսներին: Կիսաեզրափակիչ եւ եզրափակիչ խաղերը կայանալու են 2020 թվականի գարնանը: Մրցաշարում գործելու է ֆինանսների բաշխման կենտրոնացված համակարգ՝ ինչպես Չեմպիոնների լիգայում. բոլոր հանդիպումների իրավունքները պատկանելու են ՈՒԵՖԱ-ին, իսկ հավաքականները, ըստ ցուցադրած արդյունքների, ստանալու են գումարներ: Ընդ որում, ամենամեծ գումարները ստանալու են 1-ին դիվիզիոնում հանդես եկող թիմերը, ամենաքիչը՝ 4-րդում հայտնված երկրները:

Նշեցի արդեն, որ ՈՒԵՖԱ-ն հրապարակել է «Ազգերի լիգայի» դիվիզիոնների միջանկյալ, տվյալ պահի կազմերը, եւ Հայաստանը հայտնվել է վերջին՝ 4-րդ խմբում: Ֆինանսական առումով սա վատագույնն է իհարկե, բայց մարզական առումով՝ ուղղակի հրաշալի հնարավորություն մեր թիմի համար: Հայաստանի հետ նույն դիվիզիոնում են Անդորան, Էստոնիան, Բելառուսը, Վրաստանը, Լատվիան, Ֆարերները, Ղազախստանը, Մոլդովան, Լյուքսեմբուրգը, Մակեդոնիան, Կոսովոն, Լիխտենշտեյնը, Մալթան, Սան Մարինոը, Ջիբրալթարը: Համաձայն կանոնակարգի՝ այս թիմերից մեկը նվաճելու է «Եվրո 2020»-ի ուղեգիր. երբեւէ Հայաստանը նման շանս չի ունեցել: Միգուցե արժե անգամ ամբողջապես ձախողել անհաջող ընթացող Աշխարհի 2018 թվականի ընտրական մրցաշարը «Ազգերի լիգայի» 4-րդ դիվիզիոնում տեղը «պահպանելու» համար:

 Ընդ որում, «Ազգերի լիգան» ոչ մի կապ չունի ընտրական մրցաշարի հետ, որը կայանալու է «Ազգերի լիգայի» խմբային փուլի եւ անցումային խաղերի միջակայքում՝ 2019 թվականին: Մրցաշարի կանոնակարգի համաձայն «Եվրո 2020»-ի ընտրական մրցաշարի մասնակից 55 թիմերը բաժանվելու են 10 խմբերի, եւ 1-2 տեղեր գրավածները միանգամից նվաճելու են «Եվրո 2020»-ի ուղեգրեր: Մյուս 4 ուղեգրերը բաժին են հասնելու «Ազգերի լիգայի» 4 դիվիզիոնների հաղթողներին (20+4):

Ընդ որում, եթե թիմը հաղթել է «Ազգերի լիգայի» դիվիզիոններից որեւէ մեկի խմբային փուլում, իսկ ընտրական մրցաշարում ձեռք է բերել «Եվրո 2020»-ի ուղեգիր, ապա «Ազգերի լիգայի» անցումային խաղերին այդ թիմի փոխարեն խաղալու իրավունք է ստանալու նույն խմբում 2-րդ տեղը զբաղեցրած թիմը: Մեծ հաշվով «Ազգերի լիգայի» միջոցով ՈւԵՖԱ-ն մեծացնում է բոլոր երկրների հնարավորությունները Եվրոպայի առաջնությունում երբեւէ հայտնվելու համար: Իսկ կոնկրետ «Եվրո 2020»-ի եզրափակիչ առաջնությանը մասնակցելու համար Հայաստանը արդեն ունի 2  ճանապարհ՝ ընտրական մրցաշար եւ «Ազգերի լիգա»: